រាជធានីភ្នំពេញ៖ អគ្គស្នងការរងនិងជាស្នងការនគរបាលរាជធានីភ្នំពេញ ឧត្តមសេនីយ៍ឯក ស ថេត បានអះអាងថាត្រឹមតែ១៣ ថ្ងៃនៃការរឹតបន្តឹងការអនុវត្ននូវច្បាប់ចរាចរណ៍ផ្លូវគោកបានធ្វើឲ្យគ្រោះថ្នាក់ចរាចរណ៍កាត់បន្ថយបានដល់ទៅ ៤០ ភាគរយឯណោះ ។…
រាជធានីភ្នំពេញ៖ អគ្គស្នងការរងនិងជាស្នងការនគរបាលរាជធានីភ្នំពេញ ឧត្តមសេនីយ៍ឯក ស ថេត បានអះអាងថាត្រឹមតែ១៣ ថ្ងៃនៃការរឹតបន្តឹងការអនុវត្ននូវច្បាប់ចរាចរណ៍ផ្លូវគោកបានធ្វើឲ្យគ្រោះថ្នាក់ចរាចរណ៍កាត់បន្ថយបានដល់ទៅ ៤០ ភាគរយឯណោះ ។
ថ្លែងនាឱកាសអញ្ជើញជួបជាមួយមន្ត្រីនៃការិយាល័យចរាចរណ៍ និងមន្ត្រីចរាចរណ៍តាម
បណ្តាអធិការខណ្ឌទាំង១៤ ដែលមានមន្ត្រីចូលរួមសរុបចំនួន ៧២៨ នាក់ ( បែកចែកជា ៤ វេន ផ្សេងគ្នា ) ដើម្បីផ្សព្វផ្សាយការប្រជុំដកពិសោធន៍នៃការអនុវត្តរឹតបន្តឹងច្បាប់ចរាចរណ៍ឧត្តមសេនីយ៍ឯក ស ថេត បានបង្ហាញនូវការកោតសរសើរចំពោះកម្លាំងទាំងអស់ដែលបានខិតខំទាំងយប់ថ្ងៃក្នុងគោលបំណងការពារអាយុជីវិត ទ្រព្យសម្បត្តិរបស់ប្រជាពលរដ្ឋ ដែលជាលទ្ធផលនៃការអនុវត្តរឹតបន្តឹងច្បាប់ចរាចរណ៍រយ:ពេល ១៣ថ្ងៃកន្លងមកនេះ បានបង្ហាញជាលទ្ធផលវិជ្ជមាន ដោយកាត់បន្ថយគ្រោះចរាចរណ៍បានរហូតដល់ ៤០% ជាពិសេសធ្វើឲ្យអ្នកបើកបរភាគច្រើនបានចូលរួមគោរពច្បាប់ ដោយពាក់មួកសុវត្ថិភាព ពាក់ខ្សែក្រវ៉ាត់ គោរពភ្លើង និងស្លាកសញ្ញាចរាចរណ៍ ។ ល ។
ម្យ៉ាងវិញទៀតឯកឧត្តមស្នងការបានណែនាំដល់មន្ត្រីអនុវត្តច្បាប់ទាំងអស់ «ត្រូវតែមានការអត់ធ្មត់ខ្ពស់ មានអាកប្បកិរិយា និងសំដីសមរម្យជាមួយប្រជាពលរដ្ឋ » ។ ឯកឧត្តមស្នងការបានសង្កត់ធ្ងន់ថា ក្នុងពេលអនុវត្តរឹតបន្តឹងច្បាប់ចរាចរណ៍នេះ បើមន្ត្រីណាប្រព្រឹត្តិខុសពីការណែនាំរបស់ថ្នាក់ដឹកនាំ មន្ត្រីនោះនឹងត្រូវដាក់ពិន័យ ក៏ដូចជាការអនុវត្តតាមវិន័យកងកម្លាំង ។
ឯកឧត្តមស្នងការ ស ថេត ក៏បានបញ្ជាក់យ៉ាងច្បាស់ដល់មន្ត្រីទាំងអស់ត្រូវតែធ្វើជាគំរូល្អដល់ប្រជាពលរដ្ឋក្នុងការគោរពច្បាប់ចរាចរណ៍ ត្រូវតែពាក់មួកសុវត្ថិភាព មានស្លាកលេខ ពាក់ខ្សែក្រវ៉ាត់ និងកុំនិយាយទូរស័ព្ទពេលបេីកបរ ( អាចនិយាយបានដោយប្រើកាស ) ៕
ចែករំលែកព័តមាននេះ