បាងកក៖ ចាត់ទុកជាដំនឹងល្អមួយសម្រាប់កម្ពុជា ព្រោះហាងលក់ទំនិញដ៏ល្បីល្បាញរបស់អាមេរិក 7-Eleven ដែលគ្រោងបើកនៅកម្ពុជានៅចុងឆ្នាំ២០២០ នឹងមានបុគ្គលិកខ្មែរជាច្រើនបម្រើការងារនៅហាងទាំងនោះ ជាពិសេសតាមកិច្ចសន្យាទៀតសោតគឺនឹងមានដាក់លក់ផលិតផលខ្មែរឱ្យបាន ៥០ ភាគរយនៅតាមហាងនីមួយៗ ។
ក្រុមហ៊ុន 7-Eleven នៅសហរដ្ឋអាមេរិកបានប្រកាសកាលពីសប្តាហ៍មុនថា ក្រុមហ៊ុនដែលទទួលបានសិទ្ធិអាជីវកម្មលើហាងទំនិញប្រ៊ែន 7-Eleven គឺក្រុមហ៊ុន CP ALL (Cambodia) Co., Ltd. ដែលជាបុត្រសម្ព័ន្ធរបស់ក្រុមហ៊ុន CP ALL Public Company Limited របស់ប្រទេសថៃ។
ជាក់ស្តែងនៅរសៀលថ្ងៃចន្ទ ទី១១ ខែឧសភា កន្លងទៅឯកអគ្គរាជទូតខ្មែរប្រចាំនៅប្រទេសថៃ ឯកឧត្តម អ៊ូក សោភ័ណ បានជួបពិភាក្សាជាមួយលោក Chairoj Tiwatmuncharoen អនុប្រធានជាន់ខ្ពស់ក្រុមហ៊ុន CP ALL Plc. និងជាអគ្គនាយកក្រុមហ៊ុន CP ALL (Cambodia) Co., Ltd អំពីគម្រោងវិនិយោគហាងលក់ទំនិញ 7-Eleven នៅក្នុងប្រទេសកម្ពុជា និង បានស្នើសុំក្រុមហ៊ុនគោរពពាក្យសន្យា «គឺប្រើប្រាស់បុគ្គលិកខ្មែរឱ្យបានច្រើន និងដាក់លក់ផលិតផលខ្មែរឱ្យបាន ៥០%» ។
ជាការឆ្លើយតប លោក Chairoj បានគូសបញ្ជាក់ពីការប្តេជ្ញាចិត្តរបស់ក្រុមហ៊ុន ក្នុងការអនុវត្តពាក្យសន្យាខាងលើ និងបានស្នើសុំស្ថានទូតកម្ពុជា ជួយសម្របសម្រួលផ្តល់ព័ត៌មានអំពីផលិតផលខ្មែរ ជាពិសេសអាហារកែច្នៃ និងអាហារក្រៀម ដើម្បីក្រុមហ៊ុនសិក្សា និងដាក់បញ្ចូលក្នុងបញ្ជីមុខទំនិញសម្រាប់លក់នៅក្នុងសាខាដំបូង ដែលគ្រោងនឹងបើកនៅចុងឆ្នាំនេះ។
គួរបញ្ចាក់ផងដែរ ក្រុមហ៊ុន CP ALL គ្រោងនឹងបើកហាងទំនិញ 7-Eleven នៅចុងឆ្នាំ២០២០ នៅកម្ពុជានិងគ្រោងបើកចម្លោះពី ៧០០ ទៅ ១០០០សាខា នៅទូទាំងប្រទេសកម្ពុជា ក្នុងរយៈពេល៥ឆ្នាំដំបូង៕
ចែករំលែកព័តមាននេះ