អតីតតារាចម្រៀងដ៏ល្បីល្បាញនាង ទូច ស៊ុននិច បានសម្តែងក្តីរំភើបយ៉ាងខ្លាំង ត្បិតនាងបានទទួលសារជូនពរពីប្រិយមិត្តគាំទ្រឲ្យនាងឆាប់ជាសះស្បើយពីជំងឺ ក្រោយពេលដែលនាងបានជួបរឿងអកុសល្យវាយប្រហារដោយខ្មាន់កាំភ្លើង បណ្តាលឲ្យនាងក្លាយជាជនពិកាសម្រាកតែនៅលើគ្រែអស់រយៈពេលជាច្រើនឆ្នាំមកនេះ។
យ៉ាងណា បើទោះបីជាកំពុងសម្រាលព្យាបាលជំងឺនៅឯក្រៅប្រទេសក៏ដោយ ក៏នាង ទូច ស៊ុននិច ក៏នៅតែផ្សារភ្ជាប់ជីវិតជាមួយនឹងប្រិយមិត្តគាំទ្រនៅស្រុកខ្មែរតាមរយៈការបង្កើតជា Channel YouTube ផ្ទាល់ខ្លួន ដើម្បីបង្ហោះបទចម្រៀងរបស់នាង និងជាការឆ្លើយតបជាមួយមហាជនដែលតែងតែចង់ដឹងពីសុខទុក្ខរបស់នាង។
ជាថ្មីម្តងទៀត អតីតតារាចម្រៀងជួរមុខរូបនេះក៏បានផ្ញើជាសម្លេងមកកាន់អ្នកគាំទ្រ ដោយបានសម្តែងនូវក្តីរំភើបយ៉ាងខ្លាំង ក្នុងពេលដែលនាងទទួលបានសារជូនពរយ៉ាងច្រើនពីប្រិយមិត្តដែលធ្លាប់គាំទ្រនូវទឹកដមសំនៀងរបស់នាង ក្នុងពេលដែលសារជូនពរនេះ បានធ្វើឲ្យនាងកាន់តែមានភាពរឹងមាំថែមមួយកម្រិតទៀត ក្នុងការតស៊ូជម្នះព្យាបាលជំងឺរបស់នាង។
តាមរយៈសារដែលនាង ទូច ស៊ុននិច បានបង្ហោះតាម Channel YouTube របស់នាងកាលពីពេលថ្មីៗនេះបានឲ្យដឹងថា រហូតមកទល់ពេលនេះ នាងនៅតែមានការនឹករលឹកយ៉ាងខ្លាំងមកដល់បងប្អូន និងប្រិយមិត្តគាំទ្រ ហើយក៏សូមអរគុណនូវរាល់ការខំមិនមក Channel YouTube របស់នាង ដើម្បីសួរសុខទុក្ខដល់រូបនាងជារៀងរហូតមក។
នាងបញ្ជាក់ថា នាងពិតជារំភើបយ៉ាងខ្លាំងនូវពេលដែលនាងបានទទួលនូវសារជូនពរយ៉ាងច្រើនពីបងប្អូនទាំងក្នុង និងក្រៅប្រទេសដែលបានផ្ញើសារសម្តែងក្តីស្រឡាញ់ និងការនឹករលឹកមកដល់រូបនាង ជាពិសេសនោះគឺបងប្អូនតែងតែសុខទុក្ខ និងជូនពរដល់រូបនាងឲ្យបានឆាប់ជាសះស្បើយ និងបានដើររួចឡើងវិញ។
បើតាមអ្នកនាង ទូច ស៊ុននិច ដោយសារមួយរយៈនេះ នាងហាក់មិនមានការខកខានមិនបានឆ្លើយតបឲ្យទាន់ពេលវេលាចំពោះប្រិយមិត្តទាំងអស់ដែលបានផ្ញើសារមករូបនាង ដោយសារតែនាងមានបញ្ហាផ្នែកបច្ចេកទេសលើកុំព្យូទ័រ ប៉ុន្តែពេលនេះបញ្ហានេះត្រូវបានដោះស្រាយហើយ នាងក៏បានថ្លែងអំណរគុណសម្រាប់ការគាំទ្រមកលើ Channel YouTube របស់នាង។
គួរំលឹកថា អតីតតារាសម្តែងដ៏ល្បីល្បាញនាង ទូច ស៊ុននិច ទូច ស៊ុននិច បានធ្លាក់ខ្លួនពិការសម្រាកតែលើគ្រែក្នុងផ្ទះរបស់នាងក្នុងទីក្រុង Sacramento នៃរដ្ឋ California សហរដ្ឋអាមេរិក កាលពីថ្ងៃទី២១ ខែតុលា ឆ្នាំ២០០៣ ខណៈដែលនាងកំពុងដើរចេញពីហាងទំនិញមួយកន្លែងជាមួយម្ដាយរបស់នាង។
បើទោះបីជាធ្លាក់ខ្លួនពិកា និងកំពុងសម្រាកព្យាបាលនៅបរទេសក៏ដោយ ប៉ុន្តែ ទូច ស៊ុននិច ធ្លាប់បានអះអាងថា នាងនៅតែមានអារម្មណ៍នឹកទៅដល់ស្រុកខ្មែរជានិច្ច ហើយនាងនៅតែមានមហិច្ឆតាចង់ធ្វើជាអ្នកចម្រៀង និងជាគ្រូបង្រៀននៅស្រុកខ្មែរ ដែលជាអាជីពរបស់នាងពីមុនមក ដែលពេលខ្លះនាងអផ្សុកក៏ច្រៀងលេងម្នាក់ឯងនៅលើគ្រែក៏មាន។
អតីតកំពូលតារាចម្រៀង និងជាសាស្ត្រាចារ្យអក្សរសាស្ត្រខ្មែរដ៏ល្បីល្បាញនាង ទូច ស៊ុននិច ត្រូវបានគេទទួលស្គាល់ថា ជាតារាដែលមានសម្លេងពីរោះលំដាប់ជួរមុខ និងរូបសម្រស់ស្រស់ស្អាតបែបធម្មជាតិ លើសពីនេះទៅទៀត នាងគឺជាតារាម្នាក់តែងប្រកាន់ប្រពៃណីខ្ជាប់ខ្ជួន នូវការស្លៀកពាក់តាមបែបប្រពៃណីខ្មែរ មិនដែលស្លៀកពាក់សិចស៊ីម្តងណាឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ