ម៉ូតូថ្មីសន្លាងនិងមួកសុវត្ថិភាពចំនួន២ បានប្រគល់ដល់ដៃម្ចាស់ខ្លួនហើយ
- ប៉ៃលិន
ខេត្តប៉ៃលិន ៖ ក្រោយពីនាយិកាក្រុមហ៊ុនម៉ូតូយីហោ«ក្រុមហ៊ុន អប់ប៉ា ត្រេឌីង ឯ.ក» ដែលមានទីតាំង ស្ថិតនៅផ្ទះលេខ២៦៤ ផ្លូវ២៧១ ក្នុងសង្កាត់ទំនប់ទឹក…
ខេត្តប៉ៃលិន ៖ ក្រោយពីនាយិកាក្រុមហ៊ុនម៉ូតូយីហោ«ក្រុមហ៊ុន អប់ប៉ា ត្រេឌីង ឯ.ក» ដែលមានទីតាំង ស្ថិតនៅផ្ទះលេខ២៦៤ ផ្លូវ២៧១ ក្នុងសង្កាត់ទំនប់ទឹក…
ខេត្តប៉ៃលិន ៖ ក្រោយពីនាយិកាក្រុមហ៊ុនម៉ូតូយីហោ«ក្រុមហ៊ុន អប់ប៉ា ត្រេឌីង ឯ.ក» ដែលមានទីតាំង ស្ថិតនៅផ្ទះលេខ២៦៤ ផ្លូវ២៧១ ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ដែលមានអាក់ខោន
ហ្វេសប៊ុក (Kunthea Lim) បានផ្ញើម៉ូតូ១គ្រឿងពីភ្នំពេញទៅដល់ខេត្តប៉ៃលិន នៅវេលាម៉ោង៨និង៣០នាទីព្រឹកថ្ងៃទី០៩ ឧសភា នេះ ភ្នាក់ងារសារព័ត៌មានកោះសន្តិភាព ជាតំណាងឱ្យម្ចាស់ក្រុមហ៊ុនខាងលើ ក៏ដូចជាតំណាងឱ្យសារព័ត៌មាននៃគេទំព័រ និងកាសែតកោះសន្តិភាព បានយកទៅប្រគល់ម៉ូតូ១គ្រឿង និងមួកសុវត្ថិភាពចំនួនពីរជូនដល់ក្រុមគ្រួសារពលរដ្ឋក្រីក្រម្នាក់ ដែលបានដុតម៉ូតូចាស់ខ្លួនចោលនោះហើយ ។
សូមរំលឹកថា កាលពីថ្ងៃទី០១ ឧសភា ព្រោះតែខឹងនគរបាលផាកពិន័យជាង១០ម៉ឺនរៀល ខណ:រូបគេប្រញាប់យកកូនទៅដេររបួសក្បាល ដែលមែកឈើធ្លាក់ចំ ហើយសុំបង់ឱ្យនគរបាលត្រឹម២ម៉ឺនរៀល លុះអត់ទទួលយក ក៏ដុតម៉ូតូចោលតែម្តង ។ ប្រភពព័ត៌មានបានឱ្យដឹងថា បុរសដែលទទួលបានម៉ូតូពីក្រុមហ៊ុនខាងលើ មានឈ្មោះ ដួង វិឆ័យ ភេទប្រុស អាយុ៣៣ឆ្នាំ ប្រពន្ធឈ្មោះ ថាប់ ឡាត់ អាយុ២៥ឆ្នាំ មានកូនក្នុងបន្ទុកចំនួន៣នាក់ ប្រុស២ ស្រី១ រស់នៅភូមិទួលខ្ពស់ ឃុំស្ទឹងត្រង់ ស្រុកសាលាក្រៅ មានជីវភាពក្រីក្រ ។
បុរស ដួង វិឆ័យ ដែលទទួលបានម៉ូតូ១គ្រឿងបានឱ្យដឹងថា លោកនិងក្រុមគ្រួសារ ពិតជាមានការត្រេកអរយ៉ាងខ្លាំងពន់ពេក មិនដឹងយកអ្វីទៅប្រៀបផ្ទឹមបាននោះទេ ហើយក៏សូមលើកម្រាមដៃ១០ ថ្លែងអំណរគុណដល់នាយិកាក្រុមហ៊ុនម៉ូតូ ឱ្យទទួលបាននូវសុខភាពល្អ កម្លាំងមាំមួន ប្រាជ្ញាឈ្លាសវៃ ប្រកបរបររកទទួលទានឱ្យបានជោគជ័យគ្រប់ពេលវេលា ជាពិសេសសូមឱ្យនាយិកាក្រុមហ៊ុនម៉ូតូជួបតែមនុស្សល្អ ។
ចំណែក លោកង៉ែត ទូច ជាឪពុកក្មេក និងជាមេភូមិទួលខ្ពស់ ក៏បានថ្លែងអំណរគុណ ដល់លោកផាន់ ចាន់ធុល អភិបាលខេត្តប៉ៃលិន ដែលបានជួយអន្តរគមន៍ និងលើកលែងទោសឱ្យកូនប្រសាររបស់គាត់ ដែលល្មើសនឹងច្បាប់ចរាចរណ៍ ហើយបែរជាដុតម៉ូតូផ្គើននឹងសមត្ថកិច្ចនគរបាលថែមទៀត ។ លោកក៏ថ្លែងអំណរគុនដល់ម្ចាស់ក្រុមហ៊ុនម៉ូតូ និងអរគុណដល់ក្រុមហ៊ុនកាសែតកោះសន្តិភាព ដែលបានជួយចុះផ្សាយព័ត៌មាន ដើម្បីឱ្យមហាជនឃើញ និងដឹងឮកុំឱ្យយកតម្រាប់តាមកូនប្រសាររបស់គាត់ ព្រោះកំហឹងនាំឱ្យខាតនាំឱ្យខូច និងនាំឱ្យខុសផងដែរ ។
លោកបញ្ជាក់ថា កូនៗរបស់ពួកគាត់ ពិតជាក្រីក្រប្រាកដមែន សូម្បីតែផ្ទះដែលត្រូវខ្យល់បក់ប៉ើងដំបូលកាលពីភ្លើងលាយ ខ្យល់កន្ត្រាក់ប៉ុន្មានថ្ងៃមុន ក៏អត់មានប្រាក់ទិញស័ង្កសីប្តូរជួសជុលនៅឡើយទេ ហើយបច្ចុប្បន្នកូនៗរបស់គាត់ អត់មានការងារធ្វើទៀត ដោយធ្វើស្រែបន្តិចបន្តួចសម្រាប់ចិញ្ចឹមជីវិតប៉ុណ្ណោះ ។ លើសពីនេះ គាត់ក៏បានណែនាំកូនៗ របស់ខ្លួន ឱ្យឈប់ប្រព្រឹត្តល្មើសនឹងច្បាប់ចរាចរណ៍ទៀត ព្រោះបានម៉ូតូថ្មី១គ្រឿង មានគ្រប់លក្ខណ:អស់ហើយ គឺមានមួកកញ្ចក់ ស្លាកលេខ កាតគ្រី ដូច្នេះបើសិនជាខុសនឹងច្បាប់ចរាចរណ៍នៅថ្ងៃណាមួយ ត្រូវតែដោះស្រាយតាមសន្តិវិធី ព្រោះគោរពច្បាប់ចរាចរណ៍ ដើម្បីសុវត្ថិភាពខ្លួនឯង និងអ្នកដទៃ ។
សូមបញ្ជាក់ថា ម៉ូតូចាស់ ដែលនគរបាលចរាចរណ៍ ស្រុកសាលាក្រៅ ផាកករណីអត់មួក និងកញ្ចក់កាលពីវេលាម៉ោង៦ និង៣០នាទីព្រឹកថ្ងៃទី០១ ឧសភា ឆ្នាំ២០២០ រហូតមកដល់ពេលនេះ មិនទាន់បានយកចេញ ទៅផ្ទះនៅឡើយទេ ទាល់តែរកប្រាក់ចំនួន១២០០០០រៀលបង់ថ្លៃផាករួច ទើបអាចយកចេញបាន នេះបើតាមសម្តីរបស់ម្ចាស់ម៉ូតូខាងលើ ៕
ចែករំលែកព័តមាននេះ