ខេត្តព្រៃវែង ៖ ខណៈពលរដ្ឋខ្មែរមួយចំនួនហាក់មិនពេញចិត្តនឹងការផាកពិន័យធ្ងន់ធ្ងរសម្រាប់បទល្មើសចរាចរណ៍ផ្លូវគោកក្នុងយុគ្គសម័យកូវីដ-១៩ រហូតមានខេត្តខ្លះពលរដ្ឋដែលមានម៉ូតូកញ្ចាស់ត្រូវបង្ខំចិត្តដុតម៉ូតូចោលព្រោះការផាកពិន័យធ្ងន់ធ្ងរពេកនោះ ស្រាប់តែនៅក្រុងព្រៃវែងនៃខេត្តព្រៃវែងឯណោះវិញ មហាជនបានស្ងើចសរសើរចំពោះសមត្ថកិច្ចប៉ូលីសនៃអធិការដ្ឋាននគរបាលក្រុងព្រៃវែងដែលមិនបានផាកពិន័យលើបងប្អូនដែលក្រីក្រនិងមានជំងឺសម្រាប់ការបើកបរគ្មានមួកសុវត្ថិភាព ។
ជាងនេះទៅទៀតបងប្អូនក្រីក្រទាំងនោះក៏ទទួលបានមួកសុវត្ថិភាពម្នាក់មួយពាក់ការពារអាយុវីជិតផងដែរ ។ ជាក់ស្តែងសមត្ថកិច្ចនៅអធិការដ្ឋាននគរបាលក្រុងព្រៃវែងបានឲ្យដឹងថា ចាប់តាំងពីថ្ងៃទី០១ ខែឧសភា ដល់ថ្ងៃទី១៥ ខែឧសភាឆ្នាំ២០២០ អធិការនគរបាលអធិការដ្ឋាននគរបាលក្រុងព្រៃវែង ក្រោមការដឹកនាំបញ្ជាផ្ទាល់របស់លោកវរសេនីយ៍ឯក នុត ប៊ុនឌឿន បានអនុវត្តន៍ធ្វើការរឹតបណ្តឹង អប់រំណែនាំដល់បងប្អូនប្រជាពលរដ្ឋអំពីច្បាប់ចរាចរណ៍ផ្លូវគោក ដោយសន្និដ្ឋានឃើញថា បងប្អូនប្រជាពលរដ្ឋរស់នៅក្រុងព្រៃវែងយើងមានការយល់ដឹងខ្ពស់ បានគោរពច្បាប់ចរាចរណ៍បានល្អប្រសើរ ជាង៩០% ដោយបើកបរម៉ូតូមាន មួកសុវត្ថិភាព មានកញ្ចក់ មានស្លាកលេខនិងគ្មានបំពង់ស៊ីមាំងសំឡេងលឺខ្លាំង មិនតែប៉ុណ្ណោះសោត យើងទទួលបានការថយចុះនូវអត្រាគ្រោះថ្នាក់ចរាចរណ៍បានជាលំដាប់ឈប់មានការធ្វេសប្រហែស រឺបំពានល្មើសច្បាប់ឡើយ។
ប្រភពដដែលបានឲ្យដឹងថា «ក្នុងនាមលោកអធិការនិងមន្ត្រីចុះអនុវត្តន៍ច្បាប់ក្រោមឱវាទទាំងអស់បាននិងកំពុងយកចិត្តទុកដាក់ខ្ពស់ ការងារមនុស្សធម៌ចំពោះបងប្អូនប្រជាពលរដ្ឋយើងមានជីវភាពខ្វះខាតក្រីក្រខ្លាំង មានជម្ងឺប្រចាំកាយ ចាស់ជរា ជនពិការ ស្ត្រីមានផ្ទៃពោះ កុមារ លោកអធិការ និងមន្ត្រីយើងបានលើកលែងការផាកពិន័យ ដោយគ្រាន់តែអប់រំណែនាំតែប៉ុណ្ណោះ ហើយថែមទាំងជួនមួកសុវត្ថិភាពមួយដល់ពួកគាត់ទៀតសម្រាប់ពាក់ធ្វើដំណើរតាមដងផ្លូវ (ល្មើសច្បាប់អន្តរកាលច្បាប់ចរាចរណ៍មិនអាចលើកលែងចំពោះជនណាម្នាក់ឡើយ) តែនេះជាទឹកចិត្តដ៏សប្បុរសរបស់កងកម្លាំងនគរបាលនៃអធិការដ្ឋាននគរបាលក្រុងព្រៃវែង ។
កាលពីថ្ងៃទី ១៤ ឧសភា សមត្ថកិច្ចក្រុងព្រៃវែងក៏បានលើកលែងការផាកពិន័យដល់អ្នកមីងម្នាក់ដោយពិនិត្យឃើញទិដ្ឋភាពជាក់ស្ដែងថាអ្នកមីងមានជីវភាពខ្វះខាតមានជម្ងឺ ប្រចាំកាយលោកអធិការបានជួនមួកសុវត្ថិភាពមួយ សម្រាប់ពាក់ធ្វើដំណើរ ។
យ៉ាងណាមិញ សមត្ថកិច្ចបានសំណូមពរដល់បងប្អូនប្រជាពលរដ្ឋទាំងអស់ចូលរួមគោរពច្បាប់ចរាចរណ៍ទាំងអស់គ្នា បន្ថែមទៀត ដើម្បីការពារអាយុជីវិតរបស់បងប្អូននិងចូលរួមកាត់បន្ថយនូវគ្រោះថ្នាក់តាមដងផ្លូវផងដែរ ៕
ចែករំលែកព័តមាននេះ