បង់ក្លាដែស៖ យ៉ាងហោចណាស់មានជនជាតិភាគតិចរ៉ូហ៊ីនយ៉ាចំនួន២នាក់កំពុងរស់នៅជំរុំជនភៀសខ្លួនធំបំផុតលើពិភលោកនៅប្រទេសបង់ក្លាដេសត្រូវបានធ្វើតេស្តរកឃើញថាមានផ្ទុកកូវីដ-១៩ បង្កឲ្យមានការព្រួយបារម្ភយ៉ាងខ្លាំងចំពោះការឆ្លងក្នុងចំណោមជនភៀសខ្លួននៅក្នុងជំរុំដែលមានលក្ខណៈនៃការរស់នៅប្រមូលផ្តុំគ្នាច្រើន ។
យោងតាមការចុះផ្សាយរបស់ BBC នាថ្ងៃទី ១៤ ឧសភានេះបានឲ្យដឹងថា វេជ្ជបណ្ឌិតរដ្ឋាភិបាលបាននិយាយថាទាំងនេះជាករណីដំបូងគេដែលត្រូវបានបញ្ជាក់ថាមានជំងឺកូវីដ-១៩ ក្នុងចំណោមជនភៀសខ្លួននៅ Cox’s Bazar ដែលនៅទីនោះមានជនភៀសខ្លួនរ៉ូហ៊ីងយ៉ាប្រមាណមួយលាននាក់កំពុងបោះជំរំ ។ ក្រុមមន្ត្រីបានប្រាប់ BBC ថាអ្នកដែលឆ្លងឥឡូវនេះត្រូវបានគេព្យាបាលនិងដាក់ឲ្យនៅដាច់ដោយឡែកហើយ ។
ជាមួយគ្នានោះផងដែរ ជនភៀសខ្លួនចំនួន ១៩០០ នាក់ផ្សេងទៀតត្រូវបានយកទៅដាក់នៅកន្លែងដាច់ដោយឡែកផងដែរ សម្រាប់ការធ្វើតេស្តរកវីរុសឆ្លងមួយនេះ ។ សូមបញ្ជាក់ថាជនជាតិភាគតិច រ៉ូហ៊ីនយ៉ា នៅជំរុំភៀស Cox’s Bazar ដែលមានសភាពណែនក្តន់នោះត្រូវបានដាក់ឲ្យរស់នៅក្នុងស្ថានភាពការចេញ-ចូលក្នុងជំរុំចាប់តាំងពីថ្ងៃទី ១៤ ខែមីនា ឆ្នាំ២០២០ មកម្លេះក្រោយពីវីរុសកូវីដ-១៩ បានរីករាលដាលនិងរាតត្បាតខ្លាំង ។
ចំណែកនៅក្នុងប្រទេសក្រិកដែលជាទីជម្រករបស់ជនភៀសខ្លួនជាច្រើនផងដែរនោះ ក្រុមមន្ត្រីសង្ឃឹមថានឹងផ្លាស់ប្តូរទីតាំងជនងាយរងគ្រោះចំនួន ១.៦០០ នាក់ចេញពីជំរុំរបស់ខ្លួនទៅកាន់ប្រទេសផ្សេងទៀត ខណៈដែលការរាតត្បាតមេរោគហាក់មានសភាពខ្លាំងក្លា ។ ជនចំណាកស្រុកពីរនាក់ដែលបានទៅដល់កោះ Lesbos របស់ប្រទេសក្រិកនៅសប្តាហ៍នេះបានធ្វើតេស្តវិជ្ជមានសម្រាប់ Covid-19 ហើយបានដាច់ឆ្ងាយដោយមិនមានទំនាក់ទំនងជាមួយអ្នករស់នៅក្នុងជំរុំជនភៀសខ្លួននៅលើកោះនេះទេ ៕
ចែករំលែកព័តមាននេះ