រាជធានីភ្នំពេញ ៖ បុរសជាកម្មករសំណង់ម្នាក់លើកដែកសរសៃឡើងទៅជាន់ទី២ស្រាប់តែកន្ទុយដែកប៉ះចំខ្សែកាប្លិ៍ឆ្លងចរន្តផ្ទុះបែកផ្កាភ្លើងឆេះរលាកមួយចំហៀងខ្លួន បណ្តាលឱ្យរងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៩ព្រឹកថ្ងៃទី១៥ ខែឧសភា ឆ្នាំ ២០២០ នៅចំណុចការដ្ឋានសំណង់ផ្ទះល្វែងមួយកន្លែង ជិតខ្លោងទ្វារវត្តសំរោងអណ្តែត ស្ថិតក្នុងភូមិ រោងចក្រ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ជនរងគ្រោះឈ្មោះ ជុក រ៉ាន់ ភេទប្រុស អាយុ៣៥ឆ្នាំ ជាកម្មករសំណង់ មានស្រុកកំណើតនៅខេត្តតាកែវ បានរងរបួសទ្រូងមួយចំហៀងខាងស្តាំ ត្រូវម្ចាស់ការដ្ឋានហៅរថយន្តដឹកបញ្ជូនទៅសង្គ្រោះនៅមន្ទីរពេទ្យ ព្រះកុសុមៈ។
តាមប្រភព័ត៌មានអោយដឹងថា នៅមុនពេលកើតហេតុ ជនរងគ្រោះរួមទាំងកម្មករផ្សេងទៀតបាននាំលើកដែលសរសៃពីជាន់ក្រោមឡើងទៅជាន់ទី២ ដើម្បីរៀបចំចងដែកចាក់ពិតាន ខណៈនោះជនរងគ្រោះដែលស្ថិតនៅជាន់ទី២ ក៏បានទាញដែកឡើង ហើយកន្ទុយដែកប៉ះនឹងខ្សែកាប្លិ៍ដែលមានតង់ស្យុងខ្ពស់ធ្វើឱ្យឆ្លងចរន្តផ្ទុះបែកផ្កាភ្លើងឆេះខ្លោចរលាកមួយចំហៀងខ្លួន ។ ក្នុងគ្រោះថ្នាក់នេះដែរក៏បណ្តាលអោយចរន្តអគ្គិសនីដាច់ផងដែរ។
តាមប្រភពព័ត៌មានបានឱ្យអោយដឹងថា បន្ទាប់ពីកើតហេតុភ្លាមៗនោះ អាជ្ញាធរខណ្ឌក៍បានចុះទៅត្រួតពិនិត្យវាស់វែងសំណង់ខាងលើនោះដែរ ដោយបានរកឃើញថា សាងសង់រំលោភដែនកំណត់អគ្គិសនី ៕ (កែសម្រួលដោយ ៖ ធីតា)
ចែករំលែកព័តមាននេះ