សហរដ្ឋអាមេរិក ៖ អតីតប្រធានាធិបតីសហរដ្ឋអាមេរិកលោក បារ៉ាក់ អូបាម៉ា បានធ្វើការវាយប្រហារយ៉ាងចាស់ដៃទៅលើការចាត់វិធានការរបស់លោកប្រធានាធិបតី ដូណាល់ ត្រាំ លើជំងឺរាតត្បាតវីរុសកូវីដ-១៩ និងបានហៅដំណោះស្រាយរបស់លោកត្រាំ ឆ្លើយតបនឹងវីរុសឆ្លងមួយនេះថាជា «គ្រោះមហន្តរាយវឹកវរ» ខណៈសហរដ្ឋអាមេរិកនាំមុខពិភពលោកដែលមានករណីឆ្លងវីរុសរលាកសួតថ្មីមួយនេះ ដែលមានចំនួនជិត ១,៣ លាននាក់ ។ នេះបើយោងតាមការចុះផ្សាយរបស់សារព័ត៌មាន South China Morning Post នាថ្ងៃទី ១០ ខែឧសភា ឆ្នាំ ២០២០ ។
ប្រភពដដែលបានបញ្ជាក់ថា នៅក្នុងការលេចធ្លាយការសន្ទនាតាមប្រព័ន្ធអ៊ីនធើរណេតនៅយប់ថ្ងៃសុក្រកន្លងទៅ របស់លោកអូបាម៉ា ជាមួយអតីតសមាជិករដ្ឋបាលរបស់លោកនោះ លោកអូបាម៉ា ក៏បាននិយាយផងដែរថា សេចក្តីសម្រេចរបស់ក្រសួងយុត្តិធម៌ក្នុងការទម្លាក់ការចោទប្រកាន់លើលោក Michael Flynn ប្រធានទីប្រឹក្សាសន្តិសុខជាតិរបស់សហរដ្ឋអាមេរិក ដែលជាស្ថាប័នកំពូលមួយរបស់រដ្ឋលោកត្រាំ ដែលបានសារភាពថា មានកំហុសក្នុងការកុហក FBI នៅក្នុងការស៊ើបអង្កេតរបស់រុស្ស៊ី បានធ្វើឱ្យប៉ះពាល់ដល់នីតិរដ្ឋនៅអាមេរិក ។
នៅក្នុងសារសំលេងដែលទទួលបានមុនដោយ Yahoo News លោកអូបាម៉ា បានជម្រុញឱ្យអតីតបុគ្គលិកទាំងអស់ចូលរួមជាមួយគាត់ក្នុងការប្រមូលផ្តុំគ្នាជាមួយលោកសម្រាប់ជួយនៅពីក្រោយលោក Joe Biden នៅពេលដែលគាត់ត្រៀមទទួលយកតំណែងរបស់លោក Trump នៅក្នុងការបោះឆ្នោតប្រធានាធិបតីនាខែវិច្ឆិកាខាងមុខនេះ ។
សូមរម្លឹកថា សហរដ្ឋអាមេរិក នាំមុខពិភពលោកដែលមានចំនួននៃការឆ្លងមេរោគឆ្លងវីរុសកូវីដ-១៩ កើនឡើងជិត ១,៣ លាននាក់ និងចំនួនអ្នកស្លាប់ចំនួនជាង ៧៧.០០០ នាក់។
លោក Trump ត្រូវបានគេរិះគន់ជាបន្តបន្ទាប់លើវិធានការប្រយុទ្ធនឹងកូវីដ-១៩ ដោយលោកហាក់មានការធ្វេសប្រហែសនាំឲ្យប្រទេសពើបប្រទះនូវការខ្វះខាតឧបករណ៍វេជ្ជសាស្ត្រសំខាន់ៗសម្រាប់សង្គ្រោះពលរដ្ឋ និងក្រុមគ្រូពេទ្យ ។
ហេតុដូច្នេះសម្រាប់ការបោះឆ្នោតឡើងវិញ សម្រាប់តំណែងប្រធានាធិបតីនៅអាមេរិក លោកត្រាំក៏ត្រូវបានគេស្តីបន្ទោសថា លោកបានដាក់ផលប្រយោជន៍នយោបាយផ្ទាល់ខ្លួនមុនជីវិតមនុស្សដោយជំរុញឱ្យរដ្ឋនានាបើកទ្វារសេដ្ឋកិច្ចដែលហិនហោចរបស់ពួកគេឡើងវិញ ដោយមិនមានប្លង់ច្បាស់សម្រាប់របៀបធ្វើវាដោយសុវត្ថិភាពឡើយ ៕ ដកស្រង់ចេញពីវេបសាយ ៖ scmp (កែសម្រួលដោយ ៖ បុប្ផា)
ចែករំលែកព័តមាននេះ