រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានលើកឡើងថា ដោយសារជំងឺកូវីដ១៩ បានធ្វើឲ្យសកម្មភាពមួយចំនួនមិនបានសម្រេចតាមការគ្រោងទុក ។
ថ្លែងក្នុងកិច្ចប្រជុំពិភាក្សាពីផែនការសកម្មភាពឆ្នាំ២០២០ របស់អគ្គនាយកដ្ឋានអត្តសញ្ញាណកម្ម នាព្រឹកថ្ងៃទី១៣ ខែឧសភា នៅទីស្ដីការក្រសួងមហាផ្ទៃ សម្ដេចក្រឡាហោម ស ខេង ឧបនាយករដ្ឋមន្ត្រី បានលើកឡើងថាកិច្ចប្រជុំនៅថ្ងៃនេះ គឺជាការបន្តកិច្ចពិភាក្សា ដើម្បីឆ្លងផែនការសកម្មភាពប្រចាំឆ្នាំរបស់អគ្គនាយកដ្ឋានអត្តសញ្ញាណកម្ម បន្ទាប់ពីក្រសួងក៏ទើបតែបានឆ្លង និងអនុម័តផែនការសកម្មភាពប្រចាំឆ្នាំរបស់អគ្គស្នងការដ្ឋាននគរបាលជាតិ និងអគ្គនាយកដ្ឋានមួយចំនួនរួចមកហើយ ដើម្បីជំរុញ និងបង្កើនប្រសិទ្ធភាពក្នុងការចាត់ចែងការងារ និងតួនាទីរបស់អគ្គនីមួយៗ ។
សម្ដេចឧបនាយករដ្ឋមន្ត្រីបានបញ្ជាក់ថា ៖«នៅឆ្នាំ២០២០នេះ ថ្វីដ្បិតថា យើងគ្រប់គ្នាបានដឹងរួចមកហើយនូវការប្រឈមមុខនឹងវិបត្តិជំងឺកូវីដ១៩ ដែលអាចធ្វើឱ្យផែនការសកម្មភាពមួយចំនួនមិនអាចសម្រេចទៅបានតាមការគ្រោងទុក ប៉ុន្តែការដាក់ចេញនូវផែនការជាក់លាក់ គឺជាកិច្ចការដ៏មានសារៈសំខាន់ និងក៏ជាមូលដ្ឋានគ្រឹះសម្រាប់ការរៀបចំផែនការសកម្មភាពឆ្នាំ២០២១ និងឆ្នាំបន្តបន្ទាប់ទៀតដែរ» ។
ពាក់ព័ន្ធនឹងការងារអត្តសញ្ញាណកម្មសម្ដេចក្រឡាហោម បានមានប្រសាសន៍ជំរុញអគ្គនាយកដ្ឋានអត្តសញ្ញាណកម្មបន្តពន្លឿនការឈានទៅបញ្ចប់សេចក្ដីព្រាងច្បាប់ការខិតខំជំរុញការងារអត្តសញ្ញាណកម្មទៅក្នុងសេវាច្រកចេញចូលតែមួយដែលពេលនេះកំពុងអនុវត្តន៍សាកល្បង និងការកសាងប្រព័ន្ធផ្ទុកគ្រប់គ្រងទិន្ន័យ និងធនធានមនុស្ស ។
ជាងនេះទៅទៀត សម្ដេច ស ខេង បញ្ជាក់ថា ផែនការសកម្មភាពឆ្នាំ២០២០ របស់អគ្គនាយក ដ្ឋានអត្តសញ្ញាណកម្មមានសារៈសំខាន់ណាស់ ដើម្បីឲ្យមានភាពជាក់លាក់ ហើយងាយ ស្រួលដល់ការសម្របសម្រួលថវិកា ដើម្បីបម្រើការងារក៏ដូចជា បង្កើនប្រសិទ្ធភាពនៃការចាត់ ចែងការងារនៅក្នុងតួនាទី នៅអគ្គនាយដ្ឋាននីមួយៗ ។
សម្ដេចបន្ដថា រហូតដល់ពេលនេះ បានឆ្លងអនុម័ត ផែនការសកម្មភាពនេះទៅដល់អគ្គនាយ ដ្ឋានមួយ ចំនួនហើយដែរដូចជា អគ្គស្នងការដ្ឋាននគរបាលជាតិបណ្ឌិត្យសភានគរបាលជាតិ អគ្គនាយកដ្ឋានអន្ដោប្រវេសន៍ជាដើម ។ ជាមួយគ្នានោះដែរ សម្ដេចស្នើឲ្យអគ្គនាយកដ្ឋានអត្តសញ្ញាណកម្មត្រូវពន្លឿនការងារនេះបន្ថែមទៀត ៕
ចែករំលែកព័តមាននេះ