ប្រទេសបារាំង ៖ នៅប្រទេសបារាំងសាលារៀនជាច្រើនបានបិទទ្វារជាថ្មី ក្រោយរកឃើញ អ្នកឆ្លងវីរុសCOVID-19ថ្មីជាច្រើននាក់មក។ នេះជាសេចក្ដីរាយការណ៍កាលពីថ្ងៃទី១៧ឧសភារបស់ទូរទស្សន៍បារាំងBFMTV។
គ្រឹះស្ថានសិក្សាឯកជនNAZARETHនៅទីក្រុងនីស បានបិទទ្វារក្រោយពីកុមារអាយុ១១ឆ្នាំម្នាក់ រៀនថ្នាក់CM2ធ្វើតេស្តឃើញលទ្ធផលវិជ្ជមាន កាលពីថ្ងៃទី១៦ឧសភា។ តាមទូរទស្សន៍នោះថា នាយិកាសាលានោះនិងសិស្ស១០នាក់ ព្រមទាំងភ្នាក់ងារ៣នាក់ដែលប៉ះពាល់ជាមួយកុមារដែលឆ្លងវីរុស ត្រូវបានស្នើឲ្យធ្វើតេស្ត។
ស្ថានភាពរបស់កុមារនេះ ហាក់ពុំមានការបារម្ភឡើយ តែសាលានឹងនៅតែបិទទ្វាររហូតដល់ថ្ងៃទី២៨ឧសភា រួចការបាញ់ថ្នាំសម្លាប់មេរោគតាមមូលដ្ឋានានាក៏គ្រោងធ្វើដែរ។ នៅភាគខាងលិចបារាំងឃុំ២នៅជាយក្រុងANGOULEME បណ្ដាសាលារៀនបានបិទទ្វារ ក្រោយពីបុគ្គលិក២នាក់ធ្វើតេស្តឃើញលទ្ធផលវិជ្ជមាននៃវីរុស។
ចំណែកកាលពីថ្ងៃទី១៦ឧសភាកន្លងទៅគេរកឃើញអ្នកឆ្លងវីរុស២នាក់ ជាបុគ្គលិកដែលមានគ្រូម្នាក់ផង ក្នុងសាលារៀននៅCHARENTE ។
សរុបនៅបារាំងសាលាជាង៥០ត្រូវបានបិទទ្វារជាថ្មី ឬត្រូវពន្យារពេលការបើកទ្វារ ដោយសារសង្ស័យលើការការឆ្លងវីរុស៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ