មេរៀនពិសេសដែលអ្នកអាចរៀនសូត្របានពីសហគ្រិនវ័យក្មេងអាយុ ១៩ឆ្នាំ
ប្រេនដេន ខក (Brendan Cox) ជាសហគ្រិនអាយុ ១៩ឆ្នាំ ដែលបង្កើតបានអាជីវកម្មចំនួន ១០ មកហើយចាប់ពីអាយុ ៩ឆ្នាំមកដល់បច្ចុប្បន្ននេះ…
ប្រេនដេន ខក (Brendan Cox) ជាសហគ្រិនអាយុ ១៩ឆ្នាំ ដែលបង្កើតបានអាជីវកម្មចំនួន ១០ មកហើយចាប់ពីអាយុ ៩ឆ្នាំមកដល់បច្ចុប្បន្ននេះ ។ យុវជននេះបានខ្ចីលុយ ៩០០ដុល្លារពីម្តាយរបស់ខ្លួនដើម្បីបង្កើតអាជីវកម្មមួយដែលរកប្រាក់ចំណេញបាន ២៥ម៉ឺនដុល្លារ ។ ខាងក្រោមនេះជាមេរៀនសំខាន់ៗដែលអ្នកអាចរៀនសូត្របានពីយុវជនម្នាក់នេះ៖
១. វិធីប្រមូលធនធានសម្រាប់អាជីវកម្ម
ការបញ្ចុះបញ្ចូលឪពុកម្តាយឲ្យផ្តល់កម្ចី ៩០០ដុល្លារដល់ក្មេងអាយុ ១៣ឆ្នាំ គឺមិនងាយស្រួលទេ ។ ប្រេនដេន បាននិយាយថា ខ្ញុំជាក្មេងអាយុ ១៣ឆ្នាំដែលមិនមានបទពិសោធន៍ក្នុងពិភពអាជីវកម្មទាំងស្រុង ។ ដូច្នេះខ្ញុំត្រូវបង្ហាញប្រាប់ឪពុកម្តាយខ្ញុំថា ពួកគេអាចជឿទុកចិត្តខ្ញុំបាន ។ ដើម្បីធ្វើដូច្នេះបាន ខ្ញុំបានធ្វើបទបង្ហាញដោយប្រើ PowerPoint ដើម្បីបង្ហាញពីផែនការច្បាស់លាស់របស់ខ្ញុំ ។ វាមានទាំងអ្វីដែលខ្ញុំត្រូវចាយវាយ និងវិធីដែលខ្ញុំអាចរកលុយមកវិញបានជាដើម ។
២. វិធីធ្វើឲ្យអតិថិជនជឿទុកចិត្តលើអ្នក
ប្រសិនបើអ្នកមានអាយុវ័យក្មេង ឬមិនមានបទពិសោធន៍ច្រើនក្នុងខ្លួន អ្នកដទៃប្រហែលជាមិនជឿទុកចិត្តអ្នកទេ ហើយមនុស្សមួយចំនួនអាចមានគំនិតឆ្លៀតឱកាសចង់កេងប្រវ័ញ្ចពីអ្នកទៀតផង ។ ពេលដែលអតិថិជនព្យាយាមតថ្លៃជាមួយនឹង ប្រេនដេន យុវជនម្នាក់នេះមិនចុះថ្លៃឡើយព្រោះគេដឹងពីតម្លៃរបស់ខ្លួន និងតម្លៃរបស់ក្រុមហ៊ុនខ្លួន ។ ដោយហេតុដូច្នេះទើប ប្រេនដេនអាចកសាងឈ្មោះរហូតដល់អ្នកដទៃមិនដែលតថ្លៃជាមួយគេឡើយ ។
ប្រេនដេន បានប្រាប់មកថា ដោយរៀនពីការសរសេរ និងនិយាយដោយមានជំនាញ អ្នកដទៃក៏កាត់បន្ថយការតថ្លៃដែរ ។ លើសពីនេះទៅទៀត ភាពជឿទុកចិត្តលើខ្លួនឯង គឺពិតជាសំខាន់ណាស់ក្នុងការបញ្ចុះបញ្ចូលប្រាប់អ្នកដទៃពីគុណភាពនៃផលិតផលឬសេវាកម្ម ។
៣. វិធីធ្វើឲ្យបុគ្គលោកជឿទុកចិត្តលើអ្នក
ការកសាងទំនាក់ទំនងល្អជាមួយមនុស្សដែលធ្វើការជាមួយអ្នក គឺពិតជាសំខាន់ណាស់ក្នុងគ្រប់អាជីវកម្មទាំងអស់ ហើយវាកាន់តែសំខាន់ទៅទៀតប្រសិនបើម្ចាស់អាជីវកម្មជាមនុស្សដែលនៅវ័យក្មេង ឬមិនមានបទពិសោធន៍ច្រើន ។ ប្រេនដេន បានបកស្រាយថា ប្រសិនបើអ្នកជួយដល់បុគ្គលិកអ្នក ពួកគេក៏នឹងជួយអ្នកដែរ ។
លើសពីនេះទៅទៀត យុវជនម្នាក់នេះបានចែករំលែកថា ការធ្វើល្អដាក់មនុស្សដែលតំណាង ប្រេន និងក្រុមហ៊ុនរបស់អ្នក គឺមានសារៈសំខាន់ណាស់ ។ មតិយោបល់ល្អជាងគេនឹងមានចេញពីបុគ្គលិករបស់អ្នក ហើយប្រសិនបើអ្នកធ្វើល្អដាក់ពួកគេ អ្នកនឹងមើលឃើញភាពជោគជ័យក្នុងអាជីវកម្មរបស់អ្នក ៕
ចែករំលែកព័តមាននេះ