រាជធានីភ្នំពេញ៖ ដោយសារតែបញ្ហាកូវីដ-១៩ សម្តេចតេជោ ហ៊ុន សែន នាយករដ្ឋមន្ត្រីកម្ពុជាទើបតែបានជួបចៅទើបបានជួបនឹងបីចៅស្រីទី២១កាលពីរសៀលថ្ងៃទី ១៦ ខែឧសភា ម្សិល
មិញនេះ ។
ក្នុងរូបភាពបង្ហោះលើគណនីហ្វេសប៊ុកផ្លូវការរបស់សម្តេចតេជោ សម្តេចបានពាក់ម៉ាស់ និងបានបីចៅស្រីទី ២១ ដោយក្តីស្រលាញ់ ក្នុងនោះផងដែរសម្តេចបានទម្លាយឲ្យដឹងថាចៅស្រីទី ១ នេះគឺត្រូវបានឪពុកម្តាយដាក់ឈ្មោះថា «ម៉ាលីយ៉ា (Malya)» ជាពិសេសសម្តេចតេជោ បានឆ្លៀតសរសើរដល់កូនស្រីពៅរបស់សម្តេចដែលបានដាក់ឈ្មោះកូនស្រីរបស់ខ្លួនយ៉ាងពីរោះយ៉ាងដូច្នេះថា « ឆ្លាតគ្រាន់បើ ម្តាយឈ្មោះម៉ាលី ឯកូនឈ្មោះម៉ាលីយ៉ា មិនពិបាកសរសេរ» ។
ក្រៅពីរូបថតជាមួយចៅៗប្រុស-ស្រីសម្តេចតេជោ ក៏បានបញ្ជាក់ថា ក្នុងចំណោមចៅ២១នាក់មានប្រុសចំនួន ១២នាក់ និងស្រី៩នាក់គ្រប់គ្រាន់ ដើម្បីបង្កើតក្រុមបាល់ទាត់បុរសមួយក្រុមបាល់ទះបុរសមួយក្រុម បាល់បោះបុរស មួយក្រុមនឹងបង្កើតក្រុមបាល់ទះនារី មួយក្រុម។
សម្តេចតេជោ ក៏បានបន្ថែមថា «ចង់បានដូចនេះចៅប្រុសទាំងអស់ត្រូវចេះលេង៣ប្រភេទកីឡា
គឺបាល់ទាត់ បាល់ទះ និងបាល់បោះ។ នេះគ្រាន់តែជាគិតរបស់ជីតាតែមិនដឹងថាចៅៗនឹងធ្វើតាមយើងឬអត់?» ។
សូមរម្លឹកផងដែរថា អ្នកជំងឺស្រីមួយរូបដែលជាអ្នកជំងឺកូវីដ-១៩ ចុងក្រោយគេ ត្រូវបានទទួលការព្យាបាលជាសះស្បើយនៅថ្ងៃទី ១៦ ឧសភា នេះ ដែលសរុបទាំងអស់មានចំនួន១២២ នាក់ ហើយកម្ពុជាក៏មិនមានអ្នកឆ្លងជម្ងឺកូវីដ-១៩ថ្មីថែមទៀតដែរ ដែលនេះចាត់ទុកជាដំណឹងដ៏ល្អ
មួយសម្រាប់ប្រទេសកម្ពុជា ។
យ៉ាងណាមិញប្រមុខដឹកនាំរាជរដ្ឋាភិបាលកម្ពុជានៅតែក្រើនរម្លឹកម្តងហើយម្តងទៀតថា «ពិតមែនតែយើងពុំមានករណីថ្មីក៏ដោយ សូមបងប្អូនប្រជាពលរដ្ឋបន្តប្រុងប្រយ័ត្នខ្ពស់មានអនាម័យជាប់ជាប្រចាំគឺត្រូវពាក់ម៉ាស ដុសលាងសម្អាតដៃជាមួយសាប៊ូ ទឹកអាល់កុលឬចឹលសម្លាប់មេរោគឆ្លងផ្សេងៗ ហើយបន្តរក្សាគម្លាតឆ្ងាយពីគ្នា និងកុំចេញក្រៅផ្ទះបើគ្មានការចាំបាច់អ្វីទេនោះ។
នៅពេលនេះ ប្រទេសជិតខាងយើង និងពិភពលោកទាំងមូលក៏កំពុងបន្តរាតត្បាតដោយជំងឺកូវីដ-១៩ ដែលជាក្តីបារម្ភដ៏ធំបំផុត ហើយមកទល់ពេលនេះក៏មិនទាន់មានថ្នាំព្យាបាលជំងឺកូវីដ១៩ នៅឡើយដែរ។ សូមអរគុណដែលបងប្អូនជនរួមជាតិដែលបានចូលរួមប្រយុទ្ធប្រឆាំងជំងឺកូវីដ១៩ ទាំងអស់គ្នា» ៕ (កែសម្រួលដោយ ៖ បុប្ផា)
ចែករំលែកព័តមាននេះ