ប្រទេសឥណ្ឌូណេស៊ី ៖ ក្រសួងសុខាភិបាលឥណ្ឌូណេស៊ីរាយការណ៍នាថ្ងៃទី១០ ឧសភា ថា
ឥណ្ឌូណេសីុកត់សម្គាល់ឃើញអ្នកឆ្លងវីរុសCOVID-19 ថ្មី៣៨៧នាក់ទៀតនាំឲ្យចំនួនអ្នក
ឆ្លងសរុបក្នុងប្រទេសនោះឡើងដល់១៤.០៣២នាក់ ។
ឥណ្ឌូណេស៊ីជាប្រទេសមានប្រជាជនច្រើនទី៤លើពិភពលោកជាមួយប្រជាជនជិត២៧០លាននាក់ក៏រាយការណ៍ពីមនុស្សស្លាប់ថ្មីដោយសារវីរុស១៤នាក់ទៀតរយៈពេល២៤ម៉ោងចុងក្រោយនេះនាំឲ្យចំនួនអ្នកស្លាប់សរុបឡើងដល់៩៧៣នាក់ ប៉ុន្តែយោងតាមបណ្ដាអ្នកសិក្សាពីជំងឹឆ្លងថា ចំនួនអ្នកឆ្លងអាចវាយតម្លៃទាប មកពីចំនួននៃការធ្វើតេស្តទាប ។ អ្នកទទួលខុសត្រូវម្នាក់នៃក្រសួងសុខាភិបាលឥណ្ឌូណេស៊ី លោកACMAD YURIANTO អះអាងថា មនុស្សប្រមាណជា១១៣.៤៥២នាក់ត្រូវបានធ្វើតេស្ត ។
ថៃមានអ្នកឆ្លងថ្មីតែ៥នាក់
ប្រទេសថៃប្រកាសនាថ្ងៃទី១០ ឧសភា ថា មានអ្នកឆ្លងវីរុសថ្មី៥នាក់ក្នុងប្រទេសនេះ តែពុំមាន
អ្នកស្លាប់ម្នាក់ណាថែមទៀតឡើយ ។ បែបនេះនាំឲ្យចំនួនសរុបនៃអ្នកឆ្លងឡើងដល់៣.០០៩នាក់ហើយមនុស្ស៥៦នាក់ស្លាប់ចាប់តាំងពីខែមករាមក ។
លោកតាវីស៊ីន វីសានុយូធីន អ្នកនាំពាក្យមជ្ឈមណ្ឌលគ្រប់គ្រងសភាពការណ៍វីរុសCOVID-19 បញ្ជាក់ថា មនុស្ស៤នាក់ទៀតបានឆ្លងវីរុសក្នុងខេត្តភូកេតជាតំបន់ទេសចរណ៍សំខាន់មួយរបស់ប្រទេស ។ ក្នុងចំណោមអ្នកឆ្លងថ្មីទាំង៥នាក់ ២នាក់ទាក់ទិនអ្នកឆ្លងដែលមានស្រាប់និង៣នាក់ជាអ្នកដំណើរអន្តរជាតិ ។
ការចុះថយនៃចំនួនអ្នកឆ្លងថ្មីប្រចាំថ្ងៃនាំឲ្យអាជ្ញាធរសម្រាលក្នុងសប្ដាហ៍នេះ វិធានការពាក់កណ្ដាលបង្ខាំងមនុស្សមិនឲ្យចេញក្រៅ ដែលមានជាធរមានចាប់តាំងពីដំណាច់ខែមីនាមក ដោយអនុញ្ញាតជាពិសេសឲ្យបើកពាណិជ្ជកម្មមួយចំនួនវិញ ក្នុងលក្ខខណ្ឌសុខាភិបាលម៉ឺងម៉ាត់បំផុត និងដោយគោរពគោលការណ៍នៅឃ្លាតពីគ្នា ។
រុស្ស៊ីប្រទេសទី៥ដែលអ្នកឆ្លងមានលើសពី២សែននាក់
ប្រទេសរុស្ស៊ីនាថ្ងៃទី១០ ឧសភា បានក្លាយជាប្រទេសទី៥លើពិភពលោក ដែលប្រកាសជា
ផ្លូវការពីចំនួនអ្នកឆ្លងវីរុសមានលើសពី២០០.០០០នាក់ ជាតួលេខនៃការឆ្លងកើនទ្វេដងក្នុងរយៈ
ពេលតែ១០ថ្ងៃ ។
មជ្ឈមណ្ឌលគ្រប់គ្រងវិបត្តិរុស្ស៊ីបានបញ្ជាក់ថា មានអ្នកឆ្លងថ្មី១១.០១២នាក់រយៈពេល២៤ម៉ោងចុងក្រោយនេះទល់នឹង១០.៨១៧នាក់នាថ្ងៃទី៩ ឧសភា នាំឲ្យចំនួនអ្នកឆ្លងសរុបឡើងដល់ ២០៩.៦៨៨នាក់ ។ ក្រៅពីអ្នកឆ្លងថ្មីក្នុងប្រទេសនេះ មានអ្នកស្លាប់ថ្មី៨៨នាក់ទៀតនាំឲ្យចំនួនអ្នកស្លាប់សរុបឡើងដល់១.៩១៥នាក់នៅរុស្ស៊ីចាប់តាំងពីមានការឆ្លងមក ។
រុស្ស៊ីនាថ្ងៃទី៧ឧសភាចំនួនអ្នកឆ្លងវីរុស មានលើសពីប្រទេសបារាំងនិងអាល្លឹម៉ង់ រួចប្រទេសនោះពេលនេះក្លាយជាប្រទេសរងការប៉ះពាល់ខ្លាំងជាងគេលើពិភពលោក បន្ទាប់ពីសហរដ្ឋអាមេរិក អេស្ប៉ាញ អ៊ីតាលី និងអង់គ្លេស ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ