រាជធានីភ្នំពេញ ៖ អ្នកប្រដាល់ជើងខ្លាំងវ័យក្មេងឈុត សេរីវ៉ាន់ថង មកពីក្លិបរាហូកីឡាខេត្តបាត់ដំបង បានផ្ដួលពុទ្ធ សំបូរ មកពីក្លិបពុទ្ធសេរីវង្សពោធិសែនជ័យ ឱ្យសន្លប់ត្រឹមទឹកទី២កាលពីព្រឹកថ្ងៃសៅរ៍ ទី១៦…
រាជធានីភ្នំពេញ ៖ អ្នកប្រដាល់ជើងខ្លាំងវ័យក្មេងឈុត សេរីវ៉ាន់ថង មកពីក្លិបរាហូកីឡាខេត្តបាត់ដំបង បានផ្ដួលពុទ្ធ សំបូរ មកពីក្លិបពុទ្ធសេរីវង្សពោធិសែនជ័យ ឱ្យសន្លប់ត្រឹមទឹកទី២កាលពីព្រឹកថ្ងៃសៅរ៍ ទី១៦ ឧសភានៅលើសង្វៀនទូរទស្សន៍ស៊ីអិនស៊ី ។ ជ័យជម្នះនេះធ្វើឱ្យរូបគេមានឱកាសឡើងទៅប្រកួតវគ្គផ្ដាច់ព្រ័ត្រដណ្ដើមយករង្វាន់ធំម៉ូតូZoomer Xពីកម្មវិធីកម្ពុជា សង្វៀនគុនខ្មែរ។
សម្រាប់ការជួបគ្នារវាងឈុត សេរីវ៉ាន់ថង និងពុទ្ធ សំបូរ លើកនេះគឺជាការប្រកួតវគ្គពាក់កណ្ដាលផ្ដាច់ព្រ័ត្រក្នុងជុំទី២នៃកម្មវិធីកម្ពុជា សង្វៀនគុនខ្មែរទម្ងន់៦០គីឡូក្រាម បន្ទាប់ពីមានការអាក់ខានអស់រយៈពេលជាច្រើនសប្ដាហ៍កន្លងមកនេះ ។ នៅមុនពេលប្រកួតពួកគេទាំងពីរសុទ្ធតែមានជំនឿចិត្តយ៉ាងមុតមាំក្នុងការប្រជែងតំណែងកៅអីឡើងទៅប្រកួតនៅវគ្គបន្ត ។ ប៉ុន្តែគួរឱ្យស្ដាយដែលពុទ្ធ សំបូរ មិនអាចទៅរួចជាមួយអ្នកប្រដាល់ស្រករក្រោយមកពីក្លិបរាហូកីឡារូបនេះ។
តាមពិតទៅ ការប្រកួតត្រឹមទឹកទី១ ពុទ្ធ សំបូរបានវាយចូលមុខឈុត សេរីវ៉ាន់ថងមួយដៃជាទម្ងន់បណ្ដាលឱ្យចេញឈាមតាមច្រមុះ ។ ប៉ុន្តែចូលដល់ទឹកទី២ ឈុត សេរីវ៉ាន់ថងបានសម្រុកចូលវាយបកសងវិញយ៉ាងសន្ធាប់ ដោយគេបានប្រើស្នៀតជើងទាត់ឱ្យដួលទាំងជំហរ និងបានម៉ាត់ចូលមុខជាច្រើនដៃថែមទៀតធ្វើឱ្យពុទ្ធ សំបូរ ដួលសន្លប់ក្រោកលែងរួចត្រូវលោកអាជ្ញាកណ្ដាលបញ្ឈប់លែងឱ្យប្រកួតតែម្ដង ។
កីឡាករឈុត សេរីវ៉ាន់ថង ឈ្នះការប្រកួតលើកនេះគេត្រៀមឡើងទៅប្រកួតនៅវគ្គបន្តជាមួយកីឡាករ ឃីម បូរ៉ា មកពីក្លិបរស្មីភូមិគាបដែលកំពុងតែឈររង់ចាំដើម្បីដណ្ដើមយករង្វាន់ម៉ូតូZoomer X ១គ្រឿង ។ ចំណែកពុទ្ធ សំបូរ ដណ្ដើមបានចំណាត់ថ្នាក់លេខ៣ដោយស្វ័យប្រវត្តិអមជាមួយទឹកប្រាក់១៥០០ដុល្លារអាមេរិក ។
សម្រាប់លទ្ធផលគូប្រកួតមិត្តភាពវិញ កីឡាករ មឿន សុខហ៊ុច មកពីក្លិបពុទ្ធសេរីវង្សពោធិសែនជ័យ បានយកឈ្នះកីឡាករឈាង ហុង មកពីក្លិបខ្លារខិនមានរិទ្ធដោយពិន្ទុ ។
កីឡាករ ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ បានយកឈ្នះពិន្ទុកីឡាករ ខុន ស៊ីចាន់ មកពីសមាគមអប់រំកាយស្រុកអន្លង់វែង និងកីឡាករ នន់ ជំនិត មកពីក្លិបស្វាយរលំមានរិទ្ធ បានយកឈ្នះកីឡាករ ហេង វិឆ័យមកពីក្លិបកងពលតូចលេខ៧០ដោយពិន្ទុ៕ (កែសម្រួលដោយ ៖ បុប្ផា)
ចែករំលែកព័តមាននេះ