រាជធានីភ្នំពេញ៖ ស្នាដៃ និងគំនិតច្នៃប្រឌិតក្នុងការផាត់មុខ និងការគូររូបបែបសិល្បៈផ្សេងៗរបស់អ្នកជំនាញផាត់ខ្មែរមួយរូបបានធ្វើឲ្យជនបរទេស និងប្រជាពលរដ្ឋខ្មែរមួយចំនួនស្ងើចសរសើរមិនដាច់ពីមាត់ ហើយបងប្អូនខ្លះហាក់មានការយល់ច្រឡំថា ជាស្នាដៃល្អឯនោះ គឺជាស្នាដៃជនបរទេសផងដែរ ។
គំនិតកែច្នៃក្នុងការផាត់មុខរបស់វិចិត្រករខ្មែរមួយនេះ គឺជាសិល្បៈមួយបែបដែលមានលក្ខណះរស់រវីក និងមានភាពទាក់ទាញ ដែលធ្វើអោយអ្នកមើលរូបភាពនេះហើយពិតជាមិនអាចទប់ចិត្តបានឡើយ រហូតបងប្អូនខ្មែរយើងខ្លះបានពោលឡើងថា«កូនខ្មែរពិតជាមានទេពកោសល្យខ្លាំង» ។ ប្រាកដណាស់ គំនូរដ៏ស្រស់ស្អាតទាំងនេះគឺជាស្នាដៃរបស់កញ្ញា ឌូ ពុធម៉ូលីតា ដែលប្រិយមិត្តមួយចំនួនស្គាល់ឈ្មោះហៅក្រៅថា Apple Love។
ការផាត់មុខបែបនេះជាសិល្បៈមួយដោយរួមបញ្ចូលនូវគ្រឿងអលង្ការបែបខ្មែរ និង បង្ហាញពីសិល្បៈទំនើបនៃការគូររូប ជាគ្រឿងលម្អកាយនៅលើដងខ្លួន ដែលធ្វើឲ្យមានភាពទាក់ទាញជាខ្លាំង សម្រាប់បង្ហាញទៅកាន់បរទេស និងលើឆាកអន្តរជាតិ ។
កញ្ញា ឌូ ពុធម៉ូលីតា បាននិយាយថា មូលហេតុដែលនាងផាត់មុខដោយបានលាយឡំ និងការគូរនៅលើដងខ្លួនដែលមានលក្ខណៈគ្រឿងអលង្ការ និងក្បាច់ផ្កាខ្មែរបែបនេះនៅលើដងខ្លួន ពីព្រោះ កញ្ញាចង់បង្ហាញពីសិល្បៈបុរាណរបស់ខ្មែរ និងចង់ជួយលើកតម្តើងពីវប្បធម៌ដែលខ្មែរយើងមានតាំងពីសម័យដូនតាមក ដើម្បីផ្សព្វផ្សាយទៅកាន់បរទេសថា ប្រទេសរបស់យើងពិតជាមានរបស់ដែលមានតម្លៃពិតប្រាកដមែន ហើយមិនចង់ឲ្យមានបរទេសថា នេះជារបស់ប្រទេសជិតខាងយើងឡើង។
ហើយមួយវិញទៀតកញ្ញា ចង់ឲ្យប្រជាជនខ្មែរដែលពួកគាត់បានផ្លាស់បន្តូរ ទៅរស់នៅឯប្រទេសផ្សេងទៀត ជាពិសេសសហរដ្ធអាមេរិក ដែលភាគច្រើនពួកគាត់បានប្តូរទៅរស់នៅទីនោះ កុំឲ្យពួកគាត់ភ្លេច ពីវត្តុបុរាណ និងគ្រឿងអលង្ការ និងវប្បធម៌ទាំងនោះ។ ម្យ៉ាងវីញទៀត នេះក៏ជាផ្នែកមួយដើម្បីអោយប្រជាជនខ្មែរដែលរស់នៅទីនោះបានស្គាល់និងជួយផ្សព្វផ្សាយបន្តផងដែរ។
កញ្ញាបានបន្តថា ពីព្រោះតែចំណូលចិត្តរបស់គាត់ដែលស្រលាញ់នូវគ្រឿងប្រពៃណីរបស់ខ្មែរ ទើបកញ្ញាយកវាមកកែច្នៃអោយលេចឡើងវិញឲ្យមានភាពទាក់ទាញនិងប្លែកផងដែរ នៅពេលយកគ្រឿងសំលៀកបំពាក់ខ្មែរ គួបផ្សំនឹងធ្វើការផាត់មុខ និងការគូរជាគ្រឿងអលង្ហារ ហើយនឹងក្បាច់ផ្កាខ្មែរបែបនេះនៅលើដងខ្លួន។
កញ្ញាបានបន្ថែមថា «បើទោះជាការគូររូបនេះជាវប្បធម៌បរទេសក៏ដោយ ប៉ុន្តែអោយតែយើងចេះកែច្នៃដូចជាការយករបស់វប្បធម៌ ក្បាច់បុរាណខ្មែរដែលបានឆ្លាក់នៅលើផ្ទាំងថ្មប្រាសាទរបស់យើង អាចយកមកគូរនៅលើដងខ្លួនបែបនេះវាគ្មានអ្វីខុសនោះ»។
ជាចុងក្រោយ កញ្ញ ឌូ ពុធម៉ូលី (Apple Love) ចង់អោយប្រជាជនខ្មែរយើងជួយថែរក្សាវប្បធម៌ខ្មែរអោយបានច្រើនជាពិសេស នៅក្នុងពិធីអាពាហ៍ពិពាហ៍ យើងគួរតែយកសំលៀកបំពាក់ខ្មែរមកកាត់ច្នៃជាលក្ខណៈអោយបានច្រើនជាជាងការយកសំលៀកបំពាក់ពីបរទេស ពីព្រោះម៉ូតសំលៀកបំពាក់របស់ខ្មែរយើងក៏មានច្រើនដែរ៕
ចែករំលែកព័តមាននេះ