ខេត្តមណ្ឌលគិរី ៖ សសរថ្មធម្មជាតិរាប់រយដើម ត្រូវបានរកឃើញបន្ថែមទៀតនៅតំបន់ការពារសត្វព្រៃភ្នំព្រេច នាស្រុកកែវសីមា បន្ទាប់ពីប្រភេទថ្មដ៏កម្រនេះធ្លាប់រកឃើញនៅតំបន់ភ្នំណាមលៀរ ស្រុកពេជ្រា កាលពីអំឡុងដើមឆ្នាំ២០២០ កន្លងទៅ។ ជុំវិញការរកឃើញសសរថ្មធម្មជាតិ ដែលមានរូបរាងស្ទើរតែដូចទៅនឹងសសរប្រាសាទបុរាណ ហើយត្រូវបងប្អូនជាតិដើមភាគតិចបានលើកឡើងថា ទឹកដីនេះជាតំបន់ដូនតារបស់ជនជាតិដើមព្នង។
ថ្មនេះ គឺមានមុខ៤០, ៥០, ៦០ស.ម ដែលមានទំរង់ប្រាំបីជ្រុង និងបួនជ្រុងរាប់រយកំណាត់គរលើគ្នា ហើយកាលពីដើមឆ្នាំ២០២០ សហគមន៍ជនជាតិដើមព្នង បាននាំមន្ត្រីក្រសួងវប្បធម៌ទៅមើលផ្ទាំងថ្មបុរណ ដែលមានអាយុកាលមិនតិចជាង៨០០ ទៅ១ ០០០ឆ្នាំនោះទេ។ ហើយថ្មទាំងនោះ មានសណ្តានត្រវែង ដែលពុះជ្រៀកយ៉ាងមានរបៀបរៀបរយ។ បើតាមសហគមន៍ជនជាតិដើមព្នង ដែលនៅក្នុងតំបន់នោះបញ្ជាក់ថា ទីនោះគឺជាទីសក្ការៈ និងមានតំណមខ្លាំង។
បន្ថែមលើនេះ ចាស់ៗជំនាន់មុននៃជនជាតិដើមព្នង បានបង្ហើបថា ថ្មនេះគឺមានទំនាក់ទំនងនឹងថ្មនៅប្រាសាទនានានៅទីក្រុងអង្គរ កាលពី៧០០ទៅ៨០០ឆ្នាំមុន។ បើតាមចាស់ទុំជនជាតិដើមព្នងបានបញ្ជាក់ថា កាលពីមុនដូនតារបស់ពួកគាត់ គឺត្រូវបានកេណ្ឌឲ្យទៅធ្វើប្រាសាទនៅទីក្រុងបុរណអង្គរ។ ហើយថ្មៗទាំងអស់ គឺជាថ្មដែលគេយកទៅធ្វើថ្មនៃប្រាសាទអង្គរ និងប្រាសាទនានានៅក្នុងសម័យអង្គរ។ កាលសម័យដើមជនជាតិដើមទាំងអស់ គឺបានចូលរួមយ៉ាងសកម្មនៅក្នុងការកសាងទីក្រុងសំខាន់ៗរបស់អាណាចក្រអង្គរ ដូចជា ជនជាតិដើមកួយ គឺពូកែស្លរដែក និងទាក់ដំរី ជនជាតិដើមព្នងគឺពូកកែទាក់ដំរី និងចម្បាំង ជនជាតិដើមទំពួន ក្រឹង និងជនជាតិដើមដទៃទៀតសុទ្ធតែមានតួនាទីសំខាន់ៗក្នុងការកសាងរាជធានីអង្គរ។
ទោះជាយ៉ាងណា ការលើកឡើងខាងលើនេះ គឺយោងទៅតាមអបិយ៍ជំនឿរបស់អ្នកស្រុកប៉ុនណោះ។ចំណែកលោក កែវ សុភគ៍ ប្រធានមន្ទីរបរិស្ថានខេត្តមណ្ឌលគិរីបានឲ្យដឹងថា ថ្មដែលគេទើបប្រទះឃើញនៅដែនជម្រកការពារសត្វព្រៃភ្នំព្រេចទាំងនេះ គឺមានរូបរាង និងសណ្ឋានដូចគ្នាទៅនឹងថ្ម ដែលគេបានរកឃើញនៅដែនជម្រកការពារសត្វព្រៃណាមលៀរដែរ។ ហើយលោកក៏បានបញ្ជូនមន្ត្រីទៅពិនិត្យ ដើម្បីធ្វើរបាយការណ៍ជូនថ្នាក់ដឹកនាំ ដើម្បីធ្វើការស្រាវជ្រាវបន្ត។
លោក នួន សារ៉ន អភិបាលស្រុកកែវសីមាបានឲ្យដឹងថា កន្លងមក ពុំធ្លាប់មាននរណាម្នាក់បានដឹងពីរឿងរ៉ាវថ្មនេះទេ ហើយលោកក៏ទើបទទួលបានព័ត៌មាននេះដែរ និងកំពុងទាក់ទងទៅខាងផ្នែកវប្បធម៌ឲ្យជំនាញគេចុះពិនិត្យ។ លោកអភិបាលស្រុកថា ពិតជាចំលែកផងដែរ ចំពោះមូលដ្ឋានរបស់លោក ព្រោះនៅតំបន់នេះមិនមានប្រាសាទបុរាណសូម្បីតែមួយ បែរជាមានថ្មដែលមានរូបរាងដូចទៅនឹងសសរប្រាសាទនានាទៅវិញ។
លោក សី ទូច ប្រធានមន្ទីរវប្បធម៌ខេត្តមណ្ឌលគិរី បានឲ្យដឹងថា ថ្មហ្នឹង គឺមានសណ្ឋានដូចគ្នា ខ្លះមាន៦ជ្រុង ៨ជ្រុង។ បើតាមអ្នកបច្ចេកទេសថា វាជាថ្មបាសាល់ កករពីកំអែលភ្នំភ្លើងនៅពេលចុះត្រជាក់។
លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងថា ដំបូងឡើយលោកស្រីក៏គិតថា ជាថ្មប្រាសាទបុរាណដែរ ព្រោះវាមានរាងជ្រុងៗដូចសសរ ប៉ុន្តែបើតាមអ្នកជំនាញបច្ចេកទេសថា វាគឺជាកំអែលភ្នំភ្លើង ដែលអាចដុះឡើងមានសណ្ឋានដូចជា បួនជ្រុងៗចឹងយើងត្រូវគោរពទៅតាមអ្នកបច្ចេកទេសព្រោះគេបាននិយាយអ៊ីចឹង… កន្លងមក លោកស្រីរដ្ឋមន្ត្រីបានយល់ឃើញថា ថ្មទាំងនេះ ប្រាកដជាឆ្លងកាត់ស្នាដៃរបស់មនុស្ស ទើបវាលេចចេញនូវរូបរាងបែបនេះ ប៉ុន្តែវាបានកើតឡើងដោយធម្មជាតិ។
លោកស្រី ភឿង សកុណា បញ្ជាក់ថា បើវាមិនមានការប៉ះពាល់ទៅលើប្រភេទថ្មប្រាសាទបុរាណទេ កិច្ចការបន្តគឺទុកឲ្យជំនាញបរិស្ថានជាអ្នកធ្វើការ៕ (កែសម្រួលដោយ ៖ បុប្ផា)
ចែករំលែកព័តមាននេះ