រាជធានីភ្នំពេញ ៖ ក្នុងរដូវកាលនៃការរីករាលដាលនៃជំងឺកូវីដ១៩កើតមាននៅក្នុងប្រទេសក្នុងរយៈពេល៣ឬ៤ខែកន្លងទៅនេះ គេសង្កេតឃើញប្រជាពលរដ្ឋខ្មែរងាកមកគាំទ្រផ្លែឈើ និងផលិតផលក្នុងស្រុក ។ ក្នុងនោះផ្លែទុរេនកំពុងហាក់មានហាងឆេង ឬមានទីផ្សារខ្ពស់ ពោលតម្លៃលក់នៅលើទីផ្សារសព្វថ្ងៃលក់ថ្លៃជាងឆ្នាំមុនៗ ខណៈអាជីវកម្មលក់ដូរតូចធំមួយចំនួនពិបាកក្នុងការលក់ចេញ ។
បើតាមអ្នកបោះដុំទុរេនប្រចាំនៅខេត្តកំពតបានឱ្យដឹងថា សព្វថ្ងៃនេះការប្រមូលផលទុរេនមិនទាន់មានសំបូរនោះទេ ប៉ុន្តែតម្លៃទុរេននៅឆ្នាំនេះ គឺលក់បានថ្លៃជាងឆ្នាំមុនៗ ហើយក្នុងមួយថ្ងៃៗអ្នកស្រីបោះដុំទៅឱ្យម៉ូយនៅតាមទីផ្សារតំបន់ពី៤០០ទៅ៥០០គីឡូក្រាម ។
អ្នកស្រី សេន រីយ៉ា បានឱ្យដឹងថា « ផ្លែទុរេនកំពតមានការពេញនិយមហូបពីប្រជាពលរដ្ឋខ្មែរហើយឆ្នាំនេះលក់បានថ្លៃជាងរាល់ឆ្នាំ ។ ឆ្នាំមុនៗផ្លែទុរេនមួយគីឡូក្រាមថ្លៃជាង១ម៉ឺនរៀល តែឆ្នាំ២០២០ នេះបោះដុំបានថ្លៃជាង២ម៉ឺនរៀល ។ ហើយនៅរាល់ថ្ងៃនេះខ្ញុំបានបោះដុំទុរេនផ្លែ ទៅឱ្យម៉ូយនៅខេត្តតាកែវ ភ្នំពេញ និងនៅខេត្តកំពត មានពី៤០០ទៅ៥០០គីឡូក្រាមក្នុងមួយថ្ងៃ »។
បើតាម អ្នកស្រី សេនរីយ៉ា នៅពេលបច្ចុប្បន្ននេះតម្លៃផ្លែទុរេនលក់ ឬបោះដុំនៅលើទីផ្សារបានថ្លៃ ប៉ុន្តែនៅពីរឬបីខែខាងមុខវាអាចនឹងធ្លាក់ថ្លៃបន្តិចមកវិញ ព្រោះដល់រដូវនៃការប្រមូលផលមានច្រើន តែប្រជាពលរដ្ឋនូវតែមានការពេញនិយមបរិភោគជាងផ្លែធុរេននៅតាមខេត្តផ្សេងៗ ។
អ្នក សេនរីយ៉ាង សង្កត់ធ្ងន់ថា «ទោះបីតម្លៃថ្លៃ ឬអាចនឹងធ្លាក់ចុះបន្តិច នៅពេលទុរេនសំបូរ អ្នកបរិភោគដូចជា អត់ថយចុះទេ ព្រោះទុរេនយើងវាឆ្ងាញ់វាមិនដូចទុរេនគេ(ខេត្តផ្សេង)។
អ្នកស្រី ប៊ុន ចិន្តា អាជីវករលក់ផ្លែឈើនៅផ្សារតាកែវបានឱ្យដឹងថា ក្នុងរដូវកាលនៃការកើតជំងឺកូវីដ១៩នេះ ប្រជាពរលដ្ឋហាក់មានការពេញនិយមបរិភោគផ្លែឈើដែលដាំដោយប្រជាកសិករក្នុងស្រុក ពិសេសផ្លែទុរេនកំពតទោះបីឆ្នាំនេះវាមានតម្លៃថ្លៃជាងឆ្នាំមុនបន្តិចក្តី ក៏នៅមានអ្នកទិញបរិភោគច្រើន បើប្រៀបធៀបទៅនឹងផ្លែឈើក្នុងស្រុកដទៃទៀត ។
អ្នកស្រីបញ្ជាក់ថា« ផ្លែទុរេនកំពតឆ្នាំនេះទោះបីមានតម្លៃថ្លែ តែពលរដ្ឋអ្នកចូលចិត្តហូបច្រើននៅតែមានច្រើន ព្រោះទុរេនកំពតវាមានរសជាតិឆ្ងាញ់ ៕
ចែករំលែកព័តមាននេះ