ខេត្តកំពង់ស្ពឺ ៖ បើតាមសេចក្តីរាយការណ៍បានឱ្យដឹងថា ក្មេងប្រុសម្នាក់ត្រូវក្រុមគ្រួសារបញ្ជូនទៅកាន់មន្ទីរពេទ្យធ្វើការសង្គ្រោះ បន្ទាប់ពីបានរត់លេងនៅក្នុងរោងការ ក៏ស្រាប់តែទៅប៉ះនឹងអ្នកលើកម្ហូប បណ្តាលឱ្យកំពប់រលាកទឹកសម្លដែលកំពុងក្តៅស្រោចលើខ្លួនតែម្តង ហើយដោយអាការៈធ្ងន់ធ្ងរពេក ក្រុមគ្រូពេទ្យខេត្តក៏បញ្ជូនបន្តទៅកាន់មន្ទីរពេទ្យនៅភ្នំពេញវិញ ដើម្បីសង្គ្រោះបន្ត។ ហេតុការណ៍នេះកើតឡើងកាលពីម៉ោង៨និង30នាទី ថ្ងៃទី11 ខែឧសភា ឆ្នាំ2020 នៅចំណុចភូមិសំបួរ សង្កាត់ច្បារមន ក្រុងច្បារមន ខេត្តកំពង់ស្ពឺ។
សេចក្តីរាយការណ៍បន្តថា ក្មេងប្រុសរងគ្រោះខាងលើនេះមានឈ្មោះ ហេង គឹមឆេង អាយុ ៤ឆ្នាំ រស់នៅជាមួយឪពុកម្ដាយក្នុងភូមិ-ឃុំកើតហេតុខាងលើ។
បើតាមសាច់ញាតិក្មេងរងគ្រោះបានថា មុនកើតហេតុ ក្រុមគ្រួសាររបស់គាត់បានទៅចូលរួមនៅក្នុងពិធីមង្គលការមួយ ក្នុងភូមិសំបួរ សង្កាត់ច្បារមន ពេលដែលក្រុមគ្រួសារកំពុងតែអង្គុយហូបធម្មតា ក្មេងប្រុសរងគ្រោះបានរត់លេងនៅក្នុងរោងចុះឡើងចុះឡើង។
ប្រភពដដែលបន្តថា ស្របពេលដែលក្មេងប្រុសរងគ្រោះកំពុងតែរត់លេងសប្បាយនោះ ក៏មានអ្នកលើកម្ហូបបានលើកសម្លដែលកំពុងតេក្តៅ ដើរមកដាក់នៅតុរបស់ភ្ញៀវ ប៉ុន្តែគាប់ជួននោះ ក្មេងប្រុសរងគ្រោះក៏រត់ទៅបុកប៉ះអ្នកលើកម្ហូប បណ្ដាលឲ្យកំពប់សម្លស្រោចពីលើខ្លួនក្មេងប្រុសរងគ្រោះតែម្តង បណ្តាលឱ្យរលាកពេញខ្លួនបែបនេះទៅ។
ក្រោយពេលកើតហេតុ ឪពុកម្ដាយបានបញ្ជូនក្មេងរងគ្រោះ មកកាន់មន្ទីរពេទ្យខេត្ត ដើម្បី ធ្វើការជួយសង្គ្រោះ ប៉ុន្តែក្រោយពេលធ្វើការសង្គ្រោះបឋម និងពិនិត្យរួច ឃើញថា អាការៈរបស់ក្មេងរងគ្រោះហាក់ធ្ងន់ធ្ងរ ពេលនោះក៏ក្រុមគ្រូពេទ្យក៏សម្រេចចិត្តបញ្ជូនទៅកាន់រាជធានីភ្នំពេញ និងបានណែនាំឱ្យឪពុកម្ដាយ និងគ្រួសារនាំក្មេងប្រុសរងគ្រោះទៅកាន់មន្ទីរពេទ្យគន្ធបុប្ផាផងដែរ។
ស្របពេលនោះ ក្រុមគ្រូពេទ្យបានសំណូមពរដល់ឪពុកម្ដាយចូលរួមក្នុងពិធីមង្គលការ ឬពិធីអ្វីផ្សេងៗ បើមានកូនតូចៗយកទៅជាមួយ សូមមានការប្រុងប្រយ័ត្ន និងមើលថែឱ្យបានដិតដល់ផង ចៀសវាងជួបគ្រោះអកុសលដូចក្មេងប្រុសរងគ្រោះរូបនេះ៕ (កែសម្រួលដោយ ៖ បុប្ផា)
ចែករំលែកព័តមាននេះ