ខេត្តបាត់ដំបង ៖ លោកឈឿង គឹមសុង នាយការិយាល័យព្រហ្មទណ្ឌកំរិតស្រាលបាននិយាយថា លោកស្នងការខេត្តបានបញ្ជាឲ្យមន្ត្រីជំនាញសាកសួរជនដៃដល់ទាំង២នាក់ ដើម្បីស្រាវជ្រាវឱ្យបានជាក់លាក់ ។ ពីព្រោះបើតាមពិនិត្យនិងស្ដាប់ចម្លើយជនដៃដល់ហាក់មិនច្បាស់លាស់ឡើយ ចំពោះការតាមកាប់ដើម្បីសងសឹកនេះ។ គេសង្ស័យជនដៃដល់កាប់ច្រឡំសត្រូវរបស់ខ្លួន ព្រោះជនដៃដល់សំអាងតែទៅលើម៉ូតូប៉ុណ្ណោះ តែមិនបានស្គាល់មុខសត្រូវរបស់ខ្លួនឡើយ រីឯជនរងគ្រោះក៏អះអាងថា មិនធ្លាប់ស្គាល់ឬធ្លាប់ផ្ទុះជម្លោះជាមួយក្រុមទំនើងនេះដែរ ។
សូមរំលឹកថា ជនទំនើងចំនួន២នាក់ក្នុងចំណោមបក្សពួកចំនួន០៥នាក់ ត្រូវបានកម្លាំងការិយាល័យព្រហ្មទណ្ឌកំរិតស្រាល ឃាត់ខ្លួននៅវេលាម៉ោង១១ និង៤០នាទីយប់ថ្ងៃទី០៨ ឧសភា ក្រោយពីពួកពួកគេបានកាប់ទៅលើយុវជន០២នាក់ទៀត បណ្ដាលឱ្យរងរបួសនិងខូចខាតម៉ូតូ នៅក្បែរវិទ្យាល័យនេតយ៉ង់ ស្ថិតក្នុងភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង ដែលពួកជនដៃដល់អះអាងថា ជាការសងសឹកគំនុំចាស់កាលពីខែមុន។
លោក ឈឿង គឹមសុង នាយការិយាល័យព្រហ្មទណ្ឌកម្រិតស្រាល បាននិយាយថា ជើងខ្លាំងទាំង២នាក់ដែលត្រូវឃាត់ខ្លួន ម្នាក់ឈ្មោះ ហៃ ចាន់ឌី អាយុ២២ឆ្នាំ នៅភូមិបោះពោធ៌ ឃុំអូរដំបង១ ស្រុកសង្កែ និង ម្នាក់ទៀតឈ្មោះ ពុំ ពេជ្រ អាយុ២១ឆ្នាំ នៅភូមិ១៣មករា សង្កាត់ព្រែកមហាទេព ក្រុងបាត់ដំបង ។
លោក ឈឿង គឹមសុង បានប្រាប់ថា ជនទាំង២នាក់នេះ និងបក្សពួក៣នាក់ទៀតដែលរត់គេចខ្លួន បានព្រូតគ្នាជិះម៉ូតូដេញតាមកាប់ទៅលើយុវជន២នាក់ត្រង់ចំណុចខាងលើបណ្ដាលឱ្យរងរបួសនិងខូចខាតម៉ូតូ១គ្រឿង។ ជនរងគ្រោះទាំង២នាក់ ឈ្មោះ សៀត ស៊ីឆាវ អាយុ១៧ឆ្នាំ និង ឈ្មោះ សេង ង៉ូវ អាយុ១៦ឆ្នាំ ពួកគេរស់នៅភូមិច្រាបក្រសាំង សង្កាត់វត្តគរ ក្រុងបាត់ដំបង។ ជនដៃដល់ត្រូវបានកម្លាំងផ្នែកបង្ការ បង្ក្រាប តាមឃាត់ខ្លួនបាន២នាក់ភ្លាមៗ ខណ:៣នាក់បានរត់រួច។
លោកបានបញ្ជាក់ថា បើតាមចម្លើយបឋមដែលជនដៃដល់បានសារភាព គឺពួកគេតាមកាប់ជនរងគ្រោះ ដើម្បីជាការសងសឹក។បើតាមការស្រង់សំដីពីសមត្ថកិច្ច ជនដៃដល់ឈ្មោះ ហៃ ចាន់ឌី និង ឈ្មោះ ពុំ ពេជ្រ បានសារភាពថា ពួកខ្លួនពិតជាបានតាមកាប់ជនរងគ្រោះមែន ដោយសារតែជនរងគ្រោះធ្លាប់ដេញកាប់ពួកខ្លួនកាលពីខែមុន។ ប៉ុន្តែជនទំនើងទាំង២នាក់នេះ បានបញ្ជាក់ថា ពួកខ្លួនមិនចំណាំមុខជនដែលកាប់ពួកខ្លួនកាល ពីខែមុននោះទេ តែខ្លួនចំណាំម៉ូតូម៉ាក Zoomer ។ ដោយឡែក ភាគីខាងរងគ្រោះវិញ ក៏បានអះអាងដែរថា ពួកខ្លួនមិនធ្លាប់ស្គាល់ក្រុមជនដៃដល់នេះទេ ហើយពួកខ្លួនក៏មិនធ្លាប់បង្កជម្លោះជាមួយនរណាដែរ។
យ៉ាងណាក៏ដោយ បើតាមលោកប្រធានការិយាល័យព្រហ្មទណ្ឌកំរិតស្រាល បានបញ្ជាក់ថា ពេលនេះលោកស្នងការខេត្តបានបញ្ជាឱ្យមន្ត្រីជំនាញសួរនាំជនដៃដល់ ដើម្បីកសាងសំណុំរឿងបញ្ជូនទៅសាលាដំបូងខេត្តហើយ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ