ប្រទេសចិន ៖ ជំងឺកូវីដ១៩ នៅប្រទេសចិន មានភាពធូរស្បើយជាងមុនច្រើន ដោយជាងពាក់កណ្តាលប្រទេស មិនមានករណីជំងឺនេះទៀត។ សាធារណជននៅតែតម្រូវឱ្យពាក់ម៉ាសនៅតាមទីសាធារណៈ ជាពិសេសកន្លែងដែលមានមនុស្សច្រើនកកកុញ។
ថ្នាក់រៀនបានចាប់ផ្តើមឡើងវិញ ជាមួយនឹងការបើកសាលាបឋម និងអនុវិទ្យាល័យ ប៉ុន្តែវាមិនមែនជាការចាប់ផ្តើមល្អសម្រាប់វិស័យអប់រំទេ។ ការបាត់បង់ជីវិតជាច្រើនត្រូវបានគេរាយការណ៍នៅក្នុងសាលារៀន បន្ទាប់ពីសិស្សពាក់ម៉ាស់ បានសន្លប់ និងបាត់បង់ជីវិតក្នុងអំឡុងពេលនៃការហាត់ប្រាណនៅសាលា ដែលគេហៅថា ម៉ោងអប់រំកាយ (PE)។
ម្នាក់ក្នុងចំណោមពួកគេ មានអាយុ១៥ឆ្នាំ ដែលត្រូវបានគេស្គាល់ឈ្មោះថា Xiao Li មកពីអនុវិទ្យាល័យ Caiyuan ក្នុងទីក្រុង Zhoukou ខេត្ត Henan ។ យោងទៅតាមឪពុករបស់គាត់ឈ្មោះ Li Jian បានឱ្យដឹងថា ក្មេងជំទង់នោះបានដួលពេលកំពុងរត់ជុំវិញសាលារៀន។ ក្រុមគ្រួសារសង្ស័យថា សិស្សសាលានេះបាត់បង់ជីវិត ដោយសារលទ្ធផលនៃការពាក់ម៉ាស់ ដែលតម្រូវឱ្យធ្វើនៅពេលមកសាលារៀន ដើម្បីការពារកូវីដ១៩។
នៅថ្ងៃទី១៤ ខែមេសា ក្មេងជំទង់អាយុ១៦ឆ្នាំម្នាក់ មកពីទីក្រុង Wenzhou នៃខេត្ត Zhejiang បានបាត់បង់ជីវិតពេលកំពុងរត់ ខណៈដែលពាក់ម៉ាស់៣ស្រទាប់។
កាលពីថ្ងៃទី៣០ ខែមេសា សិស្សអាយុ១៥ឆ្នាំម្នាក់ មកពីទីក្រុង Changsha នៃខេត្ត Hunan បានស្លាប់ ខណៈពេលឆ្លងកាត់ការរត់ចម្ងាយ១គីឡូម៉ែត្រ នៅសាលារៀន ពេលកំពុងពាក់ម៉ាស់ N95។
សាស្ត្រាចារ្យ Sun Hongtao មកពីមន្ទីរពេទ្យ Beijing Fuwai បាននិយាយថា ម៉ាស់ N95 ដែលមានខ្យល់ចេញចូលតិចតួច មិនសមនឹងមនុស្សទូទៅយកមកពាក់នោះទេ។ គាត់បាននិយាយថា កង្វះអុកស៊ីសែន អាចបណ្តាលឱ្យខូចខាតយ៉ាងធ្ងន់ធ្ងរដល់ខួរក្បាលរបស់មនុស្ស និងសរីរាង្គដទៃទៀត ខណៈដែលស្ទះការដកដង្ហើមអាចបំផ្លាញដល់សួត។
វេជ្ជបណ្ឌិត Wang Yantong នៃមន្ទីរពេទ្យ Huaxi បានប្រឆាំងនឹងការពាក់ម៉ាស់ N95 លើកុមារអាយុ៧ឆ្នាំ។
គួរបញ្ជាក់ផងដែរថា នាយករងនាយកដ្ឋានប្រយុទ្ធនឹងជំងឺឆ្លង CDC ទីក្រុងប៉េកាំង លោក Liu Xiaofeng បាននិយាយថា សាធារណជនមិនគួរពាក់ម៉ាស់ទេ ពេលកំពុងហាត់ប្រាណនៅខាងក្រៅ តែពួកគេគួរតែរក្សាគម្លាតពីគ្នាឱ្យបានឆ្ងាយទើបជាការល្អ៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ