ខេត្តប៉ៃលិន ៖ មានប្រសាសន៍លើកឡើងក្នុងពិធីសំណេះសំណាល និងចែកពូជកង្កែបដល់កសិករ ដើម្បីបណ្តុំអាជីវកម្មវារីវប្បកម្មរបស់មន្ទីរកសិកម្មខេត្តប៉ៃលិន កាលពីថ្ងៃទី១១ ឧសភា ២០២០ នៅភូមិបរតាំងស៊ូ សង្កាត់បរយ៉ាខា…
ខេត្តប៉ៃលិន ៖ មានប្រសាសន៍លើកឡើងក្នុងពិធីសំណេះសំណាល និងចែកពូជកង្កែបដល់កសិករ ដើម្បីបណ្តុំអាជីវកម្មវារីវប្បកម្មរបស់មន្ទីរកសិកម្មខេត្តប៉ៃលិន កាលពីថ្ងៃទី១១ ឧសភា ២០២០ នៅភូមិបរតាំងស៊ូ សង្កាត់បរយ៉ាខា ក្រុងប៉ៃលិន ខេត្តប៉ៃលិន លោកផាន់ ចាន់ធុល អភិបាលខេត្ត បានជម្រុញឱ្យប្រជាពលរដ្ឋខិតខំចិញ្ចឹមសត្វ និងដាំដំណាំតាមគេហដ្ឋាន ដើម្បីលើកកម្ពស់ជីវភាពគ្រួសារឱ្យល្អប្រសើរឡើង ស្របពេលជំងឺកូវីដ១៩ កំពុងកើតមាន ដែលជាបញ្ហាចម្បងមួយបណ្តាលឱ្យប្រជាពលរដ្ឋមិនអាចចេញទៅរកស៊ីប្រកបរបរចិញ្ចឹមជីវិត ហើយជួបបញ្ហាខ្វះខាតក្នុងជីវភាពប្រចាំថ្ងៃ។
លោកអភិបាលខេត្តបានមានប្រសាសន៍លើកឡើងថា ដើម្បីសម្រេចគោលដៅលើការចិញ្ចឹមកង្កែបនេះ កសិករត្រូវមានកិច្ចសហការល្អជាក្រុមបណ្តុំតាមមូលដ្ឋាននីមួយៗ និងរៀបចំផែនការផលិតឱ្យត្រូវតាមរដូវកាល និងតម្រូវការទីផ្សារផងដែរ ។ លើសពីនោះ កសិករត្រូវតែមានឆន្ទៈលើការចិញ្ចឹម និងថែទាំឱ្យបានត្រឹមត្រូវ តាមការណែនាំ និងលក្ខណៈបច្ចេកទេស ។
នៅក្នុងឱកាសនោះផងដែរ លោក ផាន់ ចាន់ធុល ក៏បានផ្តាំផ្ញើដល់ប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ចំពោះសុខភាព ដោយរដូវនេះមានភ្លៀងធ្លាក់ច្រើន ដែលងាយបង្កឱ្យកើតជម្ងឺផ្សេងៗ ជាពិសេសត្រូវបានការប្រុងប្រយ័ត្ន ចំពោះជម្ងឺកូវីត១៩ និងត្រូវចូលរួមទប់ស្កាត់ការរីករាលដាល ហើយបើមានបញ្ហាអ្វីកើតឡើងក្នុងមូលដ្ឋាន ត្រូវរាយការណ៍ទៅមេឃុំ ឬចៅសង្កាត់ ដែលនៅជិត ដើម្បីអោយក្រុមការងារចុះជួយឱ្យបានឆាប់រហ័ស និងទាន់ពេលវេលា ។
បើតាមរបាយការណ៍របស់លោក សាយ សុផាត ប្រធានមន្ទីរកសិកម្មខេត្តបានអោយដឹងថា បណ្តុំអាជីវកម្មផលិតកម្មចិញ្ចឹមត្រី កង្កែប ត្រូវបានអនុវត្តដោយអង្កការ EPDO និង PDAFF ចំនួន ១៧បណ្តុំ រួមមាន៖ (ត្រី៥បណ្តុំ និងកង្កែប ១២បណ្តុំ) ស្មើនឹងគ្រួសារកសិករ ៤៤៧នាក់ ស្រី១១៧នាក់ ហើយអង្គការ EPDO ដែលកំពុងអនុវត្តន៍ គឺបានគាំទ្រ កសិករគំរូចំនួន៨ក្រុម មានសមាជិកសរុបចំនួន ២៣៦នាក់ (ស្រី៨២នាក់) ៕ (កែសម្រួលដោយ ៖ ធីតា)
ចែករំលែកព័តមាននេះ