រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានឲ្យប្រជាពលរដ្ឋខ្មែរឆ្លងដែនខុសច្បាប់ទៅប្រទេសជិតខាងតាមរបៀងនានា ដើម្បីទប់ស្កាត់ការឆ្លងជំងឺកូវីដ១៩ ។
យោងតាមលិខិតរបស់សម្តេច ស ខេង ដាក់ទៅកាន់អភិបាលខេត្តនានាស្តីពីការទប់ស្កាត់ប្រជាពលរដ្ឋខ្មែរកុំឲ្យឆ្លងដែនដោយខុសច្បាប់ចូលទៅប្រទេសជាតិខាងតាមច្រករបៀងនានា ។
សម្តេចបញ្ជាក់ថា«ខ្ញុំសូមជម្រាបជូនលោក លោកជំទាវ ជ្រាបថា នាពេលថ្មីៗនេះតបតាមប្រជាពលរដ្ឋខ្មែរមួយចំនួន ខណៈត្រូវបានមេខ្យល់នាំឆ្លងដែនដោយខុសច្បាប់ចូលទៅក្នុងប្រទេសជិតខាង ពេលដែលប្រទេសជិតខាងទាំងនោះកំពុងដាក់ប្រទេសក្នុងគ្រាអាសន្ន ដើម្បីបង្ការ ទប់ស្កាត់ការរីករាលដាលនៃជំងឺកូវីដ១៩» ។
សម្តេចបន្ថែមថា ចំពោះករណីនេះដើម្បីពង្រឹងនូវការគ្រប់គ្រងការធ្វើដំណើរឆ្លងកាត់ព្រំដែនចេញចូលប្រទេសជិតខាង ការថែរក្សាសន្តិសុខសណ្តាប់ធ្នាប់សាធារណៈ ការពារនូវផលប្រយោជន៍របស់បងប្អូនប្រជាពលរដ្ឋខ្មែរ និងចូលរួមទប់ស្កាត់ការរីករាលដាលនៃជំងឺកូវីដ១៩នៅកម្ពុជា ក្រសួងមហាផ្ទៃសូមណែនាំដល់អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត ត្រូវចាត់ចែងអនុវត្ត នូវវិធានការនានាដូចខាងក្រោម ៖ ត្រូវកោះប្រជុំគណៈបញ្ជាការឯកភាពរដ្ឋបាលខេត្តជាបន្ទាន់ ដើម្បីណែនាំដល់កងកម្លាំងមាន សមត្ថកិច្ចទាំងអស់នៅតាមតំបន់ព្រំដែន ឲ្យចូលរួមសហការគ្នាដាក់ចេញនូវវិធានការ ទប់ស្កាត់ការចេញចូលឆ្លងដែនដោយខុសច្បាប់តាមច្រករបៀងនៅតាមបណ្តោយព្រំដែន ជាមួយប្រទេសជិតខាង។
ត្រូវស្រាវជ្រាវ ស្វែងរក និងតាមចាប់ខ្លួនមេខ្យល់ដែលចលនាអូសទាញប្រជាពលរដ្ឋខ្មែរឲ្យ ឆ្លងដែនដោយខុសច្បាប់ចូលទៅប្រទេសជិតខាងតាមច្រករបៀងនានា។ ក្នុងករណីដែលសមត្ថកិច្ចនៃប្រទេសជិតខាងបានចាប់ឃាត់ខ្លួនបងប្អូនប្រជាពលរដ្ឋខ្មែរដែលបានឆ្លងដែនដោយខុសច្បាប់ចូលទៅប្រទេសជិតខាងតាមច្រករបៀងនានា រដ្ឋបាលខេត្តត្រូវទំនាក់ទំនង និងសម្របសម្រួលជាមួយសមត្ថកិច្ចនៃប្រទេសជិតខាងដែលមានព្រំប្រទល់ជាប់គ្នាឲ្យបានឆាប់ ដើម្បីស្នើឲ្យសមត្ថកិច្ចនៃប្រទេសជិតខាងចាត់បញ្ជូនពួកគាត់វិលត្រឡប់មកកម្ពុជាវិញ និងយកចិត្តទុកដាក់ត្រួតពិនិត្យសុខភាព ការអនុវត្តវិធានការចត្តាឡីស័ក្តិ និងការដឹកជញ្ជូនបងប្អូនទៅកាន់លំនៅឋានរៀងៗខ្លួនឱ្យបានសមស្រប។
បច្ចុប្បន្នប្រទេសជិតខាងនៅបន្តដាក់ប្រទេសក្នុងភាពអាសន្ន ដើម្បីទប់ស្កាត់ការរីករាលដាល នៃជំងឺកូដ១៩ ។ ហេតុនេះរដ្ឋបាលខេត្តត្រូវអប់រំណែនាំ និងផ្សព្វផ្សាយដល់ប្រជាពលរដ្ឋក្នុងមូលដ្ឋានរបស់ខ្លួនកុំឲ្យធ្វើដំណើរទៅកាន់ប្រទេសជិតខាងក្នុងរយៈពេលនេះជាដាច់ខាត ត្រូវ បន្តយកចិត្តទុកដាក់អនុវត្តនូវវិធានការ និងគោលការណ៍ណែនាំនានារបស់រាជរដ្ឋាភិបាលកម្ពុជា និងក្រសួងសុខាភិបាលក្នុងការបង្ការ ទប់ស្កាត់ការរាតត្បាតជំងឺកូវីដ១៩ នៅកម្ពុជាឲ្យទទួលបានប្រសិទ្ធភាពខ្ពស់។
សូមជម្រាបថាការស្នើឲ្យអភិបាលខេត្តជាប់ព្រំដែននេះបន្ទាប់ពីគេសង្កេតឃើញថា មានពលរដ្ឋខ្មែរមួយចំនួននៅព្រំដែនបានលួចឆ្លងដែនដោយខុសច្បាប់តាមរបៀងនានាជាបន្តបន្ទាប់កាលពេលកន្លងមក ៕
ចែករំលែកព័តមាននេះ