រាជធានីភ្នំពេញ ៖ អតីតបុគ្គលិករបស់សណ្ឋាគារ THE GREAT DUKE (អតីតសណ្ឋាគារ អាំងទែរកុងទីណង់តាល់) ប្រុសស្រីចំនួន៤៦នាក់ បាននាំគ្នាធ្វើការតវ៉ាបិទកំណាត់ផ្លូវម៉ៅសេទុង…
រាជធានីភ្នំពេញ ៖ អតីតបុគ្គលិករបស់សណ្ឋាគារ THE GREAT DUKE (អតីតសណ្ឋាគារ អាំងទែរកុងទីណង់តាល់) ប្រុសស្រីចំនួន៤៦នាក់ បាននាំគ្នាធ្វើការតវ៉ាបិទកំណាត់ផ្លូវម៉ៅសេទុង ក្រោយពីសណ្ឋាគារបានបិទទ្វារឈប់ដំណើរការអស់រយៈពេលជាង៥ខែមកហើយ មិនទាន់មានដំណោះស្រាយណាមួយនោះ។
ការលើកគ្នាតវ៉ាខាងលើនេះដែរបានធ្វើឡើងកាលពីវេលាម៉ោង៨ និង២០នាទីព្រឹកថ្ងៃទី ១១ ខែ ឧសភា ឆ្នាំ ២០២០ នៅចំណុចខាងមុខសណ្ឋាគារ THE GREAT DUKE (អតីតសណ្ឋាគារអាំងទែរកុងទីណង់តាល់) ផ្លូវម៉ៅសេទុង ក្នុងសង្កាត់ទំបន់ទឹក ខណ្ឌបឹងកេងកង ។
តាមប្រភពពីតំណាងម្នាក់បានប្រាប់ឱ្យដឹងថា ពួកគាត់ទាំងអស់គ្នាជាតំណាងឱ្យបុគ្គលិកចំនួន១៥២នាក់ មានការខកចិត្តយ៉ាងខ្លាំងចំពោះម្ចាស់សណ្ឋាគារ THE GREAT DUKE ដែលបានបិទទ្វារ ដោយមិនទូរទាត់សំណងជូនកម្មករ និយោជិត ស្របទៅតាមច្បាប់ការងារ ដែលជាអតីតបុគ្គលិកបម្រើការងារមិនទាន់ទទួលបាននូវប្រាក់សំណងអស់រយៈពេលជាង៥ខែមកហើយនោះ។
តាមប្រភពដដែលបានបន្តថា កាលពីថ្ងៃទី២០ ខែកុម្ភៈ ឆ្នាំ ២០២០ កន្លងមក ក្រុមប្រឹក្សាអាជ្ញាកណ្តាលបានចេញសេចក្តីបង្គាប់មួយ ដែលបានបង្គាប់ឱ្យនិយោជកទូទាត់ជូកកម្មករ និយោជិត នូវប្រាក់បំណាច់ ទូទាត់ជួសការជូនដំណឹងមុន និងប្រាក់រំលឹកអតីតភាពការងារមុនឆ្នាំ២០១៩ ដោយយកប្រាក់ឈ្នួលគោល និងប្រាក់បន្ទាប់បន្សំមកគណនាផងដែរ។
តាមប្រភពដដែលបានបន្តថា កាលពីថ្ងៃទី២៨ ខែ កុម្ភៈឆ្នាំ ២០២០ ប្រធានលេខាធិការដ្ឋានក្រុមប្រឹក្សាអាជ្ញាកណ្តាលបានចេញលិខិតជូនភាគីនិយោជក និងភាគីកម្មករនិយោជិតដោយបានបញ្ជាក់ថា ក្រោយពីភាគីទាំងពីរបានទទួលដំណឹងអំពីសេចក្តីបង្គាប់របស់ក្រុមប្រឹក្សា អាជ្ញាកណ្តាលកាលពីថ្ងៃទី ២៨ ខែ កុម្ភៈ ឆ្នាំ ២០២០ រហូតដល់ថ្ងៃទី ២៧ ខែ កុម្ភៈ ឆ្នាំ ២០២០ ពុំមានភាគីណាមួយបានដាក់ពាក្យប្តឹងជំទាស់នឹងសេចក្តីបង្គាប់របស់ក្រុមប្រឹក្សាអាជ្ញាកណ្តាលឡើយ ។ ដូច្នេះសេចក្តីបង្គាប់របស់ក្រុមប្រឹក្សា អាជ្ញាកណ្តាលនឹងត្រូវដាក់ឱ្យអនុវត្តបាន ហើយភាគីទាំងអស់នៃវិវាទនេះត្រូវជាប់កាតព្វកិច្ចអនុវត្តសេចក្តីបង្គាប់នេះ។
តាមប្រភពដដែលបានប្រាប់បន្តទៀតថា ប៉ុន្តែទោះបីជាប្រធានលេខាធិកាដ្ឋានក្រុមប្រឹក្សាអាជ្ញាកណ្តាលបានចេញលិខិតនេះ រហូតដល់សព្វថ្ងៃនេះ ភាគីនិយោជកមិនទាន់បានទូទាត់សំណងនៅឡើយទេ។ លើសពីនេះទៅទៀត ភាគីកម្មករនិយោជិតមិនទាន់ឃើញក្រសួងការងារ និង បណ្តុះបណ្តាលវិជ្ជាជីវៈ ចាត់វិធានការអ្វីសោះ ដើម្បីជួយដោះស្រាយឱ្យកម្មករនិយោជិត និងជំរុញអោយម្ចាស់សណ្ឋាគារ THE GREAT DUKE ទូទាត់ប្រាក់សំណងជូនពួកគាត់ឡើយ ទើបនៅព្រឹកថ្ងៃទី ១១ ខែ ឧសភា ឆ្នាំ ២០២០ នេះ សមាជិកសហជីពកម្មករនិយោជិតវិស័យទេសចរណ៍នៃសណ្ឋាគារធ្វើការជួបជុំធ្វើការតវ៉ាជាបន្តទៅទៀត។
តាមប្រភភព័ត៌មានពីសមត្ថកិច្ចមូលដ្ឋានបានប្រាប់ឱ្យដឹងថា នៅព្រឹកថ្ងៃទី១១ ខែ ឧសភា ឆ្នាំ ២០២០នេះដែរ មានអតីតក្រុមបុគ្គលិករបស់សណ្ឋាគារ THE GREAT DUKE ប្រុសស្រីចំនួន៤៦នាក់ ជាតំណាងអោយចំនួនសរុប១៥២នាក់ បាននាំគ្នាមកធ្វើការប្រមូលផ្តុំគ្នា ដោយមានឈរកាន់បដារនៅខាងមុខសណ្ឋាគារ ក្នុងគោលបំណងទាមទារប្រាក់សំណងរបស់ពួកគាត់ពីម្ចាស់សណ្ឋាគារ។
តាមប្រភពដដែលបានបន្តថា លុះបន្តិចក្រោយមក ក្រុមអតីតបុគ្គលិកទាំងអស់គ្នានោះក៏បានធ្វើការតវ៉ាបិទកំណាត់ផ្លូវម៉ៅសេទុង ហើយភ្លាមនោះក៏មានវត្តមានរបស់សាលាខណ្ឌចំការមន និង ខាងតំណាងសណ្ឋាគារ និងមន្ត្រីរបស់ក្រសួងការងារ និង បណ្តុះបណ្តាលវិជ្ជាជីវៈបានមកដល់ធ្វើការសម្របសម្រួល និងបន្តធ្វើការដោះស្រាយគ្នានៅថ្ងៃទី១២ ខែ ឧសភា ឆ្នាំ ២០២០ ជាបន្តទៀត ទើបអតីតក្រុមបុគ្គលិកយល់ព្រមបើកផ្លូវអោយធ្វើចរាចរណ៍ជាធម្មតា និងរំសាយទៅផ្ទះវិញ ៕ (កែសម្រួលដោយ ៖ ធីតា)
ចែករំលែកព័តមាននេះ