រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថា ក្នុងមួយសប្តាហ៍មកនេះ គ្រោះថ្នាក់ចរាចរណ៍មានការថយចុះបើប្រៀបធៀប និងសប្តាហ៍មុន…
រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថា ក្នុងមួយសប្តាហ៍មកនេះ គ្រោះថ្នាក់ចរាចរណ៍មានការថយចុះបើប្រៀបធៀប និងសប្តាហ៍មុន ។
ការបញ្ជាក់របស់សម្ដេចស ខេង បន្ទាប់ពីរាជរដ្ឋាភិបាលបានដាក់ពង្រឹងច្បាប់ចរាចរណ៍ពីថ្ងៃទី១ ខែឧសភាកន្លងមក ។ សម្ដេច ស ខេង ក៏បានប្រកាសស្វាគមន៍ទទួលយកមតិរិះគន់ក្នុងន័យស្ថាបនាលើការអនុវត្តច្បាប់ចរាចរណ៍ផ្លូវគោកថ្មីផងដែរ ។
សម្ដេចស ខេង បានសរសេរលើបណ្ដាញសង្គមនាព្រឹកថ្ងៃទី០៩ ខែឧសភានេះយ៉ាងដូច្នេះថា៖«អរុណសួស្តីបងប្អូនជនរួមជាតិជាទីគោរព! ថ្ងៃម្សិលមិញនេះក្នុងនាមជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកខ្ញុំបានដឹកនាំកិច្ចប្រជុំដ៏សំខាន់មួយស្តីពីការត្រួតពិនិត្យការរឹតបន្តឹងអនុវត្តច្បាប់ចរាចរណ៍ផ្លូវគោកដែលមានរយៈពេលមួយសប្តាហ៍កន្លងមក» ។ សម្តេចបន្តថា លទ្ធផលគួរកត់សម្គាល់ ក្នុងរយៈពេលមួយសប្តាហ៍នេះ គឺគ្រោះថ្នាក់ចរាចរណ៍ និងការស្លាប់បាត់បង់ជីវិតដោយគ្រោះថ្នាក់ចរាចរណ៍នេះមានការថយចុះ បើប្រៀបធៀបរយៈពេលមួយសប្តាហ៍ចុងក្រោយមុនមានការរឹតបន្តឹងអនុវត្តច្បាប់ចរាចរណ៍ផ្លូវគោកនេះ ។
សម្តេចថា៖ខ្ញុំសូមថ្លែងអំណរគុណដល់បងប្អូនជនរួមជាតិទាំងអស់ ដែលបានចូលរួមគោរពអនុវត្តច្បាប់ចរាចរណ៍ផ្លូវគោក និងកងកម្លាំងមានសមត្ថកិច្ចក៏ដូចជា មន្ត្រីពាក់ព័ន្ធទាំងអស់ ដែលបានអនុវត្តភារកិច្ចរបស់ខ្លួនបានល្អប្រសើរ ។ ជាពិសេសខ្ញុំសូមថ្លែងអំណរគុណដ៏ជ្រាលជ្រៅចំពោះបងប្អូនជនរួមជាតិដែលបានផ្ញើសារ និងការបញ្ចេញមតិនៅក្នុងផេកហ្វេសប៊ុករបស់ខ្ញុំផ្ទាល់តែម្តង ដែលសុទ្ធតែជាសារ និងមតិប្រកបដោយខ្លឹមសារចូលរួមស្ថាបនា និងកែលំអរ ។
សម្តេចបញ្ជាក់ថា៖« ខ្ញុំសូមលើកទឹកចិត្តដល់បងប្អូនជនរួមជាតិបន្តចូលរួមផ្តល់ជាមតិយោបល់ក្នុងន័យស្ថាបនា និងកែលំអរថែមទៀត ដើម្បីបន្តការអនុវត្តច្បាប់ចរាចរណ៍ផ្លូវគោកឲ្យកាន់តែល្អប្រសើរឡើង គឺមានន័យថា អត្រាគ្រោះថ្នាក់ចរាចរណ៍នឹងកាន់តែថយចុះចំនួនអ្នកស្លាប់កាន់តែតិច សណ្តាប់ធ្នាប់សាធារណៈកាន់តែមានរបៀបរៀបរយល្អប្រសើរ សមជាប្រទេសកម្ពុជា និងប្រជាពលរដ្ឋខ្មែរជាប្រជាជាតិស៊ីវិល័យ »៕
ចែករំលែកព័តមាននេះ