ខេត្តកំពង់ស្ពឺ៖ ឈើដុលជាង២០កំណាត់ត្រូវបានមន្ត្រីឧទ្យានុរក្សបរិស្ថានដែនជម្រកសត្វព្រៃភ្នំឱរ៉ាល់ធ្វើការបង្ក្រាបបាន ខណៈដែលឈ្មួញដឹកយកមកទំលាក់ទុកក្នុងព្រៃ ។ ការបង្ក្រាបឈើដុលខាងលើនេះ កាលពីល្ងាចថ្ងៃទី១៥ ឧសភា នៅក្នុងព្រៃក្រោយផ្ទះប្រជាពលរដ្ឋ ក្នុងភូមិច្រកទៀកកណ្តាល ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។
តាមការអោយដឹងពីមន្ត្រីជំនាញនិយាយអោយដឹងថា នៅមុនពេលបង្ក្រាបឈើដុលខាងលើនេះ គឺមានសេចក្តីរាយការណ៍ពីបណ្តាញថា មានគោយន្តដឹកឈើរបស់ឈ្មួញ ដឹកយកមកលាក់ទុកនៅក្រោយផ្ទះប្រជាពលរដ្ឋក្នុងព្រៃមួយកន្លែង ពេលកម្លាំងជំនាញចុះទៅដល់ ណាមួយមេឃធ្លាក់ភ្លៀងផងនោះ ក្រុមម្ចាស់គោយន្ត បានកាត់ខ្សែទំលាក់ចោល រួចបើកគោយន្តរត់គេចខ្លួនបាត់ស្រមោល ។ ហើយបន្សល់ទុកតែឈើដុលជាង២០កំណាត់ ។
ក្រុមមន្ត្រីបរិស្ថានដែនជម្រកសត្វព្រៃភ្នំឱរ៉ាល់ បានចុះទៅដល់កន្លែងដែលឈ្មួញទំលាក់ឈើនោះ ក្រោមការចង្អុលបង្ហាញពីលោក ហ៊ុល ម៉ារ៉ា អនុប្រធានការិយាល័យដែនជម្រកសត្វព្រៃភ្នំឱរ៉ាល់ និងមានការឯកភាពពីលោកប្រធានមន្ទីរបរិស្ថានខេត្តផងដែរ ។ ការខិតខំប្រឹងប្រែងរបស់មន្ត្រីដែនជម្រក សត្វព្រៃភ្នំឱរ៉ាល់មិនគិតពីការនឿយហត់ ទាំងថ្ងៃ ទាំងហាលថ្ងៃ ភ្លៀងខ្យល់ ធ្វើយ៉ាងណាដើម្បីទប់ស្កាត់បទល្មើសធនធានធម្មជាតិ ពិសេសក្រុមឈ្មួញកាប់បំផ្លាញព្រៃឈើនោះ ។
តាមការបង្ហើបអោយដឹងថា ឈើដុលដែលបង្ក្រាបបាននេះ គឺឈ្មួញកាប់ចេញពីតំបន់អភិរក្សជួរភ្នំក្រវ៉ាញនិងដែនជម្រកសត្វព្រៃភ្នំរ៉ាល់ខេត្តពោធិ៍សាត់ ។ ហើយដោយយប់ទៅហើយនោះមន្ត្រីដែនជម្រកសត្វព្រៃភ្នំឱរ៉ាល់បានដេកយាមនៅកន្លែងឈើដុលនោះ។ នៅពេលព្រឹក ត្រូវដឹកទៅរក្សាទុកនៅទីស្នាក់ការដែនជម្រកសត្វព្រៃភ្នំឱរ៉ាល់រង់ចាំកសាងសំណុំរឿងចាត់ការបន្តតាមផ្លូវច្បាប់ ។
ចែករំលែកព័តមាននេះ