រាជធានីភ្នំពេញ ៖ ផលិតផលទុរេនកំពតកំពុងត្រូវបានពលរដ្ឋកម្ពុជាទទួលស្គាល់ថាជាផលិតមួយមានរសជាតិឆ្ងាញ់និងក្លិនប្លែកពីទុរេនដាំនៅតំបន់ផ្សេង ក៏ប៉ុន្តែទុរេននេះត្រូវបានឈ្មួញមួយក្ដាប់តូចកំពុងរកស៊ីអាក្រក់ និងបន្លំដោយយកទុរេនពីតំបន់ផ្សេងមកបន្លំជាទុរេនកំពតនិងលក់ក្នុងតម្លៃមួយថ្លៃខ្ពស់ផងដែរ ។ នេះបើតាមអ្នកចំការនៅក្នុងខេត្តកំពតបានបញ្ជាក់ប្រាប់សារព័ត៌មានកោះសន្តិភាព ។
លោកនួន មឿន ម្ចាស់ចំការក្នុងខេត្តកំពតមួយរូបបាននិយាយថា «វាពិតជាមានការក្លែងបន្លំម៉ាកទុរេនកំពត សម្រាប់លក់លើទីផ្សារពិតប្រាកដមែន ជាពិសេសនោះគឺឈ្មួញកណ្ដាលក្នុងតំបន់នោះ មិនបានទិញទុរេនពីម្ចាស់ចំការនោះទេ តែបែរជាយកទុរេនពីតំបន់ផ្សេង ដូចជាពីកោះកុង និងពីប្រទេសថៃ ជាដើម រួចហើយដឹកចូលក្នុងឃ្លាំងគេ ដែលមានទីតាំងក្នុងខេត្តកំពតដែរ រួចក៏បញ្ចេញទៅលក់នៅតាមគោលដៅនានាក្នុងប្រទេស ដោយនិយាយភូតកុហកថាជាទុរេនកំពត» ។
លោកបានបន្តថា ទុរេនកំពតខែនេះ មានតែពូជឪខាក់ទេ ចំណែកម៉ាន់ថង គឺមានតិចបំផុតដោយសារតែវាជាពូជដែលពិបាកថែទាំ តែពូជឪខាក់ដែលដាំនៅកំពតគឺមានរស់ជាតិឆ្ងាញ់ និងឈ្ងុយលើសទុរេនដាំនៅតំបន់ផ្សេងៗតែអ្វីដែលឧបសគ្គនោះ គឺការបន្លំម៉ាកទុរេនផ្សេងថាជារបស់កំពត ។
ម្ចាស់ចំការទុរេនកំពតរូបនេះបានបន្តថា « អ្នកខ្លះដោយគិតថាចង់បានទុរេនកំពតញ៉ាំនោះ ក៏ទៅទិញដល់ទឹកដីកំពត ឬមុខចំការតែម្ដង តែវាក៏មិនប្រាកដថាទុរេនកំពត១០០ភាគរយដែរ » ។ លោកបានបន្ថែមថា ចង់បានទុរេនកំពតទទួលទាននោះ គឺមានតែស្គាល់ម្ចាស់ចំការហើយទិញពីម្ចាស់ចំការផ្ទាល់ ឬ អ្នកដែលរកស៊ីមិនកេងបន្លំ តែយ៉ាងណាអ្នករកស៊ីបច្ចុប្បន្ននេះ ពិបាកទុកចិត្តណាស់ ព្រោះឈ្មួញខ្លះ ទិញហើយយកលុយក៏ទៅបាត់ មិនដឹងទៅរកនៅណាទេ តែសម្រាប់អ្នកដែលរកស៊ីត្រឹមត្រូវគេចង់ទុកកេរ្តិ៍ឈ្មោះរកស៊ីថ្ងៃក្រោយ គេអាចនឹងលក់ទុរេនកំពតពិតៗ ។
ចំណែកអ្នកស្រីណាសាង ម្ចាស់ចំការមួយរូបក៏បាននិយាយថា សព្វថ្ងៃនេះ អ្នកស្រីមិនលក់ទុរេនអោយឈ្មួញកណ្ដាលនៅក្នុងខេត្តកំពតទេ គឺអ្នកស្រីបានបញ្ជូនទៅអោយអតិថិជននៅភ្នំពេញ និងនៅ បណ្ដាខេត្តវិញ ។ អ្នកស្រីក៏មានការធានាអះអាង១០០ភាគរយថាបើសិនជាអតិថិជនដែលយកទុរេននោះទៅបរិភោគហើយវាមិនមែនជាទុរេនកំពតគឺប្តូរជូន ។ មួយវិញទៀត បើមានការខូចខាតស្អុយឬមិនមានសាច់ក៏ត្រូវប្តូរជូនដែរ ។ ការរកស៊ីត្រូវមានភាពស្មោះត្រង់ទើបអាចរកស៊ីបានយូរអង្វែង ។
អ្នកស្រីបានបន្តថា ឈ្មួញកណ្ដាលខ្លះ នៅក្នុងខេត្ត នៅពេលខែទុរេនកំពតទុំ ពួកគេ បានមកម៉ៅទាំងចំការរបស់កសិករ ដើម្បីកាត់លក់បន្តទៅអ្នកលក់រាយរបស់ខ្លួន តែឈ្មួញខ្លះ គេរកស៊ីត្រឹមត្រូវ គឺលក់តែទុរេនកំពតសុទ្ធដែលកាត់ពីចំការ ហើយទុំត្រឹមត្រូវ តែឈ្មួញខ្លះទៀត ខិលខូច ទៅទិញទុរេនពីតំបន់ណាផ្សេងមកដាក់ចូលក្នុងទុរេនកំពតដែរ ដើម្បីអោយមានទីផ្សារដូចទុរេនកំពតដែរ ។ តែសម្រាប់អ្នកដែលចេះបរិភោគទុរេន គេពិតជាដឹងថាមួយណាជាទុរេនកំពត មួយណាជាទុរេនមិនមែនពីកំពត ។អ្នកស្រីបានបញ្ជាក់ថា « ឈ្មួញខ្លះទៀត ខំកាត់ទុរេនទាំងដែលមិនទុំ ឬមិនទាន់ដល់អាយុត្រូវកាត់ ដើម្បីលក់ចេញទៅអ្នកលក់រាយ ធ្វើអោយទុរេននោះ បាត់រសជាតិ ព្រោះទុរេនមិនទាន់ដល់អាយុ គឺរាងខ្ចីមិនសូវមានរសជាតិដូចទុរេនដែលដែលទុំពេញអាយុនោះទេ » ។
ពាក់ព័ន្ធនឹងតម្លៃទុរេនវិញ ឆ្នាំនេះតម្លៃលក់រាយគឺ ២៨០០០ រៀលក្នុងមួយគីឡួក្រាមខណៈឆ្នាំមុនគឺត្រឹម ២៥០០០ រៀល។ ចំណែកតម្លៃបោះដុំឆ្នាំ២០២០ គឺពីរង្វង់ ២៣០០០ ទៅ ២៥០០០ រៀលក្នុងមួយគីឡូក្រាម ដែលឆ្នាំ២០១៩ គឺត្រឹមតែ ២០០០០ រៀលតែប៉ុណ្ណោះ។
គួរបញ្ជាក់ថា ក្រសួងពាណិជ្ជកម្មនៃព្រះរាណាចក្រកម្ពុជា ក៏បានប្រគល់វិញ្ញាបនបត្រដល់ទុរេនកំពតជាផលិតសំគាល់ភូមិសាស្ត្រក្នុងប្រទេសកម្ពុជាមួយដែរ ហើយក៏មានក្រូចថ្លុងកោះទ្រង់ ព្រមទាំងផលិតផលជាច្រើនទៀត ដើម្បីជំរុញការទិញផលិតផលខ្មែររបស់ប្រជាពលរដ្ឋកម្ពុជា ក្នុងគោលដៅលើកស្ទួយផលិតផលក្នុងស្រុក ៕
ចែករំលែកព័តមាននេះ