ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន កាលពីរសៀលថ្ងៃទី១២ ខែឧសភា ឆ្នាំ២០២០ បានចុះបង្ក្រាបករណីបំរើសេវាផ្លូវភេទជ្រកក្រោមស្លាកម៉ាស្សា ដោយបានឃាត់ខ្លួនថៅកែហាងស្រីម្នាក់ និងរំដោះនារីបំរើសេវាផ្លូវភេទ ចំនួន៤នាក់ផងដែរ។
បើតាមលោកប្រធានការិយល័យនគរបាលប្រឆាំងការជួញដូរមនុស្ស និងការពារអនីតិជនខេត្ត បានឱ្យដឹងថា ទីតាំងហាងម៉ាស្សាដែលបានចុះបង្ក្រាបខាងលើយីហោ «រស្មីរត្ន័១៦៨» ស្ថិតនៅភូមិវត្តបូព៌ សង្កាត់សាលាកំរើក ក្រុងសៀមរាប ហើយហាងម៉ាស្សានេះ បានរកស៊ីដោយបង្កប់សេវាផ្លូវភេទជ្រកក្រោមស្លាកម៉ាស្សា ។
លោកបន្តថា ក្នុងពេលបង្ក្រាប យើងបានប្រមូលស្ត្រីរកស៊ីផ្លូវភេទចំនួន៤នាក់ ក្នុងនោះមានអនីតិជនអាយុ១៧ឆ្នាំម្នាក់ និងចាប់បានថៅកែម្នាក់ឈ្មោះ ទន់ សារ័ត្ន ភេទស្រី អាយុ៣២ ឆ្នាំ បច្ចុប្បន្នស្នាក់នៅផ្ទះជួល ក្នុងភូមិ-សង្កាត់ខាងលើ។ ហើយក្នុងនោះដែរ កម្លាំងជំនាញ បានឆែកឆេររកឃើញវត្ថុតាងដូចជា ស្រោមអនាម័យប្រើរួច និងមិនទាន់ប្រើមួយចំនួនធំផងដែរ។
លោកនាយការិយាល័យបានបន្ថែមថា បើតាមចម្លើយសារភាពរបស់ថៅកែស្រីហាងម៉ាស្សាខាងលើ បានសារភាពថា ខ្លួនពិជាបានអនុញ្ញាត្តឱ្យស្រីៗរកស៊ីផ្លូវភេទនៅក្នុងហាងម៉ាស្សារបស់ខ្លួន ដោយបំរើផ្លូវភេទជាមួយភ្ញៀវម្តងតំលៃចាប់ពី២៥ $ ទៅ ៣០$ ហើយខ្លួនដកយក ១០០០០ រៀល។
ក្រោយពេលសាកសួររួច ស្ត្រីរកស៊ីផ្លូវភេទទាំង៤នាក់ គឺបានបញ្ជូនទៅមន្ទីរសង្គមកិច្ចខេត្ត។ ចំណែកស្ត្រីថៅកែហាងត្រូវបានបញ្ជូនទៅតុលាការ នារសៀលថ្ងៃទី១៣ ខែឧសភានេះ ដោយចោទប្រកាន់ពីបទ «សញ្ចារកម្ម» ៕ (កែសម្រួលដោយ ៖ បុប្ផា)
ចែករំលែកព័តមាននេះ