ខេត្តរតនគិរី ៖ គ្រាប់បែកដ៏ធំមួយសទម្លាក់ពីយន្តហោះមួយគ្រាប់ ត្រូវបានប្រទះឃើញនៅក្នុងដីចម្ការរបស់កសិករម្នាក់ ខណៈគាត់ជីករណ្តៅដីដាំបង្គោលរបងព័ទ្ធចម្ការ ។ ភ្លាមៗនោះ គាត់ក៏បានជូនដំណឹងទៅនគរបាលប៉ុស្តិ៍ឃុំកោះពាក់ដើម្បីជួយអន្តរាគមន៍ ។ ការប្រទះឃើញគ្រាប់បែកនេះ…
ខេត្តរតនគិរី ៖ គ្រាប់បែកដ៏ធំមួយសទម្លាក់ពីយន្តហោះមួយគ្រាប់ ត្រូវបានប្រទះឃើញនៅក្នុងដីចម្ការរបស់កសិករម្នាក់ ខណៈគាត់ជីករណ្តៅដីដាំបង្គោលរបងព័ទ្ធចម្ការ ។ ភ្លាមៗនោះ គាត់ក៏បានជូនដំណឹងទៅនគរបាលប៉ុស្តិ៍ឃុំកោះពាក់ដើម្បីជួយអន្តរាគមន៍ ។ ការប្រទះឃើញគ្រាប់បែកនេះ គឺកាលពីថ្ងៃទី៩ ខែឧសភា ឆ្នាំ២០២០កន្លងមក ស្ថិតក្នុងភូមិផាក់ណាម ឃុំកោះពាក់ ស្រុកវើនសៃ។
ម្ចាស់ចម្ការដែលប្រទះឃើញនេះឈ្មោះ លុយ ជឺញ រស់នៅក្នុងភូមិ ឃុំខាងលើ បានរាយការណ៍
ប្រាប់នគរបាលប៉ុស្តិ៍ឃុំកោះពាក់ ហើយក៏បាន សហការជាមួយអង្គការ NPA ទៅត្រួតពិនិត្យដល់ទីកន្លែងភ្លាមៗ ។
ប្រភពពីសមត្ថកិច្ចនិងមន្ត្រីអង្គការ NPA ដែលទៅត្រួតពិនិត្យនិយាយថា គ្រាប់បែកនេះជាប្រភេទគ្រាប់MK-៨២ ឬហៅបែបសាមញ្ញថា គ្រាប់បែកB-៥២ ដែលបន្សល់ទុកពីសម័យសង្គ្រាមនាដើមទសវត្សរ៍ឆ្នាំ១៩៧០ ។
ក្រោយពីការពិនិតរួចរាល់ ក៏បានធ្វើការហ៊ុមព័ទ្ធដាក់បម្រាមជុំវិញទីនោះដើម្បីរង់ចាំក្រុមជំនាញបច្ចេកទេសខាងប្រមូលគ្រាប់យុទ្ធភ័ណ្ឌមិនទាន់ផ្ទុះរបស់អង្គការNPA ដែលនឹងមកដល់ក្នុងរយៈពេល៣ថ្ងៃខាងមុខទើបចាត់កាបន្ត ។
តាមប្រវត្តិនៃសង្គ្រាមនាដើមទសវត្សរ៍ឆ្នាំ១៩៧០ ការទម្លាក់គ្រាប់បែកពីលើយន្តហោះB-៥២ របស់សហរដ្ឋអាមេរិកបានធ្វើឡើងក្នុងឆ្នាំ១៩៧៣ ដើម្បីគាំទ្រទាហានសេនាប្រមុខ លន់ នល់ ។ គ្រាប់បែកទម្លាក់ពីលើយន្តហោះនេះ បានបន្សល់ទុកកប់ក្នុងដីជាច្រើនកន្លែង ដែលគ្រាប់បែបនេះ១គ្រាប់មានទម្ងន់២២៧គីឡូក្រាម ។
បើតាមតួលេខរបស់អង្គការស៊ីម៉ាក់ ចាប់ពីដើមឆ្នាំ១៩៦៣ ដល់ដើមឆ្នាំ១៩៧៥ សហរដ្ឋអាមេរិកទម្លាក់គ្រាប់បែកនៅកម្ពុជាចំនួន២លាន៨សែនតោន និងគ្រាប់បែកគីមីផងដែរ ។ ទិន្នន័យនេះ បានការឯកភាពពីប្រធានាធិបតី ប៊ីល គ្លីនតុន នៅឆ្នាំ២០០០ និងបានបញ្ចេញឯកសារនេះជាចំហផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ