ខេត្តកំពង់ស្ពឺ ៖ បើតាមសេចក្តីរាយការណ៍បានឱ្យដឹងថា នារីស្រស់សោភាម្នាក់មើលពីក្រៅសាកសមជាកូនអ្នកធូរធា បានបង្កឱ្យមានការភ្ញាក់ផ្អើលដល់ប្រជាពលរដ្ឋពេញផ្សារតែម្តង ក្រោយពេលដែលគេឃើញសមត្ថកិច្ចបានចាប់វាយខ្នោះនារីរូបនេះ ទើបដឹងថា តាមពិតទៅនាងជាចោរលួចកាច់.កម៉ូតូសោះ ។ ការឃាត់ខ្លួននេះបង្កឱ្យមានការភ្ញាក់ផ្អើលកាលពីរសៀលថ្ងៃទី១៥ ខែឧសភា ឆ្នាំ២០២០ នៅចំណុចផ្សារត្រែងត្រយឹង ក្នុងខេត្តកំពង់ស្ពឺ ។
សេចក្តីរាយការណ៍បន្តថា នារីជាជនសង្ស័យខាងលើនេះឈ្មោះជា ស្រីម៉ី អាយុ20ឆ្នាំ មានទីលំនៅភូមិក្រាំងស្វាយ ឃុំរលាំងគ្រើល ស្រុកសំរោងទង ខេត្តកំពង់ស្ពឺ។
បើតាមសមត្ថកិច្ចនគរបាលប៉ុស្តិ៍ត្រែងត្រយឹង បានឲ្យដឹងថា ដោយទទួលព័ត៌មានពីសមត្ថកិច្ចខាងឃុំអូរបាក់រទេះ ស្រុកកំពង់សិលា ថា មានជនសង្ស័យម្នាក់ដែលធ្លាប់ធ្វើសកម្មភាពលួចសម្ភារៈ និងម៉ូតូជាច្រើនលើកច្រើនសានៅឃុំអូរបាក់រទេះនោះដែលត្រូវសមត្ថកិច្ចតាមចាប់យូរមកហើយ ពេលនេះបាននិងកំពុងរៀបចំធ្វើសកម្មភាពលួចកាច់.កម៉ូតូប្រជាពលរដ្ឋនៅផ្សារត្រែងត្រយឹង។ ក្រោយពីដឹងដំណឹងនេះភ្លាម លោកនាយប៉ុស្តិ៍រដ្ឋបាលក៏ដឹកនាំកម្លាំងចាំឃ្លាំមើល រហូតប្រទះឃើញជនសង្ស័យកំពុងតែកាច់.កម៉ូតូមួយគ្រឿង សមត្ថកិច្ចក៏អាចចូលទៅឃាត់ខ្លួនតែម្ដង។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចសម្ភារៈ និងម៉ូតូនៅភូមិសាស្ត្រឃុំអូរបាក់រទេះពិតប្រាកដមែននាពេលកន្លងមក ហើយក៏ត្រូវបាននគរបាលប៉ុស្តិ៍ត្រែងត្រយឹង ចាប់ខ្លួនពេលកំពុងធ្វើសកម្មភាពកាច់.កម៉ូតូនៅចំណុចផ្សារត្រែងត្រយឹងនេះតែម្ដង។
ប្រភពដដែលបន្តថា បន្ទាប់ពីធ្វើកំណត់ហេតុរួចរាល់ហើយ នៅព្រឹកថ្ងៃទី16 ខែឧសភានេះ សមត្ថកិច្ចនគរបាលប៉ុស្តិ៍ត្រែងត្រយឹង បានប្រគល់ជនសង្ស័យទៅលោកអៀត វិរ: នាយប៉ុស្តិ៍នគរបាលអូរបាក់រទេះ ដែលបានតាមដានជនសង្ស័យរហូតឈានដល់ការចាប់ខ្លួននេះ ដើម្បីយកទៅកសាងសំណុំរឿង ចាត់ការបន្តតាមនីតិវិធីច្បាប់ ។ ចំណែកឯម៉ូតូដែលជនសង្ស័យបានកាច់.កម៉ូតូនេះ ពេលនេះម្ចាស់ម៉ូតូពុំបានប្តឹងផ្ដល់អ្វីនោះទេ គឺសុំត្រឹមយកម៉ូតូត្រឡប់ទៅផ្ទះវិញប៉ុណ្ណោះ។
បើតាមមហាជនដែលដឹងរឿងសមត្ថកិច្ចឃាត់ខ្លួននារីរូបស្រស់រូបនេះ បានលើកឡើងថា ខ្លួននាងនៅក្មេង មានរូបសម្រស់ស្រស់សោភា មិនគួរណាបណ្ដោយខ្លួនឲ្យធ្លាក់ទៅក្នុងអំពើផ្លូវអបាយមុខ ដោយដើរធ្វើចោរបែបនេះសោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ