ប្រទេសដាណឺម៉ាក ៖ ក្របខណ្ឌកំពូលដាណឺម៉ាក Superliga នឹងចាប់ផ្តើមសកម្មភាពប្រកួតប្រជែងរដូវកាលនេះឡើងវិញ នៅថ្ងៃទី ២៨ ខែ ឧសភា បន្ទាប់ពីត្រូវផ្អាកអស់រយៈពេល…
ប្រទេសដាណឺម៉ាក ៖ ក្របខណ្ឌកំពូលដាណឺម៉ាក Superliga នឹងចាប់ផ្តើមសកម្មភាពប្រកួតប្រជែងរដូវកាលនេះឡើងវិញ នៅថ្ងៃទី ២៨ ខែ ឧសភា បន្ទាប់ពីត្រូវផ្អាកអស់រយៈពេល ២ខែកន្លងមក ដោយសារការផ្ទុះឡើងនៃវីរុសកូវីដ-១៩ ក្នុងប្រទេសមួយនេះ ។
កាលពីថ្ងៃច័ន្ទរដ្ឋាភិបាលដាណឺម៉ាក បានឈានចូលគោលការណ៍ដំណាក់កាលទី២ នៃការបន្ធូរបន្ថយច្បាប់ស្តីពីការចាក់សោរប្រទេសអំឡុងពេលមានវិបត្តិនេះ ។
ដំណឹងនេះមានន័យថាក្របខណ្ឌ Superliga នឹងក្លាយជាលីគបាល់ទាត់អាជីពទី២ក្នុងទ្វីបអឺរ៉ុប ដែលចាប់ផ្តើមការប្រកួតប្រជែងឡើងវិញក្នុងខែនេះ បន្ទាប់ពីក្របខណ្ឌ Bundesliga និង Bundesliga 2 របស់អាល្លឺម៉ង់ដែលនឹងចាប់ផ្តើមនៅថ្ងៃទី១៦ ខែឧសភា ខាងមុខនេះ ។
សមាគមលីគបាល់ទាត់ដាណឺម៉ាក បានបញ្ជាក់នៅក្នុងសេចក្តីថ្លែងការណ៍មួយកាលពីថ្ងៃច័ន្ទថា រដូវកាលនេះនឹងចាប់ផ្តើមឡើងវិញ ដោយគ្មានអ្នកគាំទ្រនៅក្នុងកីឡាដ្ឋាន ហើយគេរំពឹងថាយុទ្ធនាការនេះ នឹងបញ្ចប់នៅថ្ងៃទី ២៩ ខែ កក្កដា ។
ក្រឡេកមកកាន់តារាងពិន្ទុវិញ ក្រុម Midtjylland កំពុងឈរនៅកំពូលតារាងដោយមាន ៦២ពិន្ទុដាច់ក្រុមលេខ២ Copenhagen ចំនួន ១២ ពិន្ទុមុនពេលលីគត្រូវបានផ្អាកដោយសារការរាតត្បាតនៃវីរុសកូវីដ-១៩ ។
ប្រទេសដាណឺម៉ាក គិតត្រឹមថ្ងៃទី ១២ ខែ ឧសភា មានអ្នកឆ្លងវីរុសកូវីដ-១៩ចំនួន ១០,៥១៣ករណី ដែលបណ្តាលឲ្យមានមនុស្សស្លាប់សរុបចំនួន ៥៣៣នាក់ ស្របពេលដែលអ្នកជាសះស្បើយមានចំនួន ៨,៣២៨នាក់ ៕ (ដកស្រង់ចេញពី Eurosports)
ចែករំលែកព័តមាននេះ