រាជធានីភ្នំពេញ ៖ លោក ម៉ៃ តុលា អតីតអគ្គលេខាធិការរងសហព័ន្ធកីឡាបាល់ទាត់កម្ពុជា ត្រូវបានឃាត់ខ្លួនបញ្ជូនទៅកាន់អង្គភាពប្រឆាំងអំពើពុករលួយមុនពេលបញ្ជូនទៅកាន់តុលាការចាត់ការតាមនីតិវិធី ។ ការឃាត់ខ្លួននេះធ្វើឡើងកាលពីរសៀលថ្ងៃទី៧ ឧសភា ដោយអង្គភាពប្រឆាំងអំពើពុករលួយ សហការជាមួយកងរាជអាវុធហត្ថលើផ្ទៃប្រទេសទាក់ទងទៅនឹងអំពើពុករលួយនៃការកិបកេងថវិកាក្នុងការរៀបចំប្រកួតបាល់ទាត់ Tiger Street Football តាំងពីឆ្នាំ២០១៣ រហូតមកដល់ឆ្នាំ២០១៩ ។ នេះបើតាមការបញ្ជាក់ពីមន្ត្រីជាន់ខ្ពស់កងរាជអាវុធហត្ថលើផ្ទៃប្រទេស។
គួរឱ្យដឹងដែរថា កាលពីថ្ងៃទី៦ ខែឧសភា ឆ្នាំ២០២០ សហព័ន្ធកីឡាបាល់ទាត់កម្ពុជា បានចេញសេចក្តីប្រកាសព័ត៌មានមួយមុនធ្វើសន្និសីទសារព័ត៌មានទាក់ទងទៅនឹងការព្យួរសកម្មភាពកីឡាមួយជីវិតរបស់មន្ត្រីសហព័ន្ធ៤រូប ដែលមានលោក ទុយ វិច្ឆិកា ប្រធានការិយាល័យអាជ្ញាកណ្ដាល លោក ឆាំង ពិសិដ្ឋ ប្រធានការិយាល័យប្រកួត លោក គល់ សុភារម្យ ប្រធានការិយាល័យរដ្ឋបាល និងលោក ម៉ៃ តុលា អគ្គលេខាធិការរងសហព័ន្ធ ។
បើតាមសេចក្តីប្រកាសរបស់សហព័ន្ធកីឡាបាល់ទាត់កម្ពុជាបញ្ជាក់ថា លោក ម៉ៃ តុលា ត្រូវបញ្ជូនសំណុំរឿងប្រព្រឹត្តអំពើពុករលួយទៅតុលាការ ដើម្បីចាត់វិធានការតាមផ្លូវច្បាប់។
ទាក់ទងបញ្ហានេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាបានថ្លែងប្រាប់អ្នកសារព័ត៌មានថា នៅអំឡុងការរៀបចំប្រកួតបាល់ទាត់ Tiger Street Football តាំងពីឆ្នាំ២០១៣ រហូតដល់ឆ្នាំ២០១៩ ដែលសហការរៀបចំដោយក្រុមហ៊ុនស្រាបៀរថៃហ្គ័រ និងសហព័ន្ធកីឡាបាល់ទាត់កម្ពុជា បានរកឃើញថា មន្ត្រីសហព័ន្ធទាំង៤រូបនោះបានកិបកេងថវិកាប្រមាណជិត៦ម៉ឺនដុល្លារសហរដ្ឋអាមេរិក ។ ហេតុនេះទើបសហព័ន្ធកីឡាបាល់ទាត់កម្ពុជា បានបើកកិច្ចប្រជុំជាច្រើនលើកហើយឈានដល់ការព្យួរសកម្មភាពកីឡាបាល់ទាត់ដល់មន្ត្រីទាំង៤រូបនេះអស់មួយជីវិតតែម្ដង៕
ចែករំលែកព័តមាននេះ