រាជធានីភ្នំពេញ ៖ តារាចម្រៀងជួរមុខនៅកម្ពុជាអ្នកនាង ម៉េង កែវពេជ្ជតា ថ្មីៗនេះបានអំពាវនាវដល់សមត្ថកិច្ចជួយអ្នកនាងរកយុត្តិធម៌ដល់អ្នកនាងផងក្រោយពីមានស្ត្រីមួយរូបបានខមមិនគំរាមបសម្លាប់រូបអ្នកនាង ។ នេះបើយោងតាមការបង្ហោះរបស់អ្នកនាងម៉េង កែវពេជ្ជតា លើគណនីហ្វេសប៊ុករបស់អ្នកនាងកាលពីថ្ងៃទី ៩ ខែឧសភា ។
អ្នកនាងម៉េង កែវពេជ្ជតា បានបញ្ជាក់ក្នុងសំណេររបស់អ្នកនាងសុំឲ្យស្ថាប័នមានសមត្ថកិច្ចផង និងសូមជួយផ្តល់យុត្តិធម៌ដល់រូបអ្នកនាងដែលជាអ្នកសិល្បៈស្លូតត្រង់ដែលតែងត្រូវមនុស្សពាលធ្វើបាប ជាក់ស្តែងដូចមានស្ត្រីមួយរូបបានខមមិន គំរាមអាយុជីវិតអ្នកនាងអញ្ចឹង ។
តារាចម្រៀងដែលមានទឹកដមសម្លេងពីរោះរណ្តំរូបនេះបានបង្ហោះសារមានខ្លឹមសារថា «មិនអាចត្រឹមតែសូមទោស ក៏រួចខ្លួនទេមីង ខ្ញុំមិនទទួលយកទេ ! បើការជេរគេ គំរាមសម្លាប់គេរួចហើយសូមទោសបាន ប្រទេសក៏មិនបាច់មានច្បាប់ដែរ នាំគ្នាដើរជេរ ដើរសម្លាប់គ្នាពាសវាលពាសកាលទៅ » ។
អ្នកនាងបានបន្តទៀតថា «ឆ្ងល់ដែរ បើសិនខ្ញុំជាអ្នកគំរាមសម្លាប់អ្នកឯងវិញ តើអ្នកឯងនឹងធ្វើម៉េច ? ខឹង ប្តឹង ដាក់ទោស ? ហើយបបួលពួកតែស្ករចូលមកជំទាលដៀលជេរប្រមាថហៅថា មីតារាអញ្ចេះ មីតារាអញ្ចុះ តាមចិត្តដើម្បីឆ្លៀតឱកាស ? ច្បាស់ណាស់ ដូចរឿងនេះ ខ្ញុំមិនដែលស្គាល់ឬមានបញ្ហាអីជាមួយផង ក៏មីងស្អប់ខ្ញុំ និងសាហាវដាក់ខ្ញុំប៉ុណ្ណឹងទៅហើយ ទំរាំតែខ្ញុំមានអ្វីខុសទៀត មីងមិនលើកលែងទេ»។
អ្នកនាងម៉េង កែវពេជ្ជតា តារាចម្រៀងប្រកបដោយទេពកោសល្យខ្ពស់បានបន្ថែមថា «ដូច្នេះខ្ញុំសូមឆ្លើយតបតាមនីតិវិធី ដើម្បីទុកជាគំរូដល់ពួកអ្នកចូលចិត្តចូលមកជេរបញ្ចោរ និងប្រើអំណាចគំរាមសម្លាប់ដូចមីងឯង អាងតែខ្លួននៅឆ្ងាយគិតថា គ្មានអ្នកស្គាល់ ។ ខ្ញុំក៏ចង់ដឹងដែរថា មីងមានខ្នងនៅទីណាខ្លះ ហើយធំប៉ុណ្ណា ទើបបានជាហ៊ានបញ្ជាអោយគេទៅជួបខ្លួន បើមិនទៅប្រយ័ត្នងាប់ ស្រួលៗយ៉ាងនេះ ! ខ្លួនមានឋានៈនាទីជាឱសថការីកំពុងបំរើការងារ និងមានបើកការព្យាបាលមនុស្សផង តែបែរជាមានចរិតកោងកាចឃោឃៅសាហាវព្រៃផ្សៃហួសថ្លែង.. តែឆ្ងាញ់ត្រង់ពេលគេតាមទាន់ដល់មុខផ្ទះ ក៏រំអួយថា មិនសូវស្រួលខ្លួន គិតច្រើន ចង់ឆ្កួត..ឯណាទៅវិញ….។
បើម្តងជា ម្តងឆ្កួតបែបនេះ អញ្ចឹងមីងត្រៀមបិទឱសថស្ថាន និងគ្លីនិកអោយហើយទៅ គ្មានច្បាប់ឯណាអនុញ្ញាតិអោយមនុស្សរោគចិត្ត មនុស្សឆ្កួតសរសៃប្រសាទមកបើកលក់ថ្នាំ និងព្យាបាលគេនុះទេ ហើយមីងក៏នៅតែត្រូវទទួលខុសត្រូវចំពោះខ្ញុំដែរ កុំគិតថាធ្វើឆ្កួតអាចរួចខ្លួនអោយសោះ !» ។
ព្រមជាមួយគ្នានោះអ្នកនាងបានបន្ត «នាងខ្ញុំសូមផ្ញើសំណុំរឿងព្រហ្មទណ្ឌមួយនេះជាមួយស្ថាប័នមានសមត្ថកិច្ចផង 🙏 សូមជួយផ្តល់យុត្តិធម៌ដល់អ្នកសិល្បៈស្លូតត្រង់ដែលតែងត្រូវមនុស្សពាលធ្វើបាបម្នាក់នេះផង 🙏 ។ នាងខ្ញុំក៏សូមអរគុណបងប្អូន ទស្សនិកជន និងហ្វ៊េនដែលគាំទ្រ និងជួយផ្តល់កម្លាំងចិត្តដល់នាងខ្ញុំ 🙏 សូមអរគុណ» ។
យ៉ាងណាមិញ ងាកទៅគណនីហ្វេសប៊ុកដែលមានឈ្មោះថា Ho Dany ដែលតារាចម្រៀងរូបនេះ ថតជាប់ខមមិនគំរាមនោះ បានសរសេរសារគំរាមបែបនេះថា «យើងរាប់អានគ្នាអាចបន្តទៅមុខបាន ឬអត់យើងក៏មើលគ្នាសិនដែរ ok» ។ បន្ទាប់មកអ្នកនាងម៉េង កែវពេជ្ជតា បានឆ្លើយតបដោយចោទជាសំណួរថា «បានន័យថា ម៉េចដែរទៅ?» ស្រាប់តែម្ចាស់គណនីហ្វេសប៊ុកខាងលើបានតបថា «ចាំជួបគ្នាសិន កុំភ្លេចផ្សារ Lacky ប៉េង … មិនឃើញប្រយ័ត្នងាប់» ។
ចំពោះគណនីខាងលើនេះ ត្រូវបានអ្នកនាងម៉េង កែវពេជ្ជតា បង្ហោះសារបញ្ជាក់ថា នាងគឺជាឱសថការីមួយរូប ។
កោះសន្តិភាពនឹងផ្សាយជូនលម្អិតបន្ថែមទៀត៕ (កែសម្រួលដោយ ៖ បុប្ផា)
ចែករំលែកព័តមាននេះ