មកស្គាល់មុខមហាសេដ្ឋីវ័យក្មេងជាងគេទាំង ៤ រូបនៅអាស៊ី
កញ្ញា ខៃលី ជេននើ (Kylie Jenner) និងលោក ម៉ាក ហ្សាក់កាបឺក (Mark Zuckerberg)…
កញ្ញា ខៃលី ជេននើ (Kylie Jenner) និងលោក ម៉ាក ហ្សាក់កាបឺក (Mark Zuckerberg) សុទ្ធតែជាឈ្មោះល្បីៗដែលអ្នកធ្លាប់ស្គាល់ថាជាមហាសេដ្ឋីដែលមានវ័យក្មេងជាងគេលើលោក ។ ប៉ុន្តែក្រៅពីមហាសេដ្ឋីមកពីលោកខាងលិចហើយ ទ្វីបអាស៊ីក៏មានមហាសេដ្ឋីវ័យក្មេងជាច្រើនដែរ ។
១. លោក ចនណាថេន ខ្វក (Jonathan Kwok) អាយុ ២៨ឆ្នាំ ទ្រព្យសម្បត្តិសរុប ២ប៊ីលានដុល្លារលោកជាកូនប្រុសរបស់មហាសេដ្ឋី វ៉លធើ ខ្វក (Walter Kwok) ដែលបានទទួលមរណភាព ។ បច្ចុប្បន្ន លោកជានាយកនៅក្រុមហ៊ុន Empire Group Holdings និងរ៉ាប់រងផ្នែកតាមដានការវិនិយោគអចលនទ្រព្យ គម្រោងសាងសង់អចលនទ្រព្យ និងការគ្រប់គ្រងទ្រព្យសម្បត្តិផ្សេងៗជាដើម ។
២. លោក អៃយ៉ាវ៉ាត់ ស្រីវ៉ាដហាណាប្រាបា (Aiyawatt Srivaddhanaprabha) អាយុ ៣៤ឆ្នាំ ទ្រព្យសម្បត្តិសរុប ៣.៧ប៊ីលានដុល្លារ
បច្ចុប្បន្នលោកជាអគ្គនាយក និងនាយកប្រតិបត្តិរបស់ក្រុមហ៊ុន King Power ដែលជាក្រុមហ៊ុនគ្រប់គ្រងហាងលក់ទំនិញមិនគិតពន្ធតាមអាកាសយានដ្ឋានក្នុងប្រទេសថៃ ។ លោកបានបន្តតំណែងនេះពីឪពុករបស់លោកដែលបានទទួលមរណភាព ។ ក្រៅពីនេះហើយ លោកនិងក្រុមគ្រួសារក៏ជាម្ចាស់អគារ King Power MahaNakhon ដែរ ដែលជាអគារខ្ពស់ជាងគេលេខពីរក្នុងប្រទេសថៃ និងក្រុមបាល់ទាត់ Leicester City ជាដើម ។
៣. លោក ជីហាន វូ (Jihan Wu) អាយុ ៣៤ឆ្នាំ ទ្រព្យសម្បត្តិសរុប ១.៨ប៊ីលានដុល្លារ
លោក វូ ជាសហស្ថាបនិក និងអគ្គនាយកក្រុមហ៊ុន Bitmain Technologies ក្នុងប្រទេសចិន ។ ក្រុមហ៊ុនបានជួបប្រទះនឹងការធ្លាក់ចុះនៃតម្លៃភាគហ៊ុន និងមានការកាត់បន្ថយបុគ្គលិកជាច្រើនកាលពីឆ្នាំមិន ប៉ុន្តែស្ថានការប្រៀបដូចជាបានប្រសើរឡើងវិញហើយកាលពីត្រីមាសដំបូងក្នុងឆ្នាំ ២០២០ នេះបន្ទាប់ពីក្រុមហ៊ុនបានប្រកាសថារកប្រាក់ចំណេញបានដល់ទៅ ៣០០លានដុល្លារ ។
៤. លោក គ្រីស្តុបភើ ខ្វក (Christopher Kwok) អាយុ ៣៤ឆ្នាំ ទ្រព្យសម្បត្តិសរុប ១.៥ប៊ីលានដុល្លារ
លោកជាកូនប្រុសរបស់លោករេយម៉ុន ខ្វក (Raymond Kwok) ដែលជាអគ្គនាយក និងនាយកគ្រប់គ្រងក្រុមហ៊ុន SHKP ។ លោកបានក្លាយជានាយករបស់ SHKP តាំងពីឆ្នាំ ២០១៦ មក និងមានកាតព្វកិច្ចតាមដានការលក់ គ្រប់គ្រងគម្រោង និងការជួលគម្រោងធំៗជាដើម ។ លើសពីនេះទៅទៀត លោកជាសមាជិកគណៈកម្មាធិការក្រុងបេកាំងរបស់សន្និសិទប្រឹក្សានយោបាយរបស់ប្រជាជនចិន ដែលជាក្រុមប្រឹក្សានយោបាយមួយក្នុងប្រទេសចិនទៀតផង ៕
ចែករំលែកព័តមាននេះ