ប្រទេសកូរ៉េខាងត្បូង ៖ ទូរទស្សន៍កូរ៉េខាងត្បូង បានបង្ហាញពីករណីដ៏ចម្លែករបស់ជាងជួសជុលស្បែកជើង មកពីទីក្រុងសេអ៊ូល ដែលបានហ្វឹកហាត់ខ្លួនប្រាណ ដោយយកក្បាលរបស់គាត់ទៅបុកជាមួយនឹងដើមឈើជារៀងរាល់ថ្ងៃ អស់រយៈពេល៥ឆ្នាំមកហើយ។ កម្មវិធីទូរទស្សន៍កូរ៉េខាងត្បូង X…
ប្រទេសកូរ៉េខាងត្បូង ៖ ទូរទស្សន៍កូរ៉េខាងត្បូង បានបង្ហាញពីករណីដ៏ចម្លែករបស់ជាងជួសជុលស្បែកជើង មកពីទីក្រុងសេអ៊ូល ដែលបានហ្វឹកហាត់ខ្លួនប្រាណ ដោយយកក្បាលរបស់គាត់ទៅបុកជាមួយនឹងដើមឈើជារៀងរាល់ថ្ងៃ អស់រយៈពេល៥ឆ្នាំមកហើយ។
កម្មវិធីទូរទស្សន៍កូរ៉េខាងត្បូង X SBS WOW បានបង្ហាញពីជាងជួសជុលស្បែកជើងម្នាក់ ពីសង្កាត់ស៊ីនជុន ដែលល្បីល្បាញយកក្បាល និងដងខ្លួនទៅបុកជាមួយនឹងដើមឈើជារៀងរាល់ថ្ងៃ។ គេបានទៅជួបជាងជួសជុលស្បែកជើងរូបនោះ ដែលសុំមិនបញ្ចេញឈ្មោះកាលពីខែមុន។ បុរសនោះដើរចេញពីហាងនៅតាមចិញ្ចើមផ្លូវតូចរបស់គាត់ ហើយបន្ទាប់ពីកម្តៅសាច់ដុំ រួចហើយគាត់ចាប់ផ្តើមយកស្មារបស់គាត់ទៅបុកនឹងដើមឈើ។ ក្រោយមកគាត់ក៏យកថ្ងាស់របស់គាត់ទៅបុកនឹងដើមឈើទៀត រហូតទាល់តែរបួស។
បន្ទាប់ពីបញ្ចប់ការហាត់ប្រាណដោយបំបុកក្បាលនឹងដើមឈើ បុរសនោះបានវិលត្រឡប់ទៅហាងតូចរបស់គាត់វិញ រួចហើយគាត់យកថ្នាំសម្លាប់មេរោគមកលាបលើថ្ងាស់។ ចំណែកឯលើថ្ងាស់របស់គាត់ បានឡើងទៅជាស្បែកក្រិននៅពីក្រោមមុខរបួស ដែលតែរកពេលជាមិនទាន់នោះទេ។
នៅពេលសួរថា ហេតុអ្វីបានជាគាត់មានអារម្មណ៍ថា ចាំបាច់ត្រូវអនុវត្តទម្លាប់ដ៏ចម្លែកបែបនេះជារៀងរាល់ថ្ងៃ? បុរសនោះបាននិយាយថា «គាត់ធ្លាប់ជាអ្នកប្រដាល់ នៅពេលគាត់នៅក្មេង ប៉ុន្តែត្រូវបោះបង់ចោលក្តីសុបិន្តដែលល្អបំផុតនៅក្នុងកីឡា បន្ទាប់ពីចាប់ផ្តើមគ្រួសារ»។ ដោយសារគាត់មិនមានពេលវេលា ឬលុយទៅហាត់នៅកន្លែងហាត់កីឡាប្រដាល់ ទើបគាត់បានបង្កើតនូវការហ្វឹកហាត់ប្លែកៗ ដើម្បីធ្វើឱ្យខ្លួនឯងនៅតែខ្លាំង។
រឿងរ៉ាវដ៏ចំឡែកនេះ មានប្រតិកម្មចម្រុះនៅលើបណ្តាញសង្គមកូរ៉េខាងត្បូង ដោយអ្នកខ្លះសើចចំអកដល់របៀបរស់នៅរបស់បុរសខាងលើ ហើយខ្លះទៀតហៅវាថា ជាការធ្វើបាបខ្លួនឯង និងសុំឱ្យគាត់ឈប់ធ្វើបែបនេះទៀត បើមិនចង់ប៉ះពាល់ដល់ខួរក្បាលទេនោះ ៕ ដកស្រង់ចេញពីវេបសាយ ៖ odditycentral (កែសម្រួលដោយ ៖ បុប្ផា)
ចែករំលែកព័តមាននេះ