ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ពលករ និងអាជីវករខ្មែរសរុប៦៨នាក់ ត្រូវទាហានឈុតខ្មៅថៃ ធ្វើកាឃាត់ខ្លួនកាលពីថ្ងៃទី៨ ខែឧសភា ឆ្នាំ២០២០ ស្ថិតក្នុងស្រុកអសរញ្ញ ខេត្តស្រះកែវ ដោយចោទថា ឆ្លងដែនខុសច្បាប់។
គ្មានប្រភពណាបញ្ជាក់ពីចំនួនពលករលម្អិតទេ ប៉ុន្តែតាមមន្ត្រីការិយាល័យទំនាក់ទំនងព្រំដែនកម្ពុជា-ថៃប្រចាំច្រកទ្វារអន្តរជាតិប៉ោយប៉ែតម្នាក់ បានប្រាប់តាមទូរស័ព្ទថា ក្នុងចំណោម៦៨នាក់ខាងលើ មានមួយចំនួនតូចជាអាជីវករលក់ដូរនៅផ្សាររុងក្លឿ ហើយត្រូវសមត្ថកិច្ចថៃចាប់ពេលពួកគេលួចចូលទៅមើលតូប និងខ្លះទៀតចូលទៅបើកតូបលក់ឥវ៉ាន់ខណៈប្រទេសកំពុងដាក់ក្នុងគ្រាអាសន្ននៅឡើយ។ ក្រៅពីនេះ ជាពលករដែលចាញ់បោកមេខ្យល់គេនាំទៅទុកចោលក្នុងដីថៃ ក្នុងស្រុកអារញ្ញ ហើយត្រូវទាហានឈុតខ្មៅថៃឃាត់ខ្លួន។
ទោះជាយ៉ាងណា ពលករ និងអាជីវករទាំង៦៨នាក់ខាងលើ ពុំមានមន្ត្រី ឬសមត្ថកិច្ចណាបញ្ជាក់ឲ្យដឹងអត្តសញ្ញាណា ឬមានស្រី និងកុមាប៉ុន្មាននាក់ឡើយ គឺឲ្យដឹងត្រឹមថា ពលរដ្ឋនិងពលករទាំងអស់ពិតជាត្រូវភាគីថៃចាប់មែន។
ប្រភពខ្លះថា ពលរដ្ឋទាំង៦៨នាក់ត្រូវភាគីថៃធ្វើការបញ្ជូនឲ្យភាគីកម្ពុជាតាមច្រកអូរបីជាន់ក្នុងស្រុកអូរជ្រៅហើយ។
ជុំវិញព័ត៌មានខាងលើនេះដែរ លោកវរសេនីយ៍ សួង សៅ មេបញ្ជាការនគរបាលការពារព្រំដែនគោកលេខ៨១៥ ប្រចាំនៅស្រុកម៉ាឡៃ ក៏បានប្រាប់តាមទូរស័ព្ទថា យោងសម្តីអាជ្ញាធរស្រុកម៉ាឡៃថា ពលរដ្ឋទាំង៦៨នាក់ត្រូវភាគីថៃបញ្ជូនដល់កម្ពុជាហើយតាមច្រករបៀងអូរបីជាន់ កាលពីថ្ងៃទី៩ ឧសភា ម្សិលមិញ។
ទោះជាយ៉ាងណា ព័ត៌មាននេះ ហាក់ដូចមានការបិទបាំង ព្រោះខណៈភ្នាក់ងាកោះសន្តិភាពចុះដល់ទីតាំងទទួលពលករនៅច្រករបៀងអូរបីជាន់ ហើយសាកសួរ បែរជាមន្ត្រី និងសមត្ថកិច្ចនៅទីនោះឆ្លើយដាក់គ្នាតែម្តង ហើយឲ្យសួរអ្នកនេះម្តង ឲ្យសួរអ្នកនោះ និងភាគីច្រើនអះអាងថា មិនទាន់ឃើញមនុស្សទាំង៦៨នាក់នោះ គេបញ្ជូនពីថៃនៅឡើយទេ។
ដោយឡែកពលករវិលត្រឡប់ពីថៃ ត្រូវប្រភពពីទីតាំងទទួលពលករនៅមាត់ច្រករបៀងអូរបីជាន់ បង្ហើបថា មានកាកើនឡើងពេលយប់ ហើយពេលថ្ងៃមានចំនួនតិចតួច។ ចំណែកពលករវិលត្រឡប់ពីថៃ នៅតែមានច្រើនដូចសព្វមួយដង ហើយពលករទាំងនេះប្រាប់ថាមិនអាចនៅបន្តលើដីថៃបានទេ ព្រោះតាមរោងចក្រត្រូវគេបិទអស់ហើយ ម្យ៉ាងព្រួយបារម្ភពីជំងឺឆ្លងកូវីត១៩ផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ