រាជធានីភ្នំពេញ ៖ ក្រសួងសុខាភិបាលបានបញ្ជាក់ថា ព្រឹកនេះគ្មានអ្នកឆ្លងថ្មី និងជាសះស្បើយពីជំងឺកូវីដ១៩ ឡើយ ។ យោងតាមការចេញផ្សាយរបស់ក្រសួងសុខាភិបាល នៅព្រឹកថ្ងៃទី ១៥ ខែឧសភានេះ បានឲ្យដឹងថា អ្នកជំងឺសះស្បើយមានចំនួន១២១នាក់ ក្នុងចំណោម១២២នាក់ ដែលជាអ្នកឆ្លងជំងឺកូវីដ១៩ ។
អ្នកដែលកំពុងសម្រាកព្យាបាលសរុបបានថយចុះមកនៅចំនួន ០១នាក់ (ស្ត្រី ០១នាក់នៅខេត្តបន្ទាយ មានជ័យ ) ។
លោកសាស្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានសម្រេចបញ្ជូនមកបន្ត ការព្យាបាលនៅមន្ទីរពេទ្យមិត្តភាពខ្មែរ – សូវៀត រាជធានីភ្នំពេញ នាថ្ងៃទី០៨ ខែឧសភា ឆ្នាំ២០២០។
សូមរំលឹកសារជាថ្មីម្តងទៀតថា ដើម្បីបន្តរក្សានូវកិច្ចការពារកុំឲ្យមានរលកទីពីរនៃការចម្លងវីរុសកូវីដ-១៩ នៅក្នុងព្រះរាជាណាចក្រកម្ពុជា លោកសាស្ត្រចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានធ្វើការក្រើនរំលឹក និងបន្តអំពាវនាវដល់បងប្អូនប្រជាពលរដ្ឋទាំងអស់ឲ្យចូលរួមអនុវត្តន៍វិធានការការពារខ្លួន បើទោះបីជាប្រទេសកម្ពុជា មិនមានរកឃើញករណីជំងឺកូវីដ-១៩ថ្មី ក្នុងរយៈពេលជាងមួយខែកន្លងមកនេះក្តី ក៏ប៉ុន្តែបុគ្គលគ្រប់រូបត្រូវមានការប្រុងប្រយ័ត្ន និងអនុវត្តវិធានការការពារការចម្លងឲ្យបានជាប់ជានិច្ច ដោយត្រូវចេះកែប្រែ ទម្លាប់ និងឥរិយាបទនៃការរស់នៅរបស់ខ្លួនឲ្យស្របតាមសភាពធម្មតាបែបគន្លងថ្មីក្នុងបរិបទប្រយុទ្ធជំងឺកូវីដ១៩៕
ចែករំលែកព័តមាននេះ