ខេត្តត្បូងឃ្មុំ ៖ ក្រុមសង្គ្រោះមេឃពណ៌ខៀវរបស់ប្រទេសចិនបានបើកយុទ្ធនាការចុះបាញ់ថ្នាំសម្លាប់មេរោគកូវីដ-១៩ តាមគោលដៅជាច្រើនកន្លែង ក្នុងក្រុងសួងនិងស្រុកពញាក្រែក កាលពីព្រឹកថ្ងៃទី ១១ឧសភា ឆ្នាំ២០២០ ។ ថ្វីដ្បិតខេត្តត្បូងឃ្មុំមិនទាន់រកឃើញអ្នកជំងឺថ្មីក៏ពិតមែន…
ខេត្តត្បូងឃ្មុំ ៖ ក្រុមសង្គ្រោះមេឃពណ៌ខៀវរបស់ប្រទេសចិនបានបើកយុទ្ធនាការចុះបាញ់ថ្នាំសម្លាប់មេរោគកូវីដ-១៩ តាមគោលដៅជាច្រើនកន្លែង ក្នុងក្រុងសួងនិងស្រុកពញាក្រែក កាលពីព្រឹកថ្ងៃទី ១១ឧសភា ឆ្នាំ២០២០ ។ ថ្វីដ្បិតខេត្តត្បូងឃ្មុំមិនទាន់រកឃើញអ្នកជំងឺថ្មីក៏ពិតមែន តែស្ថាប័នជំនាញសុខាភិបាលអំពាវនាវឱ្យប្រជាពលរដ្ឋត្រូវធ្វើអនាម័យឲ្យបានជាប់ជាប្រចាំផងដែរ ។
លោកវេជ្ជបណ្ឌិតកែវ វណ្ណៈ ប្រធានមន្ទីរសុខាភិបាលខេត្ត បានមានប្រសាសន៍ឲ្យដឹងថា នៅក្នុងខេត្តត្បូងឃ្មុំនាពេលកន្លងមក ប្រជាពលរដ្ឋដែលកើតជំងឺកូវីដ-១៩ មានចំនួន៤នាក់ ប៉ុន្តែពួកគាត់បានជាសះ ស្បើយអស់ហើយ រហូតមកដល់ពេលនេះមិនមានអ្នកកើតថ្មីនោះទេ។ រហូតដល់ព្រឹកថ្ងៃទី១១ ឧសភា ឆ្នាំ២០២០ ក្រុមសង្គ្រោះមេឃពណ៌ខៀវរបស់ប្រទេសចិនបានចុះមកបង្រៀនដល់ក្រុមគ្រូពេទ្យខ្មែរឲ្យចេះបាញ់ថ្នាំសម្លាប់មេរោគនៅតាមទីតាំង ក្នុងនោះរួមមានដូចជាចំណតរថយន្តក្រុងសួង ផ្សារក្រុងសួង និងបានបន្តដំណើរបេសកកម្មទៅបាញ់ថ្នាំសម្លាប់មេរោគនៅព្រះវិហារក្នុងឃុំកោងកាង ស្រុកពញាក្រែក និងបន្តបាញ់ថ្នាំសម្លាប់មេរោគនៅផ្សារស្ទឹង ក្នុងស្រុកពញាក្រែកដែរ ។ នេះជាកាយវិការមនុស្សធម៌របស់មហាមិត្តចិនដែលបានជួយដល់ប្រទេសកម្ពុជាជាបន្តបន្ទាប់។
លោកកេង ប៊ុនណា អភិបាលរងខេត្តត្បូងឃ្មុំ បានមានប្រសាសន៍ឱ្យដឹងដែរថា រដ្ឋាភិបាលចិនបានចាត់ទុកកម្ពុជាគឺជាមិត្តដែកថែប និងបានផ្ដល់ជំនួយមនុស្សធម៌ផ្នែកបរិក្ខារពេទ្យដើម្បីរួមចំណែកប្រយុទ្ធប្រឆាំងជំងឺកូវីដ-១៩យ៉ាងផុលផុស ហើយបានចាត់ឱ្យក្រុមសង្គ្រោះមេឃពណ៌ខៀវរបស់ប្រទេសចិនចុះមកបាញ់ថ្នាំសម្លាប់មេរោគតាមតំបន់ទីប្រជុំជននៅក្នុងទឹកដីខេត្តត្បូងឃ្មុំបានជាច្រើនកន្លែង ។ ជាមួយនោះ លោកក៏សូមឱ្យក្រុមបេសកកម្មរបស់ក្រុមសង្គ្រោះមេឃពណ៌ខៀវរបស់ប្រទេសចិនទទួលបានភាពជោគជ័យ១០០ ភាគរយនៅក្នុងប្រទេសកម្ពុជា ហើយក៏សូមឱ្យចំណងសាមគ្គីភាពរវាងកម្ពុជាចិនកាន់តែស្អិតរមួតបន្ថែមទៀត។
ស្ត្រីជាអាជីវករលក់ត្រីម្នាក់ឈ្មោះសេង ស៊ីមហួរ អាយុ៦១ឆ្នាំ នៅផ្សារក្រុងសួង ប្រាប់ឲ្យដឹងថា គាត់បានប្រកបរបរនេះតាំងពីឆ្នាំ១៩៨១មកម៉្លេះ កាលនោះផ្សារសួងនៅប្រក់ធាងដូងនៅឡើយ ហើយមនុស្សម្នាក៏មិនសូវសំបូរប៉ុន្មានដែរ ប៉ុន្តែមកដល់សព្វថ្ងៃនេះ ផ្សារសួងបានរីកធំជាងមុន និងមានដំបូលប្រក់ស័ង្កសីត្រឹមត្រូវល្អជាងមុន។
ស្ត្រីជាអាជីវករលក់ត្រីខាងលើបានប្រាប់បន្តថា មកដល់ឆ្នាំ២០២០ គ្រាដែលប្រទេសកម្ពុជាបានរកឃើញអ្នកកើតជំងឺកូវីដ១៩ ថ្វីដ្បិតមិនមានចំនួនច្រើនដូចប្រទេសគេ គឺដោយសារតែរាជរដ្ឋាភិបាលបានយកចិត្តទុកដាក់ព្យាបាលបានជាសះស្បើយស្ទើរតែទាំងអស់ ។ ជាមួយនោះ គាត់ក៏បានប្រកាន់ភ្ជាប់នូវការធ្វើអនាម័យ ដោយមានអាល់កុលសម្រាប់លាងដៃ និងម៉ាសសម្រាប់ពាក់ ពេលដែលដើរកន្លែងប្រជុំជន។
ស្ត្រីជាអាជីវករលក់ត្រីខាងលើបានប្រាប់បន្តទៀតថា គាត់ក៏បានប្រាប់ឱ្យសមាជិកក្រុមគ្រួសារត្រូវបង្កើនការប្រុងប្រយ័ត្នកុំឱ្យឆ្លងជម្ងឺកូវីដ១៩ ហើយរហូតមកដល់ព្រឹកថ្ងៃទី១១ ឧសភា ឆ្នាំ២០២០ ក្រុមសង្គ្រោះមេឃពណ៌ខៀវរបស់ប្រទេសចិនបានចុះមកបាញ់ថ្នាំសម្លាប់មេរោគនៅក្នុងផ្សារក្រុងសួងបានធ្វើឲ្យអាជីវករលក់ដូរទាំងអស់ រួមទាំងប្រជាពលរដ្ឋសំដែងនូវក្តីសប្បាយរីករាយ និងមានភាពកក់ក្តៅមួយកម្រិត។នេះបង្ហាញពីការយកចិត្តទុកដាក់របស់អាជ្ញាធរគ្រប់លំដាប់ថ្នាក់ ជួយដល់ប្រជាពលរដ្ឋនៅក្នុងមូលដ្ឋាន៕
ចែករំលែកព័តមាននេះ