ខេត្តស្ទឹងត្រែង ៖ មន្ទីរសុខាភិបាលខេត្តស្ទឹងត្រែងបានចុះពង្រឹងយន្តការលុបបំបាត់ជំងឺគ្រុនចាញ់ តាមរយៈការផ្តល់មុងជ្រលក់ថ្នាំបន្ថែមជូនប្រជាពលរដ្ឋ នៅមុនរដូវភ្លៀងធ្លាក់ដើម្បីការពារមូសខាំ ដែលបណ្តាលឱ្យកើតជំងឺគ្រុនចាញ់ ឬគ្រុនឈាមជាដើម ។ អនុប្រធានមន្ទីរសុខាភិបាលខេត្តស្ទឹងត្រែង និងជាប្រធានអន្តរាគមន៍ប្រយុទ្ធប្រឆាំង…
ខេត្តស្ទឹងត្រែង ៖ មន្ទីរសុខាភិបាលខេត្តស្ទឹងត្រែងបានចុះពង្រឹងយន្តការលុបបំបាត់ជំងឺគ្រុនចាញ់ តាមរយៈការផ្តល់មុងជ្រលក់ថ្នាំបន្ថែមជូនប្រជាពលរដ្ឋ នៅមុនរដូវភ្លៀងធ្លាក់ដើម្បីការពារមូសខាំ ដែលបណ្តាលឱ្យកើតជំងឺគ្រុនចាញ់ ឬគ្រុនឈាមជាដើម ។
អនុប្រធានមន្ទីរសុខាភិបាលខេត្តស្ទឹងត្រែង និងជាប្រធានអន្តរាគមន៍ប្រយុទ្ធប្រឆាំង និងជម្ងឺឆ្លង លោកវេជ្ជបណ្ឌិត ទន វុទ្ធី បានបញ្ជាក់ថា មន្ទីរសុខាភិបាលបានផ្តល់មុងជ្រលក់ថ្នាំជូនប្រជាពលរដ្ឋនៅតាមភូមិ ឃុំ បន្ថែមនៅមុនពេលរដូវភ្លៀងធ្លាក់ ។
លោកវេជ្ជបណ្ឌិតបានបន្តទៀតថា នេះជាយន្តការបង្ការកុំឲ្យកើតមានជំងឺឆ្លង និងណែនាំពួកគាត់ឲ្យបង្កើនស្មារតីចូលរួមលប់បំបាត់ជំងឺគ្រុនចាញ់ ទទួលបានជោគជ័យតាមផែនការយុទ្ធសាស្ត្ររបស់ក្រសួងសុខាភិបាលនៅឆ្នាំ២០២៥ ដើម្បីលប់បំបាត់ជម្ងឺគ្រុនចាញ់គ្រប់សណ្ឋានធ្វើឱ្យ (កម្ពុជាគ្មានអ្នកបាត់បង់ជីវិតដោយជម្ងឺគ្រុនចាញ់)។
លោកកែវ ប៊ុនឈឿន មេភូមិហាងខូបាន បញ្ជាក់ថា កិច្ចការងារបង្ការនេះ យើងសង្កេតឃើញមានមន្ត្រីមណ្ឌលសុខភាពសហការជាមួយមន្ត្រីសុខភាពភូមិ ចុះស្រង់ស្ថិតិតាមគ្រួសារសាជាថ្មី ដើម្បីផ្តល់មុងបន្ថែម ព្រោះនៅតាមគ្រួសារខ្លះមានសមាជិកកើនឡើង ខ្លះបំបែកគ្រួសារ និងខ្លះទៀតមុងចាស់ខូចត្រូវផ្លាសប្តូរ។
លោកមេភូមិហាងខូបាន អះអាងបន្តថា នេះជាយុទ្ធសាស្ត្រដ៏មានប្រសិទ្ធភាព ព្រោះប្រជាពលរដ្ឋមួយចំនួនរស់នៅទីជនបទមានករណីប្រឈមខ្លាំងទៅនឹងការកើតជម្ងឺគ្រុនចាញ់ និងគ្រុនឈាម ហើយបងប្អូនប្រជាពលរដ្ឋយើងពេលមានអាការៈក្តៅខ្លួន ត្រូវរួសរាន់មកកាន់មណ្ឌលសុខភាព។
ស្រី្តម្នាក់ឈ្មោះ វា សុំលីន តំណាងប្រជាពលរដ្ឋបានអះអាងថា ចាប់តាំងពីឆ្នាំ២០១៣មក មន្ទីរសុខាភិបាល ខេត្តរៀបចំឲ្យមានអ្នកស្ម័គ្រចិត្តភូមិជួយអប់រំប្រជាពលរដ្ឋចេះថែទាំសុខភាពខ្លួនឯង កាត់បន្ថយជំនឿអរូបិយបានច្រើន ហើយបច្ចុប្បន្ននៅពេលឈឺថ្កាត់ ពួកគាត់មករកសេវាសុខភាពបានត្រឹមត្រូវនិងបាននាំ គ្នាដេកក្នុងមុងជ្រលក់ថ្នាំជាប្រចាំផងដែរ។
សូមបញ្ជាក់ថា ខេត្តស្ទឹងត្រែងមានភូមិចំនួន១២៨-ឃុំចំនួន៣០ សង្កាត់ចំនួន៤-ក្រុង១ -ស្រុក៥ ហើយបច្ចុប្បន្នមានប្រជាពលរដ្ឋរស់នៅ៣៤.៦២៧គ្រួសារ-ស្មើនិងចំនួនមនុស្ស១៥៩.៥៦៥នាក់៕ (កែសម្រួលដោយ ៖ ធីតា)
ចែករំលែកព័តមាននេះ