រាជធានីភ្នំពេញ៖ រដ្ឋមន្ត្រីក្រសួងទេសចរណ៍លោក ថោង ខុន អះអាងថាគម្រោងព្រលានយន្តហោះខេត្តមណ្ឌលគីរីគឺជាគម្រោងដ៏សំខាន់មួយសម្រាប់ការតភ្ជាប់ក្នុងតំបន់និងជម្រុញវិស័យទេសចរណ៍ក្នុងប្រទេសកម្ពុជា ព្រោះទៅថ្ងៃអនាគតព្រលានយន្តហោះខេត្តមណ្ឌលគិរីនេះ អាចនឹងត្រូវប្រើប្រាស់ជាព្រលានយន្តហោះក្នុងតំបន់ (Regional Flight) តភ្ជាប់ខេត្តមណ្ឌលគិរីទៅគោលដៅទេសចរណ៍ជិតខាង រួមមានថៃ វៀតណាម និងឡាវ ព្រមជាមួយទីក្រុង សំខាន់ៗផ្សេងទៀត របស់អាស៊ាន និងហួសទៅដល់ទីក្រុងសំខាន់ៗរបស់ប្រទេសចិនផងដែរ។
លោករដ្ឋមន្ត្រីបានបញ្ជាក់ទៀតថា ផែនការមេអភិវឌ្ឍទេសចរណ៍ខេត្តមណ្ឌលគិរីនេះ ត្រូវតែជា ផែនការដែលមានលក្ខណៈសមាហរណកម្មជាមួយវិស័យផ្សេងៗ (Integrated Master Plan) ដើម្បីសម្រេចចក្ខុវិស័យធ្វើឱ្យខេត្តមណ្ឌលគិរី និងតំបន់ភូមិភាគឥសាន្តទាំងមូលក្លាយជាគោលដៅទេសចរណ៍ប្រកបដោយស្ដង់ដា ជាពិសេសជម្រុញកំណើនភ្ញៀវទេសចរអន្តរជាតិឲ្យបានយ៉ាងតិច ២៥% នៃភ្ញៀវអន្តរជាតិសរុបមកកម្ពុជា ។
តាមប្រភពដដែលបានឲ្យដឹងថាគម្រោងសាងសង់ព្រលានយន្តហោះខេត្តមណ្ឌលគីរីនេះនឹងត្រូវពិភាគ្សាប្រជុំរវាងរដ្ឋនិងក្រុមហ៊ុនឯកជនមួយនាពេលឆាប់ៗខាងមុខដើម្បីសម្រេចថានឹងដាក់ដេញថ្លៃការសាងសង់ តែសម្រាប់ពេលវេលាជាក់លាក់ណាមួយនៅមិនទាន់អាចកំណត់នៅឡើយ តែបានកំណត់ទីតាំងរួចហើយគឺគ្រោងនឹងសាងសង់លើទំហំដី ៣០០ហិកតានៅក្នុងឃុំសែនមនោរម្យ ស្រុកអូរាំង ។
សូមរម្លឹកថាលោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានមានប្រសាសន៍នៅក្នុងពិធីសន្និសីទសារព័ត៌មានស្ដីពីវឌ្ឍនភាព និងទិសដៅការងារ
រដ្ឋលេខាធិការដ្ឋានអាកាសចរស៊ីវិល កាលពីព្រឹកថ្ងៃទី១៦ ខែមេសា ឆ្នាំ២០២០ នេះថា
គម្រោងសាងសង់ព្រលានយន្តហោះខេត្តមណ្ឌលគីរីគឺស្ថិតនៅក្នុងដំណាក់កាលសិក្សានៅឡើយ ដោយថវិកាវិនិយោគត្រូវបានប៉ាន់ស្មានស្ថិតនៅក្នុងរង្វង់៦០លានដុល្លារ ។
យោងតាមរបាយការណ៍របស់មន្ទីរទេសចរណ៍ខេត្តមណ្ឌលគីរីបានឲ្យដឹងថា ភ្ញៀវទេសចរដែលមកសម្រាកកម្សាន្តក្នុងខេត្តកាលពីឆ្នាំ២០១៩កន្លងទៅមានចំនួន២៥៩.០០០នាក់ក្នុង នោះភ្ញៀវអន្តរជាតិចំនួន១៤.៥០០នាក់ ។ ទន្ទឹមនោះមន្ទីរទេសចរណ៍ខេត្តក៏បានព្យាករណ៍ថា នៅ ឆ្នាំ២០២០នេះខេត្តមណ្ឌលគីរីនឹងទទួលបានភ្ញៀវទេសចរប្រមាណ៤៥០.០០០នាក់ក្នុងនោះ ភ្ញៀវទេសចរណ៍អន្តរជាតិប្រមាណ១៥០.០០០នាក់ ។
ចំណែកឆ្នាំ២០២១ ខេត្តមណ្ឌលគីរីនឹងទទួលបានភ្ញៀវទេសចរណ៍ប្រមាណ៦០០.០០០ នាក់ ក្នុងនោះភ្ញៀវអន្តរជាតិប្រមាណ១៨០.០០០ នាក់ ។ ឆ្នាំ២០២២ ខេត្តនឹងទទួលបានភ្ញៀវទេសចរប្រមាណ៧០០.០០០នាក់ក្នុង នោះភ្ញៀវអន្តរជាតិ ប្រមាណ២០០.០០០នាក់ខណៈដែលឆ្នាំ២០២៣ នឹងទទួលភ្ញៀវទេសចរប្រមាណ៨០០.០០០ នាក់ក្នុងនោះភ្ញៀវអន្តរជាតិប្រមាណ២៥០.០០០នាក់ ៕
ចែករំលែកព័តមាននេះ