ខេត្តសៀមរាប ៖ នាវេលាម៉ោង២រសៀលថ្ងៃទី១៥ ខែឧសភា ឆ្នាំ២០២០ កម្លាំងការិយាល័យប្រឆាំងបទល្មើសសេដ្ឋកិច្ចបានសហការជាមួយក្រុមការងារចម្រុះចុះបិទការដ្ឋានជីកយកអាចម៌ដីលក់មួយកន្លែង គ្មានលិខិតអនុញ្ញាត ស្ថិតនៅភូមិសាស្ត្រភូមិត្រាវកៀត ឃុំដានរុន ស្រុកសូទ្រនិគម ខេត្តសៀមរាប។
បើតាមសមត្ថកិច្ចនគរបាលជំនាញបានប្រាប់ថា ក្នុងប្រតិបត្តិការខាងលើនេះ កម្លាំងនគរបាលជំនាញបានធ្វើកំណត់ហេតុបិទទីតាំងអាជីវកម្មកាយយកអាចម៌ដីលក់មួយកន្លែងនោះជាបណ្តោះអាសន្ន ព្រមទាំងធ្វើការផាកពិន័យអន្តរការណ៍ យោងតាមច្បាប់ស្តីពីការគ្រប់គ្រងការធ្វើអាជីវកម្មធនធានរ៉ែ តាម មាត្រា៣៥ថ្មី និងធ្វើកិច្ចសន្យាបញ្ឈប់ការជីកអាចម៌ដី គ្មានលិខិតអនុញ្ញាតបន្តទៀត។
ក្រោយបានធ្វើឯកសារបិទទីតាំងខាងលើនោះរួចមក កម្លាំងសមត្ថកិច្ចបានដកហូតគ្រឿងចក្រចំនួន៣ គ្រឿង រួមមាន អេស្ការវ៉ាទ័រចំនួន១គ្រឿង, ឡានដឹកដីចំនួន១គ្រឿង, គោយន្ដដឹកដីចំនួន១គ្រឿង។
ក្នុងករណីខាងលើនេះដែរ ម្ចាស់ការដ្ឋានមានបំណងប្រកបអាជីវកម្មជីកអាចម៌ដីលក់ ត្រូវដាក់ពាក្យស្នើសុំលិខិតអនុញ្ញាតទៅរដ្ឋបាលសាលាខេត្ត ឬក្រសួងរ៉ែ និងថាមពលជាមុនសិន ទើបអាចប្រកបអាជីវកម្មបាន។ ចំពោះគ្រឿងចក្រ ត្រូវបានសមត្ថកិច្ចចម្រុះប្រគល់ឱ្យកម្លាំងជំនាញ ដើម្បីអនុវត្តបន្ត ។ បន្ទាប់មកបានធ្វើកំណត់ហេតុប្រគល់ឱ្យម្ចាស់ការដ្ឋានទទួលយកទៅរក្សាទុកបណ្តោះអាសន្នវិញ៕ (កែសម្រួលដោយ ៖ ធីតា)
ចែករំលែកព័តមាននេះ