ខេត្តមណ្ឌលគិរី ៖ ស្នងការខេត្តមណ្ឌលគិរីបានដាក់បញ្ជាដាច់ខាតដល់គ្រប់កងកម្លាំងដែលចុះប្រតិបត្តិការពង្រឹងច្បាប់ចរាចរណ៍គ្រប់គោលដៅក្នុងខេត្ត មិនត្រូវធ្វើលើសពីច្បាប់កំណត់ឡើយ។
ជាក់ស្តែងកាលពីថ្ងៃទី១៥ ខែឧសភា ឆ្នាំ២០២០ លោកជាក់ ម៉េងហ៊ាង អភិបាលរងខេត្ត និងលោកឧត្តមសេនីយ៍ទោ ឡោ សុខា ស្នងការនគរបាលខេត្ត បានចុះត្រួតពិនិត្យតាមគោលដៅកម្លាំង នគរបាលចរាចរណ៍ និងកម្លាំងអន្តរាគមន៍ នៃស្នងការដ្ឋាន នគរបាលខេត្ត ដែលកំពុងចុះអនុវត្តន៍ច្បាប់ចរាចរណ៍ថ្មីនៅតាមគោលដៅក្នុងខេត្តមណ្ឌលគិរី តាមអនុសាសន៍ណែនាំដ៏ខ្ពង់ខ្ពស់របស់លោកនាយឧត្តមសេនីយ៍សន្តិបណ្ឌិត អគ្គស្នងការនគរបាលជាតិ។
ក្នុងនោះដែរចំពោះ ទោចក្រយានយន្ត ត្រីចក្រយានយន្តសណ្តោងរ៉ឺម៉ក់ និងម៉ូតូកង់បួន តម្រូវឲ្យធ្វើការផាកពិន័យមានចំនួន៧ចំណុច និងចំពោះរថយន្តធុនស្រាល និងរថយន្តធុនធ្ងន់ តម្រូវឲ្យធ្វើការផាកពិន័យមានចំនួន៩ចំណុច, ហាមដាច់ខាតអនុវត្តលើសពីការណែនាំនេះ។
លោកស្នងការបានធ្វើការណែនាំដល់មន្ត្រីនគរបាលចរាចរណ៍ទាំងអស់ដែលកំពុងអនុវត្តច្បាប់ចរាចរណ៍ ត្រូវប្រកាន់ឥរិយាបថ ក្រមសីលធម៌ល្អ ចំពោះអ្នកបើកបរដែលកំពុងបានប្រើប្រាស់ផ្លូវគ្រប់ប្រភេទ។ នៅក្នុងនោះផងដែរ ដោយពិនិត្យឃើញបងប្អូនប្រជាពលរដ្ឋក្រីក្រមិនមានពាក់មួកសុវត្ថិភាព ហើយត្រូវមន្ត្រីអនុវត្តច្បាប់កំពុងនឹងធ្វើការផាកពិន័យ តែមិនមានថវិកាបង់ លោកឧត្តមសេនីយ៍ស្នងការ បានចេញថ្លៃផាកពិន័យជំនួសពួកគាត់ចំនួន១១មួក និងបានទិញមួកសុវត្ថិភាពជូនពួកគាត់ចំនួន២៤មួកផងដែរ ហើយការបង់ប្រាក់ផាកពិន័យនេះដែរមានបង្កាន់ដៃផាកពិន័យត្រឹមត្រូវជូនពួកគាត់។
លោកជាក់ ម៉េងហ៊ាង អភិបាលរងខេត្ត និងលោកឧត្តមសេនីយ៍ស្នងការបានសំណូមពរដល់បងប្អូនប្រជាពលរដ្ឋ ត្រូវចូលរួមគោរពច្បាប់ចរាចរណ៍ថ្មីនេះឲ្យបានល្អប្រសើរ ក្នុងគោលបំណងកាត់បន្ថយគ្រោះថ្នាក់ចរាចរណ៍ឲ្យនៅត្រឹមកំរិតទាបបំផុត និងសូមឲ្យបងប្អូនចូលរួមពាក់មួកសុវត្ថិភាព និងចូលរួមគោរពច្បាប់ចរាចរណ៍ទាំងអស់គ្នា នេះគឺជាការឆ្លុះបញ្ចាំងអំពីការយល់ដឹងដ៏ត្រឹមត្រូវរបស់បងប្អូនទាំងអស់គ្នា។
បងប្អូនប្រជាពលរដ្ឋមានការសប្បាយចិត្តយ៉ាងខ្លាំង និងសូមសន្យាថា គ្រប់ពេលធ្វើដំណើរត្រូវពាក់មួកសុវត្ថិភាព និងចូលរួមផ្សព្វផ្សាយដល់បងប្អូនដែលនៅជិតខាងឲ្យពួកគាត់ឱ្យចូលរួមគោរពច្បាប់ចរាចរណ៍ ទាំងអស់គ្នា ដើម្បីសុវត្ថិភាពដល់ក្រុមគ្រួសារពួកយើង និងអ្នកដទៃផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ