ខេត្តប៉ៃលិន ៖ បើគេធ្វើដំណើរតាមដងផ្លូវជាតិលេខ៥៧ ចេញពីទីរួមខេត្តប៉ៃលិន ប្រមាណ៣គីឡូម៉ែត្រ រួចបត់ស្តាំតាមដងផ្លូវលំ ដែលគេទើបនឹងឈូសឆាយធ្វើថ្មី ប្រមាណ៤ទៅ៥គីឡូម៉ែត្របន្ថែមទៀត ឆ្ពោះទៅទិសខាងត្បូង តំបន់រមណីយដ្ឋានទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ នឹងឃើញចម្ការសាវម៉ាវធម្មជាតិ១កន្លែងមានរសជាតិផ្អែមដូចស្ករ និងឆ្ងាញ់ ដែលគេហៅ «សាវម៉ាវកំប៉ុង» ហើយត្រូវម្ចាស់បានដាំជាង៥០ដើមអស់ជាច្រើនឆ្នាំមកហើយ ក៏ប្រមូលផលបេះលក់ឱ្យភ្ញៀវទេសចរ ដែលធ្វើដំណើរទៅលេងរមណីយដ្ឋាននេះ ចូលទិញស្ទើរគ្រប់ៗគ្នាផងដែរ ។
បើតាមលោក ផាន់ រក្សា អាយុ២៨ឆ្នាំ រស់នៅភូមិខ្លុង សង្កាត់អូរតាវ៉ៅ ក្រុងប៉ៃលិន បានរៀបរាប់ឱ្យដឹងកាលពីរសៀលថ្ងៃទី១២ ខែឧសភានេះថា លោកបានដាំដំណាំសាវម៉ាវជាង៥០ដើមនេះជាយូរឆ្នាំមកហើយ ដោយទទួលបានផលផ្លែរយៈពេល៤ឆ្នាំកន្លងមកហើយដែរ ហើយសាវម៉ាវនេះ គេហៅ «សាវម៉ាវកំប៉ុង» ដោយលោកបាននាំពូជយកមកពីប្រទេសថៃ ហើយបន្ទាប់ពីផ្កាផ្លែទុំ គឺមានម៉ូយចូលទៅទិញដល់ក្នុងចម្ការតែម្តង ។
លោកបន្តថា លើសពីនេះ ភាគច្រើន គឺប្រជាពលរដ្ឋរស់នៅក្នុងក្រុងប៉ៃលិន និងមកពីតាមបណ្តាខេត្តនានា ចូលទៅទិញផ្ញើបងប្អូនក្នុងម្នាក់ៗ ១ទៅ២គីឡូក្រាម ដោយលោកលក់ត្រឹមតែ១គីឡូក្រាម៨០០០រៀលប៉ុណ្ណោះ ។ ចំពោះការដាក់ជីទៅលើដើមសាវម៉ាវនេះ គឺលោកបានផលិតជីធម្មជាតិដោយខ្លួនឯង មិនប៉ះពាល់សុខភាពភ្ញៀវដែលទិញទៅទទួលទាននោះឡើយ ។
លោកបន្តទៀតថា រហូតមកដល់ពេលនេះ សាវម៉ាវរបស់លោក ចាប់ផ្តើមទុំជាបណ្តើរៗ ជិតពេញក្នុងចម្ការហើយ បើសិនជាប្រជាពលរដ្ឋ ក៏ដូចជាភ្ញៀវទេសចរណ៍មកពីតាមបណ្តាខេត្តនានាដែលជិះម៉ូតូ ឬបើករថយន្តឆ្លងកាត់ទៅលេងរមណីយដ្ឋាន អាចចូលទៅទិញ និងថតរូបលេងជាលក្ខណៈគ្រួសារក៏បាន ខណៈដើមសាវម៉ាវនេះ បញ្ចេញពណ៌ខៀវខ្ចីគួរឱ្យចង់គយគន់ផងដែរ ។
ចំពោះផលផ្លែសាវម៉ាវនៅឆ្នាំ២០២០នេះ ហាក់ដូចជាមានការធ្លាក់ចុះបន្តិច ដោយសារតែចុងឆ្នាំមុនមានការរាំងស្ងួតហួតហែងរយ:ពេលយូរពេក អត់មានទឹកបូមស្រោច ។ លុះបន្ទាប់ពីសាវម៉ាវផ្លែរួច ក៏បន្តអត់មានទឹកបូមស្រោច ទើបបណ្តាលឱ្យជ្រុះផ្កា និងក្តិប អស់ជាច្រើន និងអត់សូវមានផ្លែជាប់នឹងដើមនោះឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ