ការគ្រប់គ្រងលុយ គឺជារឿងស្មុគស្មាញមួយទៅហើយ តែការផ្ទុះជំងឺកូវីដ ១៩ បានបង្កជាឧបសគ្គថ្មីៗថែមទៀតដល់មនុស្សគ្រប់គ្នាទៀត ។ ភាពមិនប្រាកដប្រជាផ្នែកសេដ្ឋកិច្ច គឺជាតថភាពជាក់ស្តែងក្នុងពេលនេះ ដែលជាហេតុធ្វើឲ្យមនុស្សម្នាក់ៗគួរតែមានភាពប្រុងប្រយ័ត្នក្នុងការចាយវាយលុយ ។…
ការគ្រប់គ្រងលុយ គឺជារឿងស្មុគស្មាញមួយទៅហើយ តែការផ្ទុះជំងឺកូវីដ ១៩ បានបង្កជាឧបសគ្គថ្មីៗថែមទៀតដល់មនុស្សគ្រប់គ្នាទៀត ។ ភាពមិនប្រាកដប្រជាផ្នែកសេដ្ឋកិច្ច គឺជាតថភាពជាក់ស្តែងក្នុងពេលនេះ ដែលជាហេតុធ្វើឲ្យមនុស្សម្នាក់ៗគួរតែមានភាពប្រុងប្រយ័ត្នក្នុងការចាយវាយលុយ ។ ខាងក្រោមនេះ គឺជាសំណួរដែលអ្នកត្រូវឆ្លើយមុនពេលសម្រេចចិត្តក្នុងការចាយលុយនៅពេលមានវិបត្តិ ៖
១. តើចំណូលខ្ញុំបច្ចុប្បន្នគ្រប់គ្រាន់សម្រាប់ការចាយវាយប្រចាំថ្ងៃទេ?
ប្រសិនបើចម្លើយអ្នក គឺទេ នោះអ្នកត្រូវចាប់ផ្តើមរកវិធីដើម្បីបង្កើនប្រាក់ចំណូល ឬកាត់បន្ថយការចាយវាយដែលមិនចាំបាច់ ។ ប្រសិនបើអ្នកជួលផ្ទះស្នាក់នៅ វាជាពេលដែលអ្នកគួរនិយាយជាមួយម្ចាស់ផ្ទះដើម្បីសុំការយោគយល់ ឬចរចាទម្លាក់ថ្លៃជួលជាដើម ។ ប្រសិនបើអ្នកមានចំណូលគ្រប់គ្រាន់សម្រាប់ការរស់នៅប្រចាំថ្ងៃហើយ ចូរបន្តទៅឆ្លើយសំណួរខាងក្រោម ។
២. តើខ្ញុំមានថវិកាសន្សំគ្រប់សម្រាប់ការចាយវាយ ៣ខែ ឬនៅ?
ប្រសិនបើអ្នកមិនទាន់មានទេ អ្នកត្រូវចាប់ផ្តើមសន្សំលុយទុកគ្រាអាសន្ន ។ បន្ទាប់ពីចាយវាយលើអ្វីដែលចាំបាច់ដូចជាថ្លៃផ្ទះ និងអាហារហើយ លុយដែលនៅសល់គួរតែត្រូវបានទុកក្នុងគណនីសន្សំមួយដាច់ដោយឡែកដែលអ្នកអាចដកបានគ្រប់ពេលដែលអ្នកត្រូវការ ។ អ្នកជំនាញមួយចំនួនទៀតផ្តល់យោបល់ឲ្យអ្នកសន្សំឲ្យគ្រប់ការចាយវាយ ៦ខែប្រសិនបើ់អ្នកមានសមត្ថភាពគ្រប់គ្រាន់ ។
៣. តើខ្ញុំមានគោលដៅអ្វីដែលខ្ញុំចង់សម្រេចជាងគេ?
ពេលដែលតម្រូវការចាំបាច់របស់អ្នកត្រូវបានផ្គត់ផ្គង់ ហើយអ្នកបានទុកប្រាក់ចំណូលមួយចំនួនសម្រាប់ថ្ងៃអនាគតហើយនោះ អ្នកត្រូវយកឱកាសនេះមកពិចារណាថាអ្នកមានគោលដៅអ្វីទៀតដែលអ្នកចង់សម្រេចជាងគេ ។
តើកូវីដ ១៩ បានជំរុញអ្នកឲ្យចំណាយច្រើនលើអាជីវកម្មក្នុងតំបន់ បរិច្ចាគជូនសប្បុរសធម៌ ឬសាកល្បងសកម្មភាព ឬគំនិតអាជីវកម្មថ្មីៗ ឬទេ? ឬក៏វាបានជំរុញឲ្យអ្នកចង់ចាកចេញពីទីក្រុង និងទិញផ្ទះមួយខ្នងនៅជនបទ? មិនថាវាជាអ្វីទេ ប្រសិនបើវាជាគោលដៅអ្នកដែលអ្នកចង់សម្រេច អ្នកគួរតែរៀបចំគម្រោងការពីពេលនេះតទៅ ៕
ចែករំលែកព័តមាននេះ