ប្រទេសចិន ៖ តាមប្រភពព័ត៌មាន Shanghaiist បានឱ្យដឹងថា ទីក្រុងជីលីន បានក្លាយជាទីក្រុងរបស់ប្រទេសចិន ដែលត្រូវបានបិទទ្វារសារថ្មីក្នុងពេលថ្មីៗនេះ ដោយសារតែមានការព្រួយបារម្ភនៅតែបន្តកើតមានចំពោះរលកទី២ នៃជំងឺកូវីដ១៩ នៅភាគឥសាននៃប្រទេសចិន។
ជីលីន ស្ថិតនៅក្នុងខេត្តដែលមានឈ្មោះដូចគ្នា ជិតនឹងទីក្រុងស៊ូឡាន ដែលបានជាប់គាំងកាលពីដើមសប្តាហ៍នេះ បន្ទាប់ពីករណីកូវីដ១៩ ចំនួន១២ករណី ត្រូវបានរកឃើញ។ ក្រោយពីបានធ្វើការតាមដានរកប្រភពឆ្លងទៅ គេឃើញថា ករណីនេះគឺមកពីអ្នកបោកអ៊ុតម្នាក់ នៅទីក្រុងស៊ូឡាន។
ករណីនៅក្នុងជីលីន ក៏ត្រូវបានគេរាយការណ៍ថា មានជាប់ទាក់ទងជាមួយកម្មករបោកអ៊ុតដែរ។ មានករណីថ្មីចំនួន៧ ត្រូវបានរាយការណ៍ក្នុងរយៈពេល ២ថ្ងៃកន្លងមក។
ជាការឆ្លើយតប ទីក្រុងជីលីន ត្រូវបានគេបិទឱ្យអ្នកខាងក្រៅចូល ខណៈដែលអ្នកស្រុកត្រូវបានអនុញ្ញាតិឱ្យចាកចេញ ប្រសិនបើពួកគេបានធ្វើតេស្តអវិជ្ជមានសម្រាប់កូវីដ១៩ ហើយបានចំណាយពេលនៅដាច់ពីគេ។
ប្រព័ន្ធដឹកជញ្ជូនសាធារណៈរបស់ទីក្រុងត្រូវបានបិទ ជាមួយនឹងកន្លែងកម្សាន្ត និងសាលារៀនទាំងអស់៕ ដកស្រង់ចេញពីវេបសាយ ៖ shanghaiist (កែសម្រួលដោយ ៖ បុប្ផា)
ចែករំលែកព័តមាននេះ