ខេត្តកំពង់ចាម ៖ ទូកអូសយ៉ាងកាវ១គ្រឿងបានបើកបំបុកទូកដឹកភ្ញៀវចេញពីហូបការនៅកណ្ដាលទន្លេមេគង្គ ត្រង់ចំណុចឃុំរំចេក និងឃុំកោះសំរោង ស្ថិតក្នុងស្រុកកំពង់សៀម កាលពីវេលាម៉ោងជាង១០យប់ថ្ងៃទី១០ ឧសភា ២០២០ បណ្ដាលឱ្យលិចទូកបាត់ ក្នុងនោះមនុស្ស៧នាក់បានហែលរួច និងបាត់ខ្លួនចំនួន៣នាក់ ចំណែកទូកបង្កបានបើកគេចបាត់ស្រមោល លុះមកដល់ព្រឹកថ្ងៃទី១១ ឧសភា បានរកឃើញសពជនរងគ្រោះម្នាក់អណ្តែតនៅចំណុចឃុំរអាង ស្រុកកំពង់សៀម ខណៈជនរងគ្រោះចំនួន២នាក់ទៀតដែលបាត់ខ្លួនរួមជាមួយទូកដែលលិចបាត់ នៅមិនទាន់រកឃើញនៅឡើយទេ ។
តាមប្រភពពីអាជ្ញាធរមូលដ្ឋានបានឲ្យដឹងថា ជនរងគ្រោះចំនួន៣នាក់ដែលបាត់បង់ជីវិតនោះរួមមាន ១-ឈ្មោះរិន ជា ភេទប្រុស អាយុ៥៣ឆ្នាំ ២-ឈ្មោះធីម ឋាន ភេទប្រុស អាយុ៥២ឆ្នាំ និង៣-ឈ្មោះឡាង ម៉េងហ៊ត់ ភេទប្រុស អាយុ៣៣ឆ្នាំ រស់នៅភូមិទី២ ឃុំកោះសំរោង ។
តាមប្រភពពីសមត្ថកិច្ចបានប្រាប់ឲ្យដឹងថា មុនពេលកើតហេតុ ប្រជាពលរដ្ឋនៅឃុំកោះសំរោងបាននាំគ្នាមកចូលរួមមង្គលការគេនៅឃុំរំចេក ស្រុកកំពង់សៀម កាលពីល្ងាចថ្ងៃទី១០ ឧសភា លុះដល់វេលាម៉ោងជាង១០យប់ថ្ងៃដដែលក៏បាននាំគ្នាជិះទូកម៉ាស៊ីនមួយគ្រឿង ដើម្បីឆ្លងទន្លេទៅកាន់លំនៅដ្ឋានរបស់ខ្លួនវិញ ស្រាប់តែបានត្រឹមពាក់កណ្ដាលទន្លេ ក៏ជួបហេតុការណ៍គ្រោះថ្នាក់ចរាចរណ៍ផ្លូវទឹកតែម្តង ។
តាមប្រភពពីសមត្ថកិច្ចបានប្រាប់ឱ្យដឹងបន្តថា មុននឹងហេតុការណ៍បែបនេះកើតឡើង គេបានឃើញក្រុមអ្នករងគ្រោះដែលកំពុងជិះទូកម៉ាស៊ីនមួយគ្រឿងត្រូវបានទូកអូសយ៉ាងកាវមួយគ្រឿងបញ្ចាំងភ្លើងហ្វាដាក់រួចក៏បានបើកមកបំបុកទូកក្រុមអ្នករងគ្រោះជាហេតុបណ្ដាលឱ្យលិចទូកបាត់នៅកណ្តាលទន្លេនាពេលយប់ កើតហេតុនោះ ហើយបាត់ខ្លួនមនុស្សចំនួន៣នាក់ ដែលគេសន្និដ្ឋានថាបានបាត់បង់ជីវិតដោយសារលង់ទឹកទន្លេ ចំណែកមនុស្ស៧នាក់ផ្សេងទៀតបានរួចផុតពីគ្រោះថ្នាក់ ព្រោះចេះហែលទឹកមកច្រាំងទន្លេ រួចក៏រាយការណ៍ប្រាប់សមត្ថកិច្ចមូលដ្ឋានឲ្យបានដឹងពីហេតុការណ៍ខាងលើដែលបានកើតឡើង។
តាមប្រភពពីសមត្ថកិច្ចបានប្រាប់ឱ្យដឹងបន្តទៀតថា សពជនរងគ្រោះម្នាក់ដែលបានរកឃើញ ត្រូវបានសាច់ញាតិមកទទួលយកទៅធ្វើបុណ្យតាមប្រពៃណី រហូតមកដល់រសៀលថ្ងៃទី១១ ឧសភា ទូកដែលលិចបាត់កណ្តាលទន្លេនោះនៅមិនទាន់បានរកឃើញនៅឡើយទេ រួមនឹងជនរងគ្រោះចំនួន២នាក់ទៀត។
ក្រោយពីទទួលបញ្ជាពីលោកឧត្ដមសេនីយ៍ទោឯម កុសល ស្នងការនគរបាលខេត្ត បានចាត់អោយលោកវរសេនី យ៍ឯក ប៉ាន់ ដន អធិការនគរ បាលស្រុកកំពង់សៀមដឹកនាំមន្ត្រីក្រោមឱវាទចុះធ្វើការស្រាវជ្រាវលើករណីខាងលើ តែមិនទាន់មានតម្រុយពីទូកបង្កនោះនៅទីណានៅឡើយទេ។
លោកឧត្តមសេនីយ៍ត្រីសោម រស់ ស្នងការរងនគរបាលខេត្តទទួលផែនសណ្ដាប់ធ្នាប់បានឱ្យដឹងដែរថា ចំពោះករណីខាងលើ មិនដឹងថាតើជាករណីគ្រោះថ្នាក់ចរាចរណ៍ផ្លូវទឹក ឬក៏ជាករណីអ្វីឲ្យបានច្បាស់លាស់នៅឡើយទេ ។ ជាមួយនោះលោកឧត្តមសេនីយ៍ស្នងការក៏បានឲ្យកម្លាំងសមត្ថកិច្ចរួមមាននគរបាលចរាចរណ៍ផ្លូវទឹកនគរបាលព្រហ្មទណ្ឌចុះធ្វើការស៊ើបអង្កេតជុំវិញករណីខាងលើនេះបន្តទៀត ដើម្បីរកមូលហេតុពិត ៕ (កែសម្រួលដោយ ៖ ធីតា)
ចែករំលែកព័តមាននេះ