ប្រទេសអុីតាលី៖ ក្របខ័ណ្ឌកំពូល Serie A គ្រោងនឹងចាប់ផ្តើមរដូវកាលរបស់ខ្លួនឡើងវិញនៅថ្ងៃទី១៣ ខែមិថុនា ប្រសិនបើរដ្ឋាភិបាលអុីតាលីយល់ព្រម ។ ក្លិបទាំង២០នៅក្របខណ្ឌកំពូលខាងលើ បានជួបប្រជុំគ្នាកាលពីថ្ងៃពុធតាមរយៈខ្សែអាត់វីដេអូ…
ប្រទេសអុីតាលី៖ ក្របខ័ណ្ឌកំពូល Serie A គ្រោងនឹងចាប់ផ្តើមរដូវកាលរបស់ខ្លួនឡើងវិញនៅថ្ងៃទី១៣ ខែមិថុនា ប្រសិនបើរដ្ឋាភិបាលអុីតាលីយល់ព្រម ។
ក្លិបទាំង២០នៅក្របខណ្ឌកំពូលខាងលើ បានជួបប្រជុំគ្នាកាលពីថ្ងៃពុធតាមរយៈខ្សែអាត់វីដេអូ (Videoconference) ដោយព្រមព្រៀងគ្នាកំណត់កាលបរិច្ឆេទនៃការបន្តលីគឡើងវិញ ប៉ុន្តែឲ្យស្របតាមការសម្រេចរបស់រដ្ឋាភិបាល និងពិធីសារផ្នែកវេជ្ជសាស្ត្រជាតិ ។
យើងបានឃើញថាក្លិបមួយចំនួនក្នុងក្របខណ្ឌ Serie A បានវិលត្រឡប់ចូលជំរំហ្វឹកហាត់វិញរៀងខ្លួនកាលពីដើមខែឧសភា ប៉ុន្តែកីឡាករទាំងអស់អនុញ្ញាតឲ្យធ្វើការហ្វឹកហាត់តែម្នាក់ឯងដាច់ដោយឡែកពីគ្នា ។
សូមរំលឹកថាក្របខ័ណ្ឌ Serie A ត្រូវបានផ្អាកកាលពីថ្ងៃទី៩ ខែមីនា បន្ទាប់ពីមានការផ្ទុះឡើងនៃវីរុសពិភពលោកកូវីដ-១៩ ។ ក្រុមសេះបង្កង់ Juventus ដែលមាន ៦៣ពិន្ទុកំពុងតែឈរនៅលើកំពូលតារាងបណ្តោះអាសន្ន ដោយនាំមុខក្រុម Lazio តែ១ពិន្ទុប៉ុណ្ណោះ មុនពេលលីគត្រូវបានផ្អាក ។
តាមការបញ្ជាក់ពីសមាគមបាល់ទាត់ប្រទេសអុីតាលីបានឲ្យដឹងថា ក្រុមទាំងអស់នឹងត្រូវអនុញ្ញាតឲ្យធ្វើការហ្វឹកហាត់លក្ខណៈជាក្រុមឡើងវិញ ចាប់ពីថ្ងៃច័ន្ទសប្តាហ៍ក្រោយតទៅ ។
ប្រទេសអុីតាលី គឺជាប្រទេសមួយក្នុងចំណោមប្រទេសរងផលប៉ះពាល់យ៉ាងធ្ងន់ធ្ងរដោយវីរុសកូវីដ-១៩ ដោយមានអ្នកឆ្លងគិតត្រឹមថ្ងៃទី១៤ ខែឧសភាមានជាង ២២២,០០០ករណី និងអ្នកស្លាប់សរុបចំនួន ៣១,១០៦នាក់ ខណៈដែលអ្នកជាសះស្បើយមាន ១១២,៥៤១នាក់នេះបើយោងតាមទិន្នន័យពី worldometers៕ (ដកស្រង់ចេញពី ESPN)
ចែករំលែកព័តមាននេះ