ការផ្លាស់ប្តូរសំខាន់ចំនួន២ នឹងត្រូវអនុវត្តនៅពេលសកម្មភាព នៃការប្រកួតបាល់ទាត់វិលត្រឡប់មកវិញ ក្រោយមានការស្នើពីសហព័ន្ធបាល់ទាត់ពិភពលោក (FIFA) ក្នុងន័យជួយសម្រួលលើកាលវិភាគ ដែលនឹងមានភាពមមាញឹកខ្លាំងនៅពេលខាងមុខ ។
ក្រុមបាល់ទាត់ទាំងអស់ នឹងត្រូវបានអនុញ្ញាតឲ្យមានការផ្លាស់ប្តូរកីឡាករចំនួន ៥ នាក់ក្នុងមួយប្រកួត ដើម្បីជួយសម្រួលដល់កីឡាករពីការប្រើប្រាស់កម្លាំងច្រើនហួស ។ ក្នុងនោះ FIFA ក៏បានស្នើជាជម្រើសឲ្យផ្អាកការប្រើប្រាស់ប្រព័ន្ធវីដេអូជំនួយអាជ្ញាកណ្តាល (VAR) ដោយសារតែមានការព្រួយបារម្ភអំពីសុវត្ថិភាព ចំពោះមន្ត្រីដែលធ្វើការជាមួយគ្នានៅក្នុងបន្ទប់តូចមួយ អំឡុងពេលមានការប្រកួត។ ការផ្លាស់ប្តូរនេះ នឹងត្រូវអនុវត្តចំពោះការប្រកួតប្រជែងដែលនៅសេសសល់ក្នុងរដូវកាលនេះ ។
សូមរំលឹកថា លីគភាគច្រើននៅជុំវិញពិភពលោក ត្រូវបានផ្អាក និងរំសាយចោល ដោយសារតែការផ្ទុះឡើងពីវីរុសកូវីដ-១៩ ។
ក្របខ័ណ្ឌ Bundesliga របស់ប្រទេសអាល្លឺម៉ង់ នឹងក្លាយជាលីគកំពូលនៅទ្វីបអឺរ៉ុបដែលចាប់ផ្តើមការប្រកួតនៅសប្តាហ៍ក្រោយ (ថ្ងៃទី១៦) ខណៈដែលគម្រោងចាប់ផ្តើមឡើងវិញសម្រាប់ក្របខ័ណ្ឌ Premier League មានការរំពឹងទុកថានឹងធ្វើឡើងនៅខែក្រោយ ។
ក្រុមប្រឹក្សាសមាគមកីឡាបាល់ទាត់អន្តរជាតិ (Ifab) ដែលជាស្ថាប័នបង្កើតច្បាប់បាល់ទាត់ បានយល់ព្រមក្នុងការផ្លាស់ប្តូរជាបណ្តោះអាសន្ននូវច្បាប់នៃការប្រកួត ដើម្បីការពារដល់សុខុមាលភាពរបស់កីឡាករ ក្រុមគ្រូបង្វឹក និងបុគ្គលិកដែលពាក់ព័ន្ធទាំងអស់ ។
Ifab បានធ្វើប្រកាសនៅក្នុងសេចក្តីថ្លែងការណ៍មួយថា ការធ្វើវិសោធនកម្មបណ្តោះអាសន្ននឹងចូលជាធរមាន ខណៈដែលការប្រកួតអាចត្រូវបានលេងនៅក្នុងលក្ខខណ្ឌខុសៗគ្នាទៅតាមប្រទេសនីមួយៗ ។ ទាំង Ifab និង FIFA នឹងធ្វើការសម្រេចចិត្តនៅដំណាក់កាលបន្ទាប់ថា តើនឹងត្រូវបន្តសេចក្តីសម្រេចនេះ ដល់រដូវកាល ២០២០-២១ ឬយ៉ាងណា? ៕ (ដកស្រង់ចេញពី BBC)
ចែករំលែកព័តមាននេះ