រាជធានីភ្នំពេញ ៖ ផលិតផលទុរេនកំពត កំពុងត្រូវបានពលរដ្ឋកម្ពុជាទទួលស្គាល់ថា ជាផលិតមួយមានរស់ជាតិឆ្ងាញ់ និងក្លិនប្លែកពីទុរេនដាំនៅតំបន់ផ្សេង ក៏ប៉ុន្តែទុរេននេះ ត្រូវបានឈ្មួញមួយក្ដាប់តូច កំពុងរកស៊ីអាក្រក់ និងបន្លំដោយយកទុរេនពីតំបន់ផ្សេងមកបន្លំជាទុរេនកំពត និងលក់ក្នុងតម្លៃមួយថ្លៃខ្ពស់ផងដែរ ។ នេះបើតាមអ្នកចំការនៅក្នុងខេត្តកំពតបានបញ្ជាក់ប្រាប់ ។
លោកនួន មឿន ម្ចាស់ចំការក្នុងខេត្តកំពតមួយរូប បាននិយាយថា វាពិតជាមានការក្លែងបន្លំម៉ាកទុរេនកំពត សម្រាប់លក់លើទីផ្សារពិតប្រាកដមែន ជាពិសេសនោះ គឺឈ្មួញកណ្ដាលក្នុងតំបន់នោះ មិនបានទិញទុរេនពីម្ចាស់ចំការនោះទេ តែបែរជាយកទុរេនពីតំបន់ផ្សេង ដូចជាពីកោះកុងពីប្រទេសថៃ រួចហើយដឹកចូលក្នុងឃ្លាំងគេ ដែលមានទីតាំងក្នុងខេត្តកំពតដែរ រួចក៏បញ្ចេញទៅលក់នៅតាមគោលដៅនានាក្នុងប្រទេស ដោយនិយាយថា ទុរេនកំពត ។
លោកបន្តថា ទុរេនកំពតខែនេះ មានតែពូជឪខាក់ទេ ចំណែកម៉ាន់ថង គឺមានតិចបំផុតដោយសារតែវាជាពូជដែលពិបាកថែទាំ តែពូជឪខាក់ដែលដាំនៅកំពតគឺមានរស់ជាតិឆ្ងាញ់ និងឈ្ងុយលើសទុរេនដាំនៅតំបន់ផ្សេងៗតែអ្វីដែលឧបសគ្គនោះ គឺការបន្លំម៉ាកទុរេនផ្សេងថាជារបស់កំពត ។ លោកថា ៖« អ្នកខ្លះដោយគិតថាចង់បានទុរេនកំពតញ៉ាំនោះ ក៏ទៅទិញដល់ទឹកដីកំពត ឬមុខចំការតែម្ដង តែវាក៏មិនប្រាកដថាទុរេនកំពត១០០ភាគរយដែរ » ។
លោកបន្ថែមថា ចង់បានទុរេនកំពតទទួលទាននោះ គឺមានតែស្គាល់ម្ចាស់ចំការហើយទិញពីម្ចាស់ចំការផ្ទាល់ ឬ អ្នកដែលរកស៊ីមិនកេងបន្លំ តែយ៉ាងណាអ្នករកស៊ីបច្ចុប្បន្ននេះ ពិបាកទុកចិត្តណាស់ ព្រោះឈ្មួញខ្លះ ទិញហើយយកលុយក៏ទៅបាត់ មិនដឹងទៅរកនៅណាទេ តែសម្រាប់អ្នកដែលរកស៊ីត្រឹមត្រូវគេចង់ទុកកេរ្តិ៍ឈ្មោះរកស៊ីថ្ងៃក្រោយ គេអាចនឹងលក់ទុរេនកំពតពិតៗ ។
ចំណែកអ្នកស្រីណាសាង ម្ចាស់ចំការមួយរូបក៏បាននិយាយថា សព្វថ្ងៃនេះ អ្នកស្រីមិនលក់ទុរេនអោយឈ្មួញកណ្ដាលនៅក្នុងខេត្តកំពតទេ គឺអ្នកស្រីបានបញ្ជូនទៅអោយអតិថិជននៅភ្នំពេញ និងនៅ បណ្ដាខេត្តវិញ ។ អ្នកស្រីក៏មានការធានាអះអាង១០០ភាគរយថាបើសិនជាអតិថិជនដែលយកទុរេននោះទៅបរិភោគហើយវាមិនមែនជាទុរេនកំពតគឺប្តូរជូន ។ មួយវិញទៀត បើមានការខូចខាតស្អុយឬមិនមានសាច់ក៏ត្រូវប្តូរជូនដែរ ។ ការរកស៊ីត្រូវមានភាពស្មោះត្រង់ទើបអាចរកស៊ីបានយូរអង្វែង ។
ពាក់ព័ន្ធនឹងតម្លៃទុរេនវិញ ឆ្នាំនេះតម្លៃលក់រាយគឺ២៨០០០រៀលក្នុងមួយគីឡួក្រាមខណៈឆ្នាំមុនគឺត្រឹម ២៥០០០ រៀល។ ចំណែកតម្លៃបោះដុំឆ្នាំ២០២០ គឺពីរង្វង់ ២៣០០០ ទៅ ២៥០០០ រៀលក្នុងមួយគីឡូក្រាម ដែលឆ្នាំ២០១៩ គឺត្រឹមតែ២០០០០រៀលតែប៉ុណ្ណោះ ៕
ចែករំលែកព័តមាននេះ