ខេត្តសៀមរាប ៖ លំនៅឋាន២ខ្នងបានរងការខូតខាត ខណៈមានភ្លៀងលាយឡំលាយឡំដោយខ្យល់កន្ត្រាក់ កាលពីវេលាម៉ោងប្រមាណ៨យប់ថ្ងៃទី១៥ ខែឧសភា ឆ្នាំ២០២០ នៅភូមិត្រាចពក និងភូមិត្រពាំងត្រុំ ឃុំពពេល ស្រុកសូទ្រនិគម តែពុំបណ្តាលឲ្យមានមនុស្សណាម្នាក់រងរបួសឡើយ ។
មន្ត្រីសមត្ថកិច្ចមូលដ្ឋានឲ្យដឹងថា ខ្យល់កន្ត្រាក់នេះបណ្ដាឱ្យរលំផ្ទះក្បឿង១ខ្នង ទំហំ៦ម៉ែត្រគុណនឹង១២ម៉ែត្រ ជារបស់ឈ្មោះ ឡាំ លាង ភេទប្រុស អាយុ៣៥ឆ្នាំ នៅភូមិត្រាចពក ឃុំពពេល និងរបើកសំយាបផ្ទះស័ង្កសី១ខ្នង ទំហំ៤ម៉ែត្រគុណនឹង៨ម៉ែត្រ ជារបស់ឈ្មោះ សោមអោម ភេទប្រុស អាយុ៥៦ឆ្នាំ នៅភូមិត្រពាំងត្រុំ ឃុំពពេល ។
ក្នុងបាតុភូតធម្មជាតិនេះដែរ ខ្យល់កន្ត្រាក់បានបំផ្លាញលំនៅឋានជាង២០ខ្នង និងរន្ទះបាញ់ផ្ទះ១ខ្នង ក្នុងរយៈពេល២ថ្ងៃគឺថ្ងៃទី១៣និង១៤ ខែឧសភា ២០២០ នៅខេត្តបន្ទាយមានជ័យ ។
នៅថ្ងៃទី១៣ ខែឧសភា មានភ្លៀងលាយឡំដោយខ្យល់កន្ត្រាក់ បណ្តាលឲ្យប៉ះពាល់លំនៅឋានចំនួន៨ខ្នង ក្នុងនោះនៅស្រុកមង្គលបុរីខូចខាត៥ខ្នង នៅក្រុងសិរីសោភ័ណ២ខ្នង និងរន្ទះ
បាញ់១ខ្នងចំហោជាង នៅស្រុកអូរជ្រៅ ។
នាវេលាម៉ោង៤ល្ងាចថ្ងៃទី១៤ ខែឧសភា មានភ្លៀងលាយឡំដោយខ្យល់កន្ត្រាក់បំផ្លាញលំនៅ
ឋានអស់ចំនួន១៤ខ្នង ក្នុងនោះនៅស្រុកមង្គលបុរី១១ខ្នង និងរោងម៉ាស៊ីន១ខ្នង និងនៅស្រុកព្រះនេត្រព្រះចំនួន៣ខ្នង ។
ខ្យល់កន្ត្រាក់បានបំផ្លាញផ្ទះសម្បែងឲ្យខូចខាតដោយប៉ើងដំបូល និងខូចស័ង្កសីនិងបាក់ តែមិនមានគ្រោះថ្នាក់ដល់មនុស្សឡើយ ។ ប្រជាពលរដ្ឋដែលរងគ្រោះដោយខ្យល់កន្ត្រាក់ ត្រូវបានកងកម្លាំងទាំងបីស្ថាប័ន មានយោធាតំបន់ប្រតិបត្តិការសឹករងបន្ទាយមានជ័យ នគរបាលនៃស្នងការដ្ឋានខេត្ត កងរាជអាវុធហត្ថខេត្ត ចុះជួយអន្តរាគមន៍ជួសជុលលំនៅឋានដែលខូចខាតឡើងវិញ ៕ (កែសម្រួលដោយ ៖ បុប្ផា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ