ខេត្តកណ្ដាល ៖ រថយន្តម៉ាកហ្វដមួយគ្រឿង (ស្លាកលេខត្រូវបានគេដោះចេញ) ដែលមានភិនភាគដូចរថយន្តបង្កគ្រោះថ្នាក់ចរាចរណ៍មួយបានបុកកម្មករម្នាក់ បណ្ដាលឲ្យស្លាប់នៅលើកំណាត់ផ្លូវលេខ២០០៤ នៅរាជធានីភ្នំពេញ ត្រូវបានកម្លាំងនគរបាលខេត្តកណ្ដាល ប្រទះឃើញនៅចំណុច ភូមិព្រែកប៉ិ ឃុំកោះធំខ ស្រុកកោះធំ ខេត្តកណ្ដាល នៅថ្ងៃទី១០ ខែឧសភា ឆ្នាំ២០២០ ។
មន្ត្រីនគរបាលខេត្តកណ្ដាល បានឲ្យដឹងថា រថយន្តដែលម៉ាកហ្វដ មានប័ណ្ណសម្គាល់យានយន្ត ខម ០២-៤៦០៤ ដែលរថយន្តខាងលើនេះ មានភិនភាគ ដូចរថយន្តបុកកម្មករស្លាប់នៅផ្លូវ២០០៤ កាលពី យប់ថ្ងៃទី២៥ ខែមេសា ឆ្នាំ២០២០ ។
បច្ចុប្បន្ន សមត្ថកិច្ច បានយករថយន្តនេះមករក្សាទុកនៅស្នងការដ្ឋាននគរបាលខេត្តកណ្តាល ដើម្បីត្រៀមប្រគល់ជូនសមត្ថកិច្ចនគរបាលរាជធានីភ្នំពេញ ចាត់ការបន្តតាមច្បាប់ ។
សូមជម្រាបថា កាលពីយប់ថ្ងៃទី២៥ ខែមេសា ឆ្នាំ២០២០ នៅផ្លូវ២០០៤ ខណ្ឌពោធិ៍សែនជ័យ មានរថយន្តម៉ាកហ្វដ ពាក់ផ្លាកលេខ ខេមរភូមិន្ទ១គ្រឿង បានបើកម៉ូតូមនុស្សស្លាប់យ៉ាងអាណោចអាធ័ម តែភ្លាមៗនោះ រថយន្តបង្កបានបើកគេចពីកន្លែងកើតហេតុ តែយ៉ាងណាអ្នកបើកបររថយន្តបង្ក ត្រូវបានគេផ្សព្វផ្សាយតាមបណ្ដាញសង្គមថា មានឈ្មោះ ឈុន សារ៉េត ជាមន្ត្រីយោធាពាក់ស័ក្តិ៥ ។ ចំណែកសពជនរងគ្រោះមានឈ្មោះ វង រដ្ឋា កម្មកររោងចក្រ មានលំនៅក្នុងភូមិថ្មី ឃុំពោធិ៍ម្រាល ស្រុកបរសេដ្ឋ ខេត្តកំពង់ស្ពឺ ៕
ចែករំលែកព័តមាននេះ